Read Mongondow KINOBAḺIAN 19 Bible Online

KINOBAḺIAN 19 - Mongondow bible

KINOBAḺIAN 19

¹Naonda in nongkon i Abraham, malaekat doyowa tatua minayá in Sodom bo noyaput kon tua ain nodoḷomdon. Ki Lot ḻimitú mako kon ngara in kotá, bo naonda in nokoontong kon i monia, sinimindog in sia sin monontomu kon i monia. Bo dinumokódon in sia kon tayowon monia,

²bo noguman, “Tuang mita, akuoi in mopoigum kon bá mongandupa kon baḷoiku. Tai Tuang in motaau in mondaritdon kon sioḷ bo mogogaipa in doḷom naa kon baḷoiku, bain ikoḷom doḷo-doḷom bo mongingguput kon bobayáan.” Táe mosia in notubag, “Sukur moantó, kami in mogogaidon kon lapangan in kotá”.

³Ki Lot in nopoigum totok, dá aher mako mosia in sinumuotdon noyotakin kon baḷoi Lot. Ki Lot in nogoḷudon kon kaanon inta totok in mopia in nanamnea bo nomia doman kon roti inta tugat kinaan monia, bo nongaandon in mosia.

⁴Táe kon wakutu in mokokiangoi mita tatua mayádon mosiug, intau mita in Sodom namangoi nonubu kon baḷoi tatua. Bayongan in intau ḷoḷaki kon kotá tatua, pinomayá inta ain nogurang ande inta batáneapa, namangoibí komintan kon tua in mosia.

⁵Mosia in nokuuk kon i Lot, bo poḷat noḻibó, “Kon onda in intau mita inta namangoi mosiug kon baḷoimu? Diadon poḷuai mangoi in mosia nion, bá aidanmai nami!”

⁶Ki Lot iḻumuai nongkon baḷoinea, táe baḷoi in buineadon iḻingkopan.

⁷Ki Lot in noguman kon intau mita in Sodom tatua, “Utat mita, poigumonku totok kon i monimu, donaaidon momia kon inta moraat ná tatua!

⁸Ain kinotaauan monimu, kon akuoi in kogadí kon mongodeaga doyowa. Bain ogoiku in mosia kon i monimu bo aidaidon onu in kinoibog monimu aidan, táe poigumonku kon i monimu donaai rupa-rupaan monimu in mokokiangoi mita inta kon baḷoiku naa; sin hakkubí in moḷukad kon i monia.”

⁹Táe intau mita in Sodom tatua in noguman kon i Lot, “Pomamping! Iko nion tongá mokokiangoi bo mogator kon i nami? Bayá intua! Aka diá, yo iko in bouton nami totok poḻiuon kon inayadua tua.” Bo inundudon monia in ki Lot bo poḷat binayá dinangatan monia in ḷoḻingkop.

¹⁰Táe mokokiangoi doyowa tatua nopoḷuai in ḻima monia bo poḷat norambit kon i Lot bo pinotuot kon baḷoi, bodongka bui iḻingkopan in baḷoi.

¹¹Intau mita inta kon ḷuai in baḷoi tatua binilogan monia komintan, nodapot in diádon nouḻí monia ngara in baḷoi tatua.

¹²Intau doyowa tatua in noguman kon i Lot, “Aka oyúon in ki adímu ḷoḷaki, ki adímu bobay, mototaka ande ginaḷum inta nogutun kon bonu in kotá tanaa, yo diádon in mosia ḷumuai nongkon kotá tanaa,

¹³sin kotá tanaa in pagongondon nami. Ki TUHAN ain nokodongog kon onu mita inta pinonapud kon intau mita inta nogutun kon naa, bo kami ain pinotabá-Nea mangoi sin moyompat kon kotá in Sodom.”

¹⁴Bo minayádon in ki Lot nokipodungkuḷ kon tayowmobiag doyowa inta nongantangdon kon i adínea doyowa, bo poḷat noguman, “Koḻikatdon ḷuai nongkon kotá tanaa, sin yompatondon i TUHAN.” Táe kai monia kamai tongábí mobobaḻitumbuyan in ki Lot.

¹⁵Kon dodai in modiugdon mobayag, malaekat doyowa tatua totokdon in nondodak kon i Lot sinbá mobuatdon nongkon kotá tatua. “Koḻikatdon,” guman monia. “Bayádon nongkon naa takin ki buḷoimu bo ki adímu bobay doyowa, sinbá moiko in diá matoi aka kotá tanaa yompatondon.”

¹⁶Mogagawang totok in ki Lot. Táe ki TUHAN in motabi kon inia; tuamai intau mokokiangoi doyowa tatua in nokapit kon i Lot takin ki buḷoinea bo ki adínea bobay doyowa tatua iḻumuai in kotá.

¹⁷Naonda intua tobatú nongkon malaekat tatua in noguman, “Poḷaguidon, posaḷamatdon in nyawamu! Donaai mobobui kon tumi bo donaai mogogai kon ḷopá. Poḷaguidon bayá in buḷud, sinbá diá matoi in moiko!”

¹⁸Táe ki Lot in notubag, “Kaasí ah, Tuang dikadon pokiḷaguian in kami mayá in buḷud.

¹⁹Totuubí kon ki Tuang aindon totok notuḷung kon inakó bo noposaḷamat kon nyawaku. Táe buḷud tatua totuu moyayú; moondok in akuoi, dika-dikabo kobatukan in bodito tatua in akuoi bo matoi kon dodai in diápa moyaput in tampat tatua.

²⁰Indoiai, kon tayowon tatua oyúon in kotá mointok inta diá totok noyayú. Potabádon in akuoi mayá intua sinbá mosaḷamat.”

²¹Malaekat tatua in notubag, “Duduyanku in ibogmu, kotá mointok tatua in diábí yompaton.

²²Koḻikat, poḷaguidon! Sin diápabí akuoi momia kon onuka aka iko diápa moyaput kon tampat tatua.” Popisí in ki Lot nonangoi kon kotá mointok tatua, dá tuamai kotá tatua sinangoian Zoar.[34]

²³Mata in singgai koyogotdon momuká tungkuḷ in ki Lot nodapotdon kon Zoar.

²⁴Indoianmai daḻídon in ki TUHAN nopoonag in uyan balerang inta kodoko-dokot. Tua mita in noḷabú kon Sodom bo Gomora.

²⁵Kotá doyowa tatua pinokak, ná doman tua in bayongan ḷopá bo bayongan mobobiag takin bayongan intau inta nogutun kon tua.

²⁶Táe ki buḷoi Lot in nobobuibí ná tumi, dá sia in nobaḷui nobaḻí oigi simuton.

²⁷Nopoikoḷomai kon singgai, doḷo-doḷompa, ki Abraham iḻimikat minayá in tampat inta sinindogannea kon tayowon i TUHAN koḷabung kon tungkuḷ in diápa nobaḻí intua.

²⁸Sia in nobobui kon dotá in Sodom bo Gomora bo kon ḷopá mita, bo inontongnea in poyok in tuḷú inta nosipun nongkon butá tatua, naonda bo poyok nongkon doḷuong moḷoben.

²⁹Natuata, tungkuḷ in ki Allah nomokak kon kotá mita tatua bo ḷopá inta pinogutunan i Lot, kinotoropan i Allah in ki Abraham bo sinuḷungan-Nea in ki Lot noḷagui.

³⁰Pinopisí in ki Lot moondok in mogutun motantú kon Zoar, dá minayádon ná buḷud in sia takin ki adínea bobay doyowa tua, bo nogutun kon tua kon bonu in tobatú angob.

³¹Ki adínea bobay inta guya-guyang noguman kon i ai-ainea, “Ki amá aindon nogurang, bo bayongan ḻipú[35] tanaa diádon in ḷoḷaki inta motaau motonibuḷoi naton sinbá kita mokouḻípa kon adí.

³²Koḻigai bá poinumon naton in anggur ki amá dapot in moḷoḷangu, bodongka kita mosiug takinnea sinbá kita mokouḻípa kon adí.”

³³Kon doḷom tua pinoinum monia in anggur in ki amá monia, bo adí guya-guyang in nosiug takin i amánea; táe ki amánea totokdon in noḷoḷangu nodapot in diádon kinotaauannea onu in nobaḻí doḷom tua.

³⁴Nopoikoḷomai kon singgai, ki adínea guya-guyang noguman kon i ai-ainea, “Kogobíi akuoi ain nosiug takin i amá! Bain doḷom bo poinumon bui naton in ki amá dapot in moḷoḷangu bui. Bodongka iko mosiug takinnea. Bá kitada in tumpaḷadon mokouḻí kon adí.”

³⁵Natuata in pinomia monia kon i Lot, pinoinum monia dapot in noḷoḷangu, bo ki adínea induanea in nosiug takinnea. Ki Lot noḷoḷangu totok dapot in diá kinotaauannea onu in nobaḻí.

³⁶Bo sidiadon in ki adí i Lot doyowa tatua sin oaid i amá monia tontaní.

³⁷Adí guya-guyang nopononggadí in adí ḷoḷaki inta sinangoiannea ki Moab.[36] Sia in nobaḻí mogoguyang intau in Moab inta masai naa.

³⁸Adí induanea nopononggadí doman in adí ḷoḷaki inta sinangoiannea ki Ben-Ami.[37] Sia in nobaḻí mogoguyang in bangusa Amon inta masai naa.