Read Mongondow KINOBAḺIAN 18 Bible Online

KINOBAḺIAN 18 - Mongondow bible

KINOBAḺIAN 18

¹Ki TUHAN nokipogontong kon i Abraham kon diug in pangkoi kayu mita mokaramat inta tampat pososumbaan kon Mamre. Tungkuḷ intua singgai totok in mopatú, bo ki Abraham ḻimitú mako kon ngara in ḷoḷaigannea.

²Naonda in sia dinumungádon monik, sia in nokoontong kon intau taya toḷu sinimindog kon tayowonnea. Ki Abraham in baḷú noribatuk sin monontomu kon i monia tua. Takin sinumungkud

³sia in noguman, “Tuang mita, donaaipa tongá tumaḻib mako natua kon ḷoḷaiganku naa, táe pongandupabí; ogoiaipa in wakutu akuoi mobogoi in onuka kon i Tuang mita.

⁴Pomayádon mako bain akuoi in mogamá kon tubig sin pondaritan kon sioḷ i Tuang mita. Koḻigai bá mogogaipa kon siungon in kayu tanaa sinbá moinggamápa in ḷopí.

⁵Bain oḷudanku in kaanon tongáka naonda, sinbá tai Tuang in moropotdon bui bo buidon mongingguput kon bobayáan. Mobaḻí tobatú kahoromatan kon inakó aka tai tuang moibogpa mongandup kon baḷoi in bobantungmu naa.” Tubag monia, “Sukur moantó kon oaidmu inta mopia tua. Mongandupdon in kami.”

⁶Ki Abraham iḻimikat sinumuot kon ḷoḷaigannea bo noguman kon i Sara, “Koḷamemetdon bo pogamá kon topong tokarong inta totok in nopira, bo pogaidaipa kon roti inta noḻimbung.”

⁷Onda intua sia noribatuk nopobayá in paanan bobiagonnea, bo nomiḻí kon ki adí in sapi inta noḷongó bo tapúnea norugápa, bodongka inogoinea kon bobantungnea sin dungúon pongaanan monia.

⁸Onda intua ki Abraham nogamá kon susu inta muna, bo ponoyá inta ain dinungú tua, bodongka inoḷud kon mokokiangoinea mita tatua. Koyogot in mosia mongaan, ki Abrahamdon tontaní in nogoḷud kon i monia kon siungon in pangkoi kayu tatua.

⁹Onda intua mosia in noḻibó, “Kon onda in ki Sara, ki buḷoimu?” “Tua in sia, kon bonu in ḷoḷaigan,” tubag i Abraham.

¹⁰Tobatú inta kon sigad nayatoḷu tua in noguman, “Siowpa nobuḷan[32] Akuoi in momangoi bui. Bo kon dodai intua ki Sara ki buḷoimu in kogadídon kon adí ḷoḷaki.” Kon dodai intua ki Sara nokidongog mako nongkon ḷoḻingkop in ḷoḷaigan, inta kon tumimai in mokokiangoi mita tatua.

¹¹Tungkuḷ intua ki Abraham bo ki Sara nogoguyangdon totok, ki Sara in diádon angoionmai muḷoi in buḷan.

¹²Tuamai ki Sara in kinumosing kon bonu in ginanea bo noguman, “Akuoi naa ain nogoguyang bo noḷaotdon nanaa, yo umpaka mosiugpa doman moyotakin i buḷoiku? Apapa doman ki buḷoiku nogoguyang domandon.”

¹³Bo ki TUHAN noḻibó kon i Abraham, “Nongonu sin ki Sara in kumosingbí bo diá mopirisaya kon sia in mopononggadípabí in adí kon dodai in sia nogoguyangdon?

¹⁴Eta oyúon in diá komampuan i TUHAN aidan? Ná inta pinoguman-Ku koina, siowpa nobuḷan Akuoi in mobui mangoi kon naa. Bo kon dodai intua ki Sara in mopononggadídon in adí ḷoḷaki.”

¹⁵Pinopisí in moondok, dá ki Sara in nomayow, kainia, “Akuoi in diábí kinumosing.” Táe ki TUHAN notubag, “Iko in kinumosingdon in koina.”

¹⁶Nopaḷut mako kon tua nobuatdon in mokokiangoi taya toḷu tatua inatod i Abraham. Bo nodapotdon in mosia kon tampat tobatú inta bobuion mako in Sodom.

¹⁷Ki TUHAN nosingog kon bonu in gina, “Diábí bunion-Ku kon i Abraham onu in pomiaan-Ku.

¹⁸Diá bo diá buínea in mobaḻíbí bangusa inta moḷoben bo mongawasa? Sin pongin inia, bayongan in bangusa kon dunia naa in barakatan-Ku?[33]

¹⁹Sia ain piniḻí-Ku sinbá motundú kon i adínea mita bo kon buínea sinbá motoindudui kon i-Nakó bo mogaid kon onu inta mopia bo moadil. Aka soaḷ tatua aidan monia, yo bayongan in dandi-Ku kon i Abraham in intompodan-Ku.”

²⁰Nopaḷut mako kon tua ki TUHAN noguman kon i Abraham, “Nobarong in pinoyaput in soaḷ mokobogat kon Sodom bo Gomora, bo totuu kon dosa monia tua totok moḷoben.

²¹Tuamai Akuoi in mayá intua sin moindoi mongo totuu ande diá in bayongan inta pinonapud monia inta kinodongogan-Ku tua.”

²²Bo taya dua inta kon sigad in intau mita tatua minayá ná Sodom, táe ki TUHAN in umuranpa kotaki-takin i Abraham.

²³Ki Abraham in dinimiug kon i TUHAN bo noḻibó, “TUHAN, totuu degá kon yopúonmu in intau mita inta diá kotaḷá takin intau mita inta kotaḷá?

²⁴Aka kuma bo oyúonpa in ḻima nopuḷú in intau inta diá kotaḷá kon bonu in kotá tatua, yo degá bayongan kotá tatua in yopúon doman mita i TUHAN? Yo umpaka dá diádon ampungan i TUHAN in kotá tatua sinbá intau taya ḻima nopuḷú tua in mosaḷamat?

²⁵Donaaidon intau mita inta diá kotaḷá tua poyoyanúon ḻimodon takin intau mita inta kotaḷá. Donaai kaasí TUHAN! Sin aka aidan i TUHAN intua, yo intau inta diá kotaḷá tua in pasti hukumon doman moyotakin in intau mita inta kotaḷá. Umpaka hakim in dunia naa mogaid kon inta diá moadil!”

²⁶Ki TUHAN in noguman, “Aka kuma bo kouḻían-Kupa kon ḻima nopuḷú in intau inta diá kotaḷá kon Sodom, yo ampungan-Kubí komintan in kotá tatua sin popisí in mosia tua.”

²⁷Ki Abraham in bui noguman, “Ampungaidon akuoi TUHAN, sin akuoi ain noiḷaut nongingguput kon tosingogon-Mu tanaa. Akuoi naa in tongábí intau inta nongkon ḷobud, inta diábí in hak mopoyaput in tosingogon onuka.

²⁸Aka kuma bo tongádon opat nopuḷú boḻima, deemandon ḻima nopuḷú in intau inta diá kotaḷá, yo degá yopúonpa doman i TUHAN in bayongan kotá tatua tongá pinopisí in kinogaatan intau taya ḻima tatua?” Ki TUHAN in noguman, “Kotá tatua in diábí yopúon-Ku aka kuma kouḻían-Kupa kon opat nopuḷú boḻima in intau inta diá kotaḷá.”

²⁹Ki Abraham in buipa doman noguman, “Yo naonda aka dongkadon opat nopuḷú intau?” Ki TUHAN notubag, “Diábí yopúon-Ku sin mociapa opat nopuḷú tua.”

³⁰Ki Abraham in noguman, “Donaai tumorú, TUHANku, aka akuoi buipa doman mosingog. Yo naonda aka kuma dongkadon toḷu nopuḷú in intau?” Ki TUHAN in noguman, “Aka toḷupa nopuḷú intau mouḻí-Ku, yo tagúon-Kupabí in niat-Ku.”

³¹Ki Abraham in noguman, “Ampungaidon in akuoi inta moiḻiudon in barani mongingguput kon tosingogon tanaa, TUHAN. Aka kuma bo dongkadon doyowa nopuḷú in intau?” Ki TUHAN in notubag, “Aka doyowapa nopuḷú in intau mouḻí-Ku, yo kotá tatua in diábí yopúon-Ku.”

³²Pangabisannea ki Abraham in noguman, “Donaaidon tumorú, TUHAN, dongkadon komintan akuoi in mosingog. Yo naonda aka dongkadon mopuḷú in intau?” Ki TUHAN in noguman, “Aka mopuḷúpa doman in intau diá kotaḷá, yo diábí yopúon-Ku in kotá tatua.”

³³Naonda in nopaḷut nongonguman takin i Abraham, ki TUHAN minayá, bo ki Abraham nobuidon kon baḷoinea.