Read Mongondow KINOBAḺIAN 23 Bible Online

KINOBAḺIAN 23 - Mongondow bible

KINOBAḺIAN 23

¹Naonda in ki Sara umurdon mogatut bo doyowa nopuḷú notaong,

²sia in minatoi kon Hebron kon butá in Kanaan. Norobonoḷ totok in gina i Abraham kinopatoian i buḷoinea tua, sia in nongombaḷ.

³Nopaḷut mako kon tua ki Abraham nonaḷámai kon mayat i buḷoinea bo minayá kon intau mita in Het, inta nogutun kon butá kon tua. Sia in noguman,

⁴“Akuoi naa in intau mokokiangoi inta nogutun kon yua-yuak i Utat mita; dá ogoipa in akuoi motaḷui kon butá sinbá oyúon in poḷobonganku kon i buḷoiku.”

⁵Mosia notubag,

⁶“Ki Tuang horomaton totok nami saḷaku itoi inta moropot kon sigad nami, dá ḷobongdon ki buḷoi Tuang kon poḷoḷobongan inta totok in mopira inta oyúon kon inami. Komintanbí nosanang in gina nami noposadia in poḷoḷobongan tatua kon i buḷoi Tuang.”

⁷Onda intua sinumungkudon in ki Abraham kon tayowon monia,

⁸bo noguman, “Aka tai Utat mita bo mosanangbí in gina dá akuoi moḷobongdon kon i buḷoiku kon naa, dá tuḷungaipa in akuoi poigumai kon i Epron, ki adí ḷoḷaki i Zohar,

⁹sinbá ogoineadon taḷuionku in Angob in Makhpela inta noiukat kon bingkí in gobánea. Poigumdon bá potaḷuineadon tua kon inakó kon naa takin koonto-ontong i Utat mita. Boḻinea daitonkubí ogoi kotompodon, sinbá butá tatua in mobaḻídon kapunyaanku.”

¹⁰Kon dodai intua ki Epron ḻimitú doman mako takin intau mita in Het kon pinoyodungkuḷan kon ngara moḷoben in kotá. Bo takin koonto-ontong in bayongan intau kon tua, sia in notubag,

¹¹“Bangusakudon tontaní in nobaḻí sakusi kon gobá tatua takin angobnea in ogoiku sinbá ki Tuang motaau moḷobong kon i buḷoi Tuang kon tua.”

¹²Dá ki Abraham in sinumungkudon kon tayowon intau mita in Het tatua,

¹³bo takin kodongo-dongog in bayongan intau, sia in noguman kon i Epron, “Akuoi in mopoigum, indongogaipa in akuoi. Akuoi in moibog motaḷui kon bayongan in gobá tatua. Tarimadon in doit tanaa, sinbá akuoi in moḷobongdon kon i buḷoiku kon tua.”

¹⁴Ki Epron in notubag,

¹⁵“Butá inta boḻinea tongá opat nogatut doit saḷaka--onubí in mangaḻenea intua kon i natonda? Ḷobongdon ki buḷoi tuang kon tua.”

¹⁶Noibog in ki Abraham kon boḻi inta sinantúnea tatua. Sia in nogiapdon kon doit saḷaka inta pinoguman i Epron inta opat nogatut tatua, podudui in pogogiapan in intau mita mopopotaḷui. Bo inuboḻianneadon kon i Epron, takin koonto-ontong in bayongan intau in Het kon tua.

¹⁷Natuata in ouman gobá i Epron inta kon Makhpela kon dotá in pomukaan kon Mamre, nobaḻí kapunyaan i Abraham. Butá tatua in gobá bo angobnea takin bayongan kayu inta ibanea nobaḻí sigadnea mita.

¹⁸Butá tatua ináku in bayongan intau in Het inta oyúon kon pinoyodungkuḷan kon ngara moḷoben in kotá, kon tua in butádon i Abraham.

¹⁹Nopaḷut mako kon tua ki Abraham noḷobongdon kon i Sara ki buḷoinea kon bonu in angob Makhpela kon butá in Kanaan.

²⁰Natuata in gobá takin angobnea inta koina kapunyaan intau in Het, nobaḻídon kapunyaan i Abraham inta binaḻídon butá poḷoḷobongan.