Read Mongondow KINOBAḺIAN 26 Bible Online

KINOBAḺIAN 26 - Mongondow bible

KINOBAḺIAN 26

¹Kon butá tatua nomukádon bui in malarat ná inta nokoimontandon in nobaḻí kon dodai i Abraham. Ki Ishak in minayá kon tayowon i Abimelek, datu intau in Pilistin kon Gerar bo nopoigum sinbá ogoinea mogutun kon tua.

²Soaḷ tatua inaidannea sin ki TUHAN aindon nokipogontong kon inia bo noguman, “Dika mayá in Mesir; pogutundon kon butá tanaa, ná inta ain pinoguman-Ku kon inimu.

³Akuoi in moḷukadbí bo momarakat kon inimu. Komintan butá tanaa in ogoi-Kubí kon inimu bo kon buímu. Intompodan-Kubí in dandi-Ku inta ain pinoguman-Ku kon i Abraham ki amámu.

⁴Akuoi in mobogoibí kon inimu in adí bo ompu inta kobayongnea in naonda bo tundi kon ḷangit, bo butá mita kon naa daiton-Kubí ogoi kon i monia. Bayongan in bangusa kon dunia naa in mopoigumbí kon i-Nakó sinbá Akuoi momarakat kon i monia naonda Akuoi ain nomarakat kon buímu.

⁵Akuoi in momarakatbí kon i monimu, sin ki Abraham ain dinumudui totu-totuu kon i-Nakó bo noḷukadon kon bayongan hukum bo parenta-Ku.”

⁶Dá ki Ishak in nogutundon kon Gerar.

⁷Naonda in intau mita kon tua noḻibó mongo ki ine in ki Ribka, ki Ishak noguman kon ki Ribka tua in ki ai-aineabí, deemanbí ki buḷoinea. Sin ki Ishak in moondok dika-dikabo intau mita kon tua moḻimod kon inia bo mogamá kon i Ribka inta moḷunat totok tatua.

⁸Naonda in ki Ishak nogutun kon tua degá tongonumaidon nosinggai, kon singgai tobatú ki Datu Abimelek iḷumongow nongkon jandelanea, bo inontongnea in ki Ishak nongongayokanbí takin i Ribka.

⁹Dá inoinínea in ki Ishak bo poḷat noguman, “Ki buḷoimu in bobay tatua, yo nongonu sin kainimu sia tua in ki ai-aimubí?” Tubag i Ishak, “Akuoi in norai, kon akuoi in ḻimodon aka pogumanku kon sia in ki buḷoiku.”

¹⁰“Onudon in pinomiamu naa kon inami?” guman i Abimelek. “Totuubí mogampa-gampang in intauku tobatú mayá mosiug moyotakin i buḷoimu, bo aka tua in mobaḻí, yo ikodon in motanggung jawab kon taḷá nami tatua.”

¹¹Bo ki Abimelek in nobogoidon in tompoingat kon bayongan in rayatnea nanaa, “Ki ine in moporupa-rupamai kon intau tanaa ande kon i buḷoinea, yo hukumonbí kopatoion.”

¹²Ki Ishak nonompinomuḷa kon butá tatua, bo taong tatua sia in nokouḻí kon bungai in boyó mogatut noguntuḷ nongkon onu inta pinomuḷanea, sin ki TUHAN nomarakat kon inia.

¹³Kapunyaannea in kodugang-kodugangdon bo sia in nobaḻídon intau inta totok in nooyúon.

¹⁴Intau mita in Pilistin nointoidon kon inia popisí in noantódon in bobantungnea takin domba bo sapinea.

¹⁵Bo binumbunandon monia in bayongan parigí inta ain kinaḻi in bobantung mita i Abraham kon tungkuḷ in sia nobiagpa.

¹⁶Onda intua ki Abimelek in noguman kon i Ishak, “Bayádon nongkon butá nami. Ikodon in mokawa-kawasa in kami.”

¹⁷Dá ki Ishak in minayádon bo nogaid kon ḷoḷaigan kon Ḷopá in Gerar. Sia in nogutunpa kon tua.

¹⁸Sia in bui nongaḻi kon parigí mita inta ain kinaḻi kon tungkuḷ i Abraham bo inta ain binumbunan in intau mita in Pilistin naonda in ki Abraham minatoidon. Parigí mita tatua in tantúbí sinontangoian in tangoi inta pinonangoi i amánea.

¹⁹Bobantung mita i Ishak in nongaḻi kon parigí kon Ḷopá in Gerar tatua bo nokouḻí kon tubig inta totok mobarong.

²⁰Táe gombala mita kon Gerar in nobobayowan takin gombala mita i Ishak. Guman monia, “Tubig tanaa kamibí in kitogi.” Tuamai parigí tatua sinangoian i Ishak “Bobayowan”.

²¹Bobantung mita i Ishak nongaḻi bui kon parigí ibanea, dá bui doman nobaḻí in bobayowan soaḷ parigí tatua. Tuamai, parigí tatua sinangoian i Ishak “Sosaturuan”.

²²Onda intua sia in nomamping nongkon tua bo nongaḻi bui kon parigí intoḷunea. Aka tanaa diá bidon in bobayowan. Tuamai sinangoian i Ishak in parigí tatua “Kabebasan”. Kainia, “Tanaa ki TUHAN ain nobogoi in kabebasan kon inaton mogutun kon butá tanaa, bo kita in mobaḻídon mobiag motompia kon naa.”

²³Onda intua ki Ishak nobuat bo noiyaput kon Bersyeba.

²⁴Kon doḷom tua ki TUHAN nokipogontong kon inia bo noguman, “Akuoibí naa in ki Allah i amámu ki Abraham. Dika moondok; Akuoi in mogoḻiung kon inimu. Barakatan-Ku in iko bo ogoian-Ku iko in buí inta mobarong podudui in dandi-Ku kon bobantung-Ku ki Abraham.”

²⁵Bo ki Ishak in noposindog in mezbah bo nosumba kon i TUHAN kon tampat tatua. Sia nomia kon ḷoḷaigan kon tua bo bobantungnea mita in nongaḻi kon parigí ibanea.

²⁶Kon singgai tobatú namangoidon in ki Abimelek nongkon Gerar, takin ki Ahuzat, mononongginanea, bo ki Pikhol, panglima in tontaranea, sin mokipodungkuḷ kon i Ishak.

²⁷Dá ki Ishak in noḻibódon, “Nongonu sin moiko in namangoibí mokipodungkuḷ kon inakó in tanaa, bokaka koḻipod in sinaturu bo inuntun monimu in akuoi nongkon butá monimu?”

²⁸Tubag monia, “Tanaa in kinotaauandon nami kon ki TUHAN nogoḻiung kon inimu bo kon bonu in raian nami maníka kita mogaid kon dodandian. Pongibotdon

²⁹kon iko in diábí momia kon inta moraat kon inami, ná doman kami inta diábí dodai onda in momia kon inta moraat kon inimu. Kami in notabidon kon inimu bo nopomayádon mako kon inimu minayá takin saḷamat. Noniatadon kon inami kon ki TUHAN ain nomarakat kon inimu.”

³⁰Onda intua ki Ishak nogoḷudon kon i monia, bo nongaan bo nonginumdon in mosia.

³¹Nobangon monik doḷo-doḷom mosia in tumpaḷadon nopoyaput in tosingogon dandi monia takin itu-itum. Bo ki Ishak in nogumandon kon i monia kon mokopopiadon in kon daḷan bo noyogapídon in mosia saḷaku yobayat.

³²Kon singgai doman tatua bobantung mita i Ishak namangoi bo nopotaau kon inia soaḷ parigí inta ain kinaḻi monia. Guman monia, “Kami in nokouḻídon kon tubig.”

³³Bo ki Ishak nonangoidon kon parigí tatua “Ibot”. Tuata in kinobobaḻí muna in kotá tatua sinangoian Bersyeba. [50]

³⁴Tungkuḷ in ki Esau umurdon opat nopuḷú notaong, sia in nonika takin mongodeaga doyowa nongkon suku bangusa Het, tangoi monia ki Yudit ki adí i Beeri, bo ki Basmat ki adí i Elon.

³⁵Bobay doyowa tatua in nokoposusamai kon kobiagan i Ishak bo i Ribka.