Read Mongondow KINOBAḺIAN 13 Bible Online

KINOBAḺIAN 13 - Mongondow bible

KINOBAḺIAN 13

¹Ki Abram nonaḷámaidon kon Mesir bo nopobayá ná dotá in utuan, mopobayá kon dotá in toḷatan Kanaan takin ki buḷoinea bo bayongan kapunyaannea, bo ki Lot in sinumakin doman.

²Ki Abram in nobiag nooyúon totok; kon inia noantó in domba, bembé, sapi, saḷaka bo buḷawan.

³Dá minayádon in sia nongkon tampat tobatú nopobayá in tampat ibanea, nopobayá in Betel. Sia nodapot bui in butá inta kon sigad in Betel bo Ai, kon tampat mokaramat inta koḻipod pinomiaannea kon ḷoḷaigan

⁴bo noposindog in mezbah. Kon tua sia in nosumba kon i TUHAN.

⁵Ki Lot inta dinumudui noyotakin i Abram in kobuḷoi kogadí doman bo kodomba, kosapi bo kobembé.

⁶Tuamai butá kon tua in diádon tugat in bonok popokaanan in bayongan bobiagon monia inta mobarongdon totok tua.

⁷Bo nobaḻídon in bobayowan kon sigad in gombala i Abram bo gombala mita i Lot. (Kon tungkuḷ intua intau mita in Kanaan bo intau mita in Peris nogutunpa kon butá tatua.)

⁸Ki Abram in noguman kon i Lot, “Kitada naa uḻe in doyowa motoḷuadí, dá diá mopia aka intau natonda bo morogenggeng.

⁹Tuamai maníka kitada in moyotontanídon. Piḻídon kon dotá onda in butá inta koibogmu. Aka iko mopobayá ná koḷoigi dá akuoi in mopobayá ná koḷanan, aka iko mopobayá ná koḷanan dá akuoi mopobayá ná koḷoigi.”

¹⁰Ki Lot nobobui magí mako bo inontongnea kon bayongan Ḷopá in Yordan, nodapot kon kotá in Zoar nobarong in tubig, ná taman i TUHAN[26] ande naonda bo butá in Mesir. (Natuata in kaadaannea kon dodai in diápa pinokak i TUHAN kotá mita in Sodom bo Gomora.)

¹¹Pangabisannea ki Lot in nomiḻí kon bayongan Ḷopá in Yordan tatua, bodongka nobuat nopobayá in pomukaan, bo noyotontanídon in taya dua.

¹²Ki Abram in tantúbí nogutun kon butá in Kanaan, yo ki Lot in nogaid kon ḷoḷaigannea kon kotá inta kon ḷopá nodapot kon diug in Sodom.

¹³Kotá in Sodom tua pinogutunan in intau mita inta totuu mongoraat bo totok in binaradosa kon tayowon i TUHAN.

¹⁴Naonda in ki Lot minayá, ki TUHAN in noguman kon i Abram, “Nongkon tampat sinindoganmu nion, pobobuiká magí-mako kopira kon bayongan tampat;

¹⁵Akuoi in mobogoi kon inimu bo kon buímu in bayongan butá inta inontongmu tua sinbá mobaḻí kapunyaanmu mononoi.

¹⁶Akuoi in mobogoi kon inimu in buí inta totok in mobarong, dapot in diádon tobatúmai intau in mokoiap kon i monia. Ná doman ḷobud inta diá koiapan in intau, yo ná doman tua in buímu mita diá doman koiapan in intau.

¹⁷Bo tanaa ḻibudon in butá tanaa, sin ogoi-Kudon kon inimu.”

¹⁸Onda intua ki Abram nomamping kon ḷoḷaigannea bodongka nogutun notantú kon diug in pangkoi in kayu mita karamat tampat pososumbaan kon Mamre kon diug in Hebron, bo kon tua sia in noposindog in Mezbah kon i TUHAN.