Read Mongondow KINOBAḺIAN 20 Bible Online

KINOBAḺIAN 20 - Mongondow bible

KINOBAḺIAN 20

¹Ki Abraham nomamping nongkon Mamre minayá kon dotá in toḷatan butá in Kanaan, bo nogutun kon sigad in Kades bo Syur. Diá noonggot noiduduimai kon tua, naonda in sia nogutun kon Gerar,

²sia in noguman kon ki Sara ki buḷoinea tua in ki ai-ainea. Tuamai ki Datu Abimelek inta nongkon Gerar nopotabá in totabánea sin modia mangoi kon i Sara poangoi kon inia.

³Kon doḷom tobatú ki Allah nokipogontong kon i datu tatua kon bonu in togoindop, bo noguman, “Iko in matoi, popisí in ginamámudon in bobay tatua; sin sia ain bidon kobuḷoi.”

⁴Táe ki Abimelek in diápabí noḻiai kon i Sara, dá datu tatua in noguman, “Tuhan, akuoi in diábí kotaḷá! Yo degá yopúondon i Tuhan in akuoi bo bangusaku?

⁵Ki Abrahambí tontaní in noguman kon bobay tatua in ki ai-ainea, bo bobay tatua in noguman doman natua. Tua in pinomiakubí takin gina inta modarit, dá diábí in akuoi kotaḷá.”

⁶Dá ki Allah in notubag kon bonu in togoindop tatua, “Totuu, kinotaauan-Kubí kon soaḷ tatua in inaidanmubí takin gina modarit. Tuamai Akuoi in nogimaḷowdon kon inimu bá diá momia kon dosa kon i-Nakó, bo diábí pomayá-Ku mako iko in moḻiai kon bobay tatua.

⁷Táe tanaa, pobuidon in sia kon i buḷoinea. Ki buḷoinea in tobatúbí nabi, bo sambayangannea in iko sinbá diá matoi. Táe aka diá pobuimu in sia, yo pokotaaudon, iko bo bayongan rayatmu in matoi!”

⁸Nobangon monik, doḷo-doḷom, ki Abimelek nogoiní kon bayongan pogawainea bo nopotaau kon i monia in bayongan inta nobaḻí tatua. Mosia komintan inangoian in ondok.

⁹Nopaḷut mako kon tua ki Abimelek nogoiní kon i Abraham bo noḻibó “Onu inta ain pinomiamu kon inami? Onu in taḷáku kon inimu, dapot in pinopoangoimudon inta mokobodito kon inakó bo kon dodatuan ku? Totuu kon diábí patus iko in momia kon natua kon inakó.

¹⁰Nongonu sin iko momiabí natua?”

¹¹Ki Abraham in notubag, “Kon bonu in raianku, kon naa in diádon in intau inta motoguondok kon i Allah, dapot in akuoi patoiondon in intau inta moibog kon i buḷoiku.

¹²Bo totuubí kon sia tua in ki ai-aikubí. Kami in toamáan, táe noyoposi kon iná, bo kami in notonibuḷoi.

¹³Dá tungkuḷ in ki Allah nopotabá kon inakó nonaḷámai kon baḷoi i amáku bo minaya-mayá mako kon butá mita inta diá kinotaauanku, akuoi in nogumandon kon i buḷoiku, ‘Poniatadon in kotoinduduimu kon inakó takin mopotaau kon bayongan intau kon akuoi naa in ki guya-guyangmubí.’ ”

¹⁴Nopaḷut mako kon tua ki Abimelek nogatodon bui kon i Sara kon i Abraham, bo kon dodai intua sia in nobogoi doman in bobantungnea takin domba bo sapi mita.

¹⁵Guman i datu tatua kon i Abraham, “Naadon in bayongan butáku; pogutundon kon ondaka in kinoibogmu.”

¹⁶Bo sia in noguman kon i Sara, “Ki Guya-guyangmu inogoiankudon in doit saḷaka toribu inta mobaḻí bukti kon bayongan intau kon iko in totu-totuubí diá kotaḷá.”

¹⁷Binaḻí komintan i TUHAN bantó in bayongan bobay kon komaḻig i Abimelek pinopisí inta nobaḻí tatua kon i Sara, ki buḷoi i Abraham tatua. Bo ki Abraham in nosambayang kon i Allah, bo ki Allah nongundam bui kon i Abimelek, ki buḷoinea bo bobantungnea mita bobay, dá bobay mita tatua buidon nononggadí.