Read Mongondow KINOBAḺIAN 17 Bible Online

KINOBAḺIAN 17 - Mongondow bible

KINOBAḺIAN 17

¹Kon tungkuḷ in ki Abram umur siow nopuḷú bo siow notaong, ki TUHAN nokipogontong kon inia bo poḷat noguman, “Akuoi in ki Allah Inta Totok in Mokawasa. Kobiagdon kon tayowon-Ku takin kodu-kodudui kon onu inta kinoibog-Ku.

²Akuoi in mogaid kon dodandian takinmu bo mobogoi kon inimu in buí inta mobarong.”

³Bo dinumokódon in ki Abram, bo ki Allah in noguman kon inia,

⁴“Naadon in dodandian inta pinomia-Ku takinmu: Akuoi in modandi kon iko in mobaḻí mogoguyang in bangusa mita. Tuamai tangoimu deeman bidon ki Abram, táe ki Abraham bidon.[30]

⁶Akuoi in mobogoi kon inimu in adí bo ompu inta mobarong, bo kon sigad monia tua oyúon in mobaḻí datu mita. Buímu in mobaḻí moantó totok, dapot in mosia mobaḻí bangusa mita.

⁷Akuoi in mogintompodbí kon dandi-Ku kon inimu bo kon buímu dapot in kon singgai moiduduimai, bo dodandian tatua in mononoibí. Akuoi in mobaḻí ki Allahmu bo ki Allah in buí-Mu.

⁸Akuoi in mobogoibí kon inimu bo kon buímu in butá tanaa, inta pinogutunanmu tanaa mako saḷaku intau ango-angoi. Bayongan butá in Kanaan in mobaḻíbí kapunyaan mononoi i adí bo i ompumu bo Akuoi in mobaḻí ki Allah monia.”

⁹Ki Allah in noguman bui kon i Abraham, “Iko in mustibí doman motoindudui kon dodandian tanaa, pinomayá iko ande buímu moiduduimai.

¹⁰Iko bo bayongan buímu inta ḷoḷaki musti toiton.

¹¹Nongkon tanaadon mako iko in musti monoit kon bayongan in adí mointok ḷoḷaki inta umur waḷu nosinggai, diá doman taḻiban bayongan in bobantung inta noilahir kon bonu in baḷoimu ande inta sinaḷuimu. Toit tatua in mobaḻí tanda in dodandian-Ku takinmu.

¹³Pomuḷoi intau in musti toiton, bo tua in mobaḻí tanda kon awak inta moposimantag kon dodandian-Ku tua in mononoi.

¹⁴Bayongan in ḷoḷaki inta diá sinoit diá bidon moituot kon anggota in umat-Ku sin sia in diá kinumadai kon dodandian tatua.”

¹⁵Onda intua ki Allah in noguman kon i Abraham, “Iko in dikadon mogoiní kon i buḷoimu ki Sarai; nongkon tanaadon mako tangoinea ki Sara bidon.

¹⁶Barakatan-Ku in sia bo sia in mopononggadí in adí ḷoḷaki tobatú inta ogoi-Ku kon inimu. Totuu, Akuoi in momarakatbí kon i Sara, bo sia in mobaḻí mogoguyang bobay in bangusa mita. Kon sigad in buínea oyúon in mobaḻí datu mita.”

¹⁷Bo dinumokódon in ki Abraham, táe kinumosing in sia kon dodai in norai kon bonu in ginanea, “Degá mokouḻípa kon adí in ḷoḷaki inta umurdon mogatut notaong, bo degá kumaanpa kon akaḷ in ki Sara inta ain umur siow nopuḷú notaong bo mononggadípa?”

¹⁸Bo ki Abraham in noguman kon i Allah, “Maníka ki Ismaeldon tua in mogabat kon kapunyaanku.”

¹⁹Táe ki Allah in noguman, “Deeman. Ki Sara ki buḷoimu in mopononggadíbí in adí ḷoḷaki tobatú bo tangoianmu in adí tatua ki Ishak.[31] Akuoi in kumadaibí tantú kon dodandian-Ku takin adí tatua bo takin buínea kinopopaḷutbí in dunia naa. Dodandian tatua in mononoi.

²⁰Táe duduian-Ku doman in oigummu soaḷ ki Ismael. Tuamai sia in barakatan-Ku bo ogoian-Ku in buí inta mobarong. Sia in mobaḻíbí doman mogoguyang in mopoḷú bodoyowá doman itoi in suku, bo buínea in baḻíon-Ku doman tobatú bangusa inta moḷoben.

²¹Táe dodandian-Ku in popotogot-Kubí kon i Ishak, ki adímu inta pononggadí i Sara, taong moiduduimai degá ná doman kon oras tanaa mako.”

²²Naonda in nopaḷut mako noguman natua, ki Allah nonaḷámaidon kon i Abraham.

²³Kon singgaipa doman tatua, ki Abraham dinumudui kon onu inta pinoguman i Allah bo sinunatneadon in ki Ismael ki adínea tatua, bo bayongan intau ḷoḷaki inta kon bonu in baḷoinea, pinotakin doman in bayongan bobantungnea inta pinononggadí kon bonu in baḷoinea ande inta sinaḷuinea.

²⁴Ki Abraham in umur siow nopuḷú bo siow notaong tungkuḷ in sia sinunat

²⁵bo ki Ismael ki adínea umur mopuḷú botoḷú notaong.

²⁶Mosia in sinunat tosinggai monag,

²⁷noyotakin in bayongan bobantung i Abraham.