Read Mongondow KINOBAḺIAN 15 Bible Online

KINOBAḺIAN 15 - Mongondow bible

KINOBAḺIAN 15

¹Nopaḷut mako kon tua, ki Abram nokoontong kon oontongon bo nokodongog kon i TUHAN noguman kon inia, “Dika moondok, Abram, ḷukadan-Kubí in iko nongkon bodito, bo moḷoben totok tondan in pinogaidanmu in ogoi-Ku kon inimu.”

²Táe ki Abram in noguman, “TUHAN Inta Totok in Moḷantud, ki TUHAN diá nobogoi in adí kon inakó. Intau inta mogabat kon kapunyaanku tongábí ki Eleazer, bobantungku inta nongkon Damsyik. [27] Dá onubí in mangaḻenea ki TUHAN mobogoi kon inakó in tondan pinogaidanku?”

⁴Onda intua ki Abram nokodongog ki TUHAN in noguman bui kon inia, “Deemanbí bobantungmu in motarima kon kapunyaanmu, táe ki adímubí tontaní inta ḷoḷaki.”

⁵Ki TUHAN in nodia kon i Abram iḻumuai bodongka noguman kon inia, “Ḷangagka kon ḷangit, bo tungkuḷaika iyap in tundi mita; yo buímu in kobayongnea naonda bo tundi mita tatua.”

⁶Ki Abram in nopirisaya kon i TUHAN, dá tuamai sia in sinarima i TUHAN nobaḻí intau inta mokosanang kon gina-Nea.

⁷Onda intua ki TUHAN bui noguman kon inia, “Akuoi naa in ki TUHAN, inta ain nodia kon inimu iḻumuai nongkon butá in Ur kon Babilonia, sin mobogoi in butá tanaa kon inimu mobaḻí kapunyaanmu.”

⁸Táe ki Abram in noḻibó, “O, TUHAN Inta Totok in Moḷantud, naondabí in kototaauku kon butá tatua in mobaḻí kapunyaanku?”

⁹Tubag i TUHAN, “Pogamáaidon in Akuoi kon sapi kobaayan tobatú, bembé kobaayan tobatú, bo domba koḷakian tobatú, tua mita in komintandon umur toḷu notaong, bo ḷagapan doman tarangkuku tobatú bo ḷagapan paḷoma tobatú.”

¹⁰Bo ki Abram nogamá kon mahaḷuk mita tatua bo pinokuruban kon i Allah. Sapi, bembé bo domba tatua komintan iḷosinea doyowa, bo kinatadnea doyowa bo pinoyogintayow. Táe ḷagapan mita tatua in diábí iḷosinea.

¹¹Tapú mita tatua inangoi in ḷagapan mita inta mokokaan kon tapú mita inta nobongkogdon, táe inuntun i Abram.

¹²Naonda in mata in singgai ain momangkoi tumoyop, ki Abram in noḷoḷot. Bo daḻíbí in sia inagían totok in ondok.

¹³Ki TUHAN noguman kon inia, “Pokotorop, buímu in mobaḻí intau ango-angoi kon butá intau; mosia in mobaḻí ata kon tua bo tonggataan kon bonu in opat nogatut notaong in koonggotnea.

¹⁴Táe bangusa inta mononggata kon buímu tua in hukumon-Ku bo kon tungkuḷ in buímu monaḷámai kon butá tatua, mosia in modia kon kapunyaan moantó.

¹⁵Iko tontaní moumur in kobiaganmu, bo matoi takin pia in gina, bo ḷobongon.

¹⁶Naonda in opat nopobuían, ki adí bo ki ompumu in mobuidon mangoi kon naa, sin Akuoi in diábí moguntun kon intau in Amori aka mosia diápa totok in moraat dapot in paraḷu hukumon.”

¹⁷Naonda in nodoḷomdon, indoianmai yo daḻíbí inontong in tuḷú popoyokan takin poḷombow inta koyongki-yongkit, bo sinumaḻib kon tapú mita inta ain iḷosi-ḷosi tatua.

¹⁸Kon dodai doman tuata ki TUHAN nogaid kon dodandian takin i Abram. Guman i TUHAN, “Akuoi in modandi kon ogoi-Ku kon buímu in bayongan butá tanaa, pinangkoi kon sigad in butá in Mesir modapot kon Ongkag in Eprat,

¹⁹noitakin doman in butá intau in Keni, Kenas, Kadmon,

²⁰Het, Peris, Repaim,

²¹Amori, Kanaan, Girgasi bo Yebus.”