Read Mongondow KINOBAḺIAN 16 Bible Online

KINOBAḺIAN 16 - Mongondow bible

KINOBAḺIAN 16

¹Ki Sarai, ki buḷoi Abram tatua, diápa doman nokouḻí kon adí. Táe sia in kobobantung tobatú inta mongodeaga in Mesir tangoinea in ki Hagar.

²Ki Sarai in noguman kon i Abram, “Akuoi naa in diádon ogoi TUHAN mononggadí. Tuamai, maníka iko in mosiugdon moyotakin in bobantungku tanaa, sin degá sia motaaupa mopononggadí in adí inta baḻíon ki adíku.” Dá dinuduian i Abram in singog i Sarai tatua.

³Dá natua in nobaḻí, ki Sarai in nogamá kon i Hagar bo inogoi kon i Abram sin baḻíonnea buḷoi. Dodai intua ki Abram aindon mopuḷú notaong kon Kanaan.

⁴Ki Abram in nosiugdon takin i Hagar, bo nobaḻídon sidia in bobay tatua. Táe naonda in kinotaauan i Hagar kon sia in sidiadon, sia in mokaḷakuangdon bo moningkuḻemaidon kon i Sarai.

⁵Bo ki Sarai in noguman kon i Abram: “Inogoikudon in ki Hagar bobantungku tua kon inimu, tongá naonda in kinotaauannea kon sidia in sia, sia in moningkuḻemaidon kon inakó. Tua in taḷámudon.[28] Poigumon mako ki TUHAN mobaḻídon hakim kon sigad inatonda.”

⁶Tubag i Abram, “Mopia, sia tua in bobantungmu bo kon bonubí in kawasamu in sia; dá aidaidon onu in koibogmu.” Dá pinomiadon ibo-ibog i Sarai in ki Hagar, dapot in noḷaguidon in sia.

⁷Malaekat i TUHAN namangoi nokipodungkuḷ kon i Hagar kon diug in bokaká kon padang gurun, kon daḷan mopobayá in padang gurun Sur.

⁸Malaekat tatua in noguman, “Hagar, bobantung i Sarai, nongkon onda in iko bo mopobayá in onda?” Tubag i Hagar, “Akuoi in noḷagui kon i Sarai ki Tuangku.”

⁹Malaekat tatua in noguman, “Buidon bayá kon inia bo pobantungdon kon inia.”

¹⁰Bo malaekat tatua in bui noguman, “Akuoi in mobogoi kon inimu in adí bo ompu inta mobarong, dapot in diá tobatúmai intau mokoiyap kon i monia.

¹¹Diádon moonggot bo iko in mopononggadí in adí ḷoḷaki tobatú; tangoiaidon in sia ki Ismael,[29] sin dinongogdon i TUHAN in ombaḷmu.

¹²Táe ki adímu tua in mobiag naonda bo keledai kaḻig, sia in moḷawang kon intau, bo pomuḷoi in intau moḷawang kon inia. Sia in mobiagbí moitondí nongkon bayongan utat bo ginaḷumnea.”

¹³Ki Hagar noḻibó kon bonu in ginanea, “Totuu degá kon akuoi aindon nokoontong kon i Allah inta notabi kon inakó?” Dá sia in nodonoi kon i TUHAN, inta ain nopoyaput in tosingogon kon inia, “Ki Allah Inta Nonotabi.”

¹⁴Tuamai intau monangoi kon parigí inta kon sigad in Kades bo Bered tua, “Parigí i-Nia inta nobiag bo inta notabi kon inakó”.

¹⁵Bo ki Hagar in nopononggadídon in adí ḷoḷaki tobatú, bo ki Abram ki amá in adí tatua nonangoi kon adí tatua ki Ismael.

¹⁶Kon dodai intua ki Abram umurdon waḷu nopuḷú bo onom notaong.