Read Mongondow KINOBAḺIAN 21 Bible Online

KINOBAḺIAN 21 - Mongondow bible

KINOBAḺIAN 21

¹Ki TUHAN nomarakat kon i Sara, ná inta ain pinodandi-Nea.

²Kon wakutu inta ain sinantú i Allah, kon dodai in ki Abraham ain nogoguyang, ki Sara in sidiadon bo nopononggadí in adí ḷoḷaki tobatú.

³Ki Abraham nonangoi kon adí tatua ki Ishak;

⁴bo naonda in ki Ishak umurdon waḷu nosinggai, sinoit i Abraham in adí tatua, podudui in parenta i Allah.

⁵Ki Abraham umurdon mogatut notaong tungkuḷ in ki Ishak pinononggadí.

⁶Ki Sara in nosingog, “Binaḻídon i Allah in akuoi kinumosing[38] sin moḷunganga in gina. Pomuḷoi intau inta mokodongog kon soaḷ tanaa in kumosing sin moḷunganga in gina ná koḷunganga in ginaku.”

⁷Sia noguman doman, “Ki ine in koḻipod noguman kon i buḷoiku kon akuoi in diábí mopoteté in adí? Táe akuoi in nononggadípabí doman umpaka ki buḷoiku ain nogoguyang totok.”

⁸Adí tatua in koḷoben-koḷobendon, bo kon singgai in sia ungkakondon kon teté, ki Abraham in nomia kon bobutungan moḷoben.

⁹Kon singgai tobatú, ki Ismael, ki adí i Abraham bo ki Hagar, bobay in Mesir tua, koyogot moyambámai takin[39] i Ishak, ki adí i Sara.[40]

¹⁰Soaḷ tatua inontong i Sara bo binayánea pinotaau kon i Abraham, “Untundon in bobantung bobay tatua takin ki adínea, sin diábí motaau ki adí in bobay tatua mogabat kon kapunyaanmu inta ogoi mobaḻí silai i Ishak ki adíku.”

¹¹Diábí nosanang gina i Abraham nokodongog kon singog tatua, sin ki Ismael ki adíneabí doman.

¹²Táe ki Allah in noguman kon i Abraham, “Donaaidon iko mohawatir kon bobantungmu ki Hagar bo ki adínea tatua. Duduiaidon in ibog i Sara, sin pongin i Ishakbí tuata iko in mokouḻí kon buí inta pinodandi-Ku tua.

¹³Ná doman tua ki adí i Hagar in ogoian-Kubí in adí bo ompu sinbá mosia mobaḻí doman bangusa tobatú inta moḷoben. Sin sia in ki adímu doman.”

¹⁴Nobangon monik doḷo-doḷom, ki Abraham nobogoi in kaanon bo botutu kuḻit binonuan in tubig sin baḷun monia kon daḷan. Pinopobabaneadon kon i Hagar in adí tatua, bodongka pinotabánea minayá in bobay tatua. Ki Hagar in nobuatdon bo minayá nongin padang gurun Bersyeba.

¹⁵Naonda in tubig inta kodia-dianea nodait, inukatdon i Hagar in adí tatua kon tampat inta nooḻiung,

¹⁶bodongka minayá iḻimitú iyumayú degá mogatutmai nometer nongkon tampat tatua. Kon bonu in raiannea, “Akuoi in diábí mokotahang in mokoontong kon i adíku matoi.” Bo nongombaḷdon in sia.[41]

¹⁷Ki Allah in nokodongog kon ombaḷ i Ismael, bo malaekat i Allah in noguman kon i Hagar nongkon ḷangit, kainia, “Onu in mokorobonoḷ kon dodobmu, Hagar? Dikadon moondok. Dinongogdon i Allah in ombaḷ i adímu.

¹⁸Bayádon kon diug i adímu, buatdon bo dondouḷugaidon in sia. Baḻíon-Ku in buínea bangusa tobatú inta moḷoben.”

¹⁹Bo binaḻí i Allah notarang mata i Hagar, nodapot in sia nokoontongdon kon parigí tobatú. Dá minayádon in sia bo nomonu in tubig kon botutu kuḻit tatua, onda intua pinoinumneadon in adí tatua.

²⁰Ki Ismael sinakinan i Allah. Adí tatua koḷoben-koḷobendon; sia in nogutun kon padang gurun Paran, bo nobaḻí momomiot inta motoyang.

²¹Sia in pinopobuḷoi i inánea takin bobay in Mesir.

²²Kon dodai intua ki Datu Abimelek bo ki Pikhol, panglima in tontaranea, namangoi kon i Abraham bo noguman, “Ki Allah ain notuḷung kon inimu kon bayongan in yagi-yagi inta inaidanmu.

²³Tuamai, pongibotdon kon naa kon tayowon i Allah, kon iko in diábí monombogá kon inakó, ande kon i adíku mita, ande kon buíku. Ná doman akuoi aindon nomia kon inta mopia kon inimu, dá aidai domandon in natua kon inakó bo kon butá inta pinogutunanku tanaa.”

²⁴Ki Abraham in noguman, “Akuoi in mongibot.”

²⁵Táe nopaḷut mako kon tua oyúon in nokomanasaḷ kon i Abraham soaḷ ki Abimelek popisí in parigí tobatú inta ain inagow in bobantung mita i datu tatua.

²⁶Ki Abimelek in noguman, “Diábí kinotaauanku mongo ki ine in nogaid kon soaḷ tatua. Diápabí dodai onda iko noguman, bo naadon in kon dungkuḷ totok akuoi nokodongog kon soaḷ tatua.”

²⁷Bo ki Abraham nobogoi in tongonumai in domba bo sapi kon i Abimelek, bo taya dua in nomiadon kon dodandian.

²⁸Ki Abraham nopotondí kon ki adí in domba pitu nongkon paanan in dombanea,

²⁹bo ki Abimelek noḻibó kon inia, “Nongonu sin aidanmubí in soaḷ tatua?”

³⁰Ki Abraham in notubag, “Tarimadon in ki adí in domba pitu tanaa mobaḻí tanda kon ki Tuang in nongakudon kon akuoibí in nongaḻi kon parigí tanaa.”

³¹Tuamai tampat tatua in sinangoian intau Bersyeba, [42] sin kon tuata taya dua nongongibotan.

³²Naonda in mosia nomia kon dodandian kon Bersyeba, ki Abimelek bo ki Pikhol in nobuidon kon butá intau in Pilistin.

³³Bo ki Abraham nopomuḷa in pangkoi in kayu tamariska kon Bersyeba bo nongkon dodaidon tatua tampat tatua pinakénea mosumba kon i TUHAN, Allah inta mononoi.

³⁴Onda intua ki Abraham nogutunpa noḻin onggot kon butá intau in Pilistin.