Read Mongondow KINOBAḺIAN 27 Bible Online

KINOBAḺIAN 27 - Mongondow bible

KINOBAḺIAN 27

¹Kon singgai tobatú kon tungkuḷ in ki Ishak nogoguyangdon bo nobilog domandon, inoinínea in ki Esau, ki adínea guya-guyang, bodongka noguman kon inia, “Adíku!” “Ya, Papa,” tubag i Esau.

²Ki Ishak in noguman, “Kinotaauanmudon kon akuoi naa aindon nogoguyang bo degá diádon moonggot in kobiaganku.

³Dá gamádon in mata mita in piotmu, bo bayádon potayak kon biag mita in kayuon.

⁴Dungú kopiraan ná inta kinoibogku, bo diádon mangoi kon inakó. Bo naonda in mopaḷut mako akuoi mongaan, barakatanku in iko kon dodai in akuoi diápa matoi.”

⁵Pinongongumanan i Ishak bo i Esau tatua dinongog i Ribka. Dá naonda in ki Esau minayá notayak kon biag in kayuon,

⁶ki Ribka noguman kon i Yakub, “Baguku dinongog ki amámu in noguman kon i Esau nanaa,

⁷‘Potayakaidon in akuoi kon biag tobatú bo dungúdon kopiraan kon inakó. Naonda in mopaḷut akuoi mongaan, barakatanku in iko kon tayowon i TUHAN, kon dodai in akuoi diápa matoi.’

⁸Uḻe, adíku,” guman i Ribka bui, “indongogai bo aidaidon onu in pogumanku tanaa.

⁹Bayádon kon tampat in domba naton, bo piḻídon in ki adí in bembé doyowa inta mongoḷongó, sinbá dungúonku podudui kon ibog i amámu.

¹⁰Onda intua diádon kon inia sinbá kaanonnea, bo mopaḷut mako kon tua sia in momarakatdon kon inimu kon dodai in sia diápa matoi.”

¹¹Táe ki Yakub in noguman kon i inánea, “Iná, awak i Esau tua in bobubuḷan táe awakku in diábí bobubuḷan?

¹²Dikabo yapuon i papa in awakku bo kotaauanneadon kon akuoi nonguboḷdon kon inia; dá sia in deemanbí momarakat, táe mogodi-godibímaidon kon inakó.”

¹³Ki inánea in notubag, “Donaai moondok, Uḻe. Bain akuoi in mobaba kon bayongan kutuknea. Aidaidon onu inta pinogumanku, bayádon gamá in bembé mita tatua.”

¹⁴Dá minayádon in ki Yakub nogamá kon bembé mita tatua bo dinianea kon i inánea, bo dinungúdon i Ribka podudui kon inta kinoibog i Ishak.

¹⁵Onda intua ki Ribka nogamádon kon pakeang i Esau inta totok in mogaga, inta sinagúnea kon baḷoi, bodongka pinopopaké kon i Yakub.

¹⁶Bo kuḻit in bembé tatua pinopooḻitnea kon ḻima bo sigogow i Yakub inta diá bobubuḷan tatua.

¹⁷Bodongka inogoinea kon i Yakub in dodungúon inta totok in nopira in nanamnea tatua takin roti inta ain pinomianea.

¹⁸Nopaḷut mako tua ki Yakub in minayádon kon i amánea bo noguman, “Papa!” “Ya,” tubag i Ishak, “ki ine iko, ki Esau andeka ki Yakub?”

¹⁹Tubag i Yakub, “Ki Esau, ki adí i papa inta guya-guyang; koyow i papa aindon inaidanku. Ḻitúdon bo kaandon in ponoyá inta noaḷapku bo diniakudon tanaa, sinbá ki papa motaaudon momarakat kon inakó.”

²⁰Ki Ishak noguman, “Totokbí in notoyong kinouḻíanmu, Uḻe.” Tubag i Yakub, “Sin makoan doman ki TUHAN Allah inta sinumba i papa aindon notuḷung kon inakó.”

²¹Bo ki Ishak in noguman kon i Yakub, “Koḻigai kodiug magí sinbá motaauku kokapon. Bo kotaauankudon kon iko in ki Esau ki adíku ande deeman?”

²²Ki Yakub in dinimiug kon i amánea, bo iyapudon i amánea in sia poḷat noguman, “Singogmu naonda bo singog i Yakub, táe kokaḷmu naonda bo kokaḷ i Esau.”

²³Diádon kinotaauan i Ishak in ki Yakub sin kokaḷnea bobubuḷan doman ná kokaḷ i Esau. Táe kon dodai in ki Yakub barakatanneadon,

²⁴sia komintanpa doman bui noḻibó, “Totuu kon ki Esau in iko nion?” “Totuu,” tubag i Yakub.

²⁵Bo ki Ishak nogumandon, “Ogoidon magí kon inakó in ponoyá tanion. Bain mopaḷut mako in akuoi mongaan bo barakatanku iko.” Inogoidon i Yakub in ponoyá tatua kon inia bo inogoiannea doman in anggur topiḻik inumonnea.

²⁶Bo ki amánea in noguman kon inia, “Koḻigai kodiugpa totok kon inakó, Uḻe, bo ayokaidon in akuoi.”

²⁷Naonda in ki Yakub dinimiug sin mongayok kon inia, kinobóan i Yakub in pakeang i Esau, dá binarakatanneadon in ki Yakub. Guman i Ishak, “Bó mobondu i adíku naonda bó in tampat inta binarakatan i TUHAN.

²⁸Igumon mako iko ogoian i Allah in topuot nongkon ḷangit, bo baḻíonnea in gobámu mita motoḷubú! Poigumon mako Sia in mobogoi kon inimu in gandum bo anggur inta mobarong totok!

²⁹Poigumon mako bangusa mita in mobaḻí bobantungmu, bo suku mita in bangusa tumungkud kon tayowonmu. Poigumon mako iko in mongawasa kon bayongan ginaḷum motoḷuadímu, bo buí i inámu in tumungkud kon tayowonmu. Poigumon mako katuḷaan in intau mita inta mogodi-godimai kon inimu bo barakatan in intau mita inta momarakat kon inimu.”

³⁰Naonda in ki Ishak bagu nopaḷut nomarakat kon i Yakub bo ki Yakub iḻumuai domandon, indoianmai ki Esau, ki guya-guyangnea, nobuidon nongkon tampat pinotayakannea kon biag in kayuon.

³¹Sia nodungú doman kon ponoyá inta kinopira totok in nanamnea bodongka dinianea kon i amánea takin noguman, “Ḻitúdon, papa bo kaandon in ponoyá inta diniaku naa kon i papa, sinbá ki papa in momarakatdon kon inakó”.

³²“Ki ine in iko?” ki Ishak noḻibó. “Ki Esau ki adí i papa inta guya-guyang,” tubagnea.

³³Noitaḻikokogdon totok in ki Ishak bo poḷat noḻibó, “Aka natua, dá ki inebí inta minayá notayak kon biag in kayuon tatua bo dinianea kon inakó koina? Ain kinaanku kon dodai in iko diápa noiangoi. Bo ain nomarakat kon inia, bo tanaa barakat tatua ain nobaḻí kapunyaannea inta mononoi.”

³⁴Naonda in nokodongog kon natua, ki Esau totok in nongombaḷ bo norobonoḷdon totok in ginanea, bo sia noguman, “Barakatai domandon in akuoi uḻe Papa!”

³⁵Ki Ishak in noguman, “Ki ai-aimu ain namangoi in naa bo nonguboḷ kon inakó. Sia ain nogamá kon barakat inta sabanarnea ogoikubí kon inimu.”

³⁶Ki Esau in noguman, “Naa induaneadon sia nonguboḷ kon inakó. Patus bo tangoinea ki Yakub.[51] Sia ain nogamá kon hakku saḷaku adí guya-guyang, bo tanaa sia ain nogamá doman kon barakat inta ogoi kon inakó. Degá diádon in barakat ibanea kon i Papa inta ogoi kon inakó?”

³⁷Ki Ishak in notubag, “Sia ain binaḻíku ki tuangmu, bo bayongan ginaḷum motoḷuadínea binaḻíkudon bobantungnea. Akuoi ain nobogoi kon inia in gandum bo anggur. Tanaa diá bidon onu bo onu in motaauku aidan kon inimu, Uḻe!”

³⁸Ki Esau doíbí mogogai in mopoigum kon i amánea, “Eta tongá tobatú in barakat kon i papa? Barakatai domandon in akuoi, Papa!” Bo buidon in sia nongombaḷ.

³⁹Onda intua ki Ishak noguman kon inia, “Diádon bui moiponag kon inimu in topuot nongkon ḷangit, diá doman in gobá inta mopia kon inimu.

⁴⁰Iko in mobiagdon nongkon pogaidanmu, táe mobaḻí bobantung i ai-aimu, táe aka iko momarontak,[52] yo iko in moipilatdon nongkon kawasanea.”

⁴¹Dá ki Esau nosaturudon kon i Yakub pinopisí in ki amánea ain nobogoi in barakatnea kon i ai-ainea tatua. Kon bonu in raiannea, “Diádon moonggot bo ki amánea in matoi bo bain mopaḷut mako kon kopatoian, ki Yakub ḻimodonku!”

⁴²Naonda in dinongog i Ribka in niat i Esau tatua, inoinínea in ki Yakub bo pinoguman, “Indongogaipa, ki guya-guyangmu ki Esau moniat motuḻí bo moḻimod kon inimu.

⁴³Dá tanaa, aidaidon onu in pogumanku kon inimu. Ḷagidon bayá kon i guya-guyangku ki Laban kon Haran,

⁴⁴bo pogutunpa kon tua moyotakinnea koḻin onggoton, modapot in torú i guya-guyangmu moinggamádon

⁴⁵bo koḻionganneadon onu inta ain inaidanmu kon inia. Onda intua akuoi mopotabádon in intau modia mangoi kon inimu kon naa. Doíbí in akuoi kobuḻian i adíku doyowa kon wakutu inta moyododai.”

⁴⁶Dá ki Ribka in nogumandon kon i Ishak, “Moyaat in ginaku bo mobú in akuoi mokoontong kon i buḷoi mita i Esau inta nongkon suku bangusa mita ibanea tatua. Aka ki Yakub motonibuḷoi doman takin bobay mita intau in Het, dá maníka akuoi in matoidon.”