Read Mongondow KINOBAḺIAN 3 Bible Online

KINOBAḺIAN 3 - Mongondow bible

KINOBAḺIAN 3

¹Uḷag naa in mahaḷuk inta totok in mopandoi monguboḷ nongkon sigad in bayongan mahaḷuk inta pinomia i TUHAN Allah. Uḷag tatua in noḻibó kon bobay tatua, “Totuu degá kon ki Allah in nogimaḷow kon i monimu mokaan kon bungai mita in pangkoi ayop kon taman tanaa?”

²“Kami in motaaubí mokaan kon bungai mita in pangkoi ayop kon bonu in taman tanaa,” tubag in bobay tatua,

³“koḻikudbí in bungai pangkoi in kayu inta kon yua-yuak in taman tanaa. Ki Allah nogimaḷow sinbá kami diá mokaan kon bungai in pangkoi kayu tatua ande moḻiai kon pangkoinea, aka aidan nami intua, yo matoi in kami.”

⁴Uḷag tatua in notubag, “Diábí totuu intua; diábí matoi in moiko.

⁵Ki Allah in noguman natua sin kinotaauan-Nea aka moiko mokaan kon bungainea tatua, yo raian monimu in mobukatdon; bo moiko motongkaidon i Allah[9] bo monotaaudon kon onu inta mopia bo onu inta moraat.”[10]

⁶Inontong in bobay tatua kon mopia in pangkoi kayu tatua, bo bungainea koontongan in mopira doman kaanon. Sia in norai kon mopiabí totok aka sia in mobaḻí mopandoi. Manangka intua sia in nosipú kon bungai in pangkoi in kayu tatua, bodongka kinaannea, bo inogoiannea doman in ki buḷoinea, bo kinaan doman i buḷoinea ḷoḷaki.

⁷Naonda in nopaḷut mako nokaan kon bungai tatua, raian monia in baḷú nobukat bo kinotaauandon monia kon mosia in nomilangbí. Tuamai mosia in nogamá kon daun mita in pangkoi kayu ara bo pinoyotomot poḷat pinogoḻingoi kon sinayowon monia.

⁸Moḷoḷabung tua dinongog monia kon ki TUHAN Allah namangoi in taman, bo nogadop in taya dua kon sigad in pangkoi in kayu mita inta kon bonu in taman tatua sinbá diá ontongon i TUHAN.

⁹Táe ki TUHAN nogoiní kon ḷoḷaki tatua, “Kon onda in iko?”

¹⁰Ḷoḷaki tatua in notubag, “Naonda in dinongogku kon ki TUHAN niondon kon taman; inagían totok in ondok in akuoi sin nomilang, tuabí manangka intua akuoi in nogadop.”

¹¹“Ki ine in noguman kon inimu kon iko in nomilang?” Iḻibó i Allah. “Degá iko in nokaandon kon bungai in kayu inta diá inogoi-Ku kaanon tua?”

¹²Ḷoḷaki tatua in notubag, “Bobay inta inogoi-Mu sin motuḷung, sia tua in nobogoi kon inakó in bungai in kayu tatua, bo kinaanku domandon.”

¹³Ki TUHAN Allah in noḻibó kon bobay tatua, “Nongonu sin inaidanmubí intua?” Tubagnea, “Akuoi inuboḷan in uḷag tatua, sahingga in kinaanku bungai in kayu tatua.”

¹⁴Nopaḷut mako kon tua ki TUHAN Allah in noguman kon uḷag tatua, “Iko in hukumon sin oaidmu tatua; kon sigad in bayongan mahaḷuk tongábí iko tontaní in musti motanggung kon kutukan tanaa: Nongkon tanaa mako iko in mayádon ḷumandai mopobayá in sianmu, bo ḷobud in mobaḻí kokaanonmu kon bonu in kobiaganmu.

¹⁵Iko bo bobay tatua in mobaḻí mososaturuan, buínea bo buímu umuran mososaturuan. Buínea in moritak kon uḷumu, bo tobakonmu in singkod monia.”

¹⁶Bo ki TUHAN in noguman kon bobay tatua, “Dugangan-Ku in rorigamu kon tungkuḷ in iko sidia bo kon dodai in iko mononggadí. Táe umpaka natua, iko in umuranbí doman mosiug moyotakin i buḷoimu, bo iko in tantúbí kon bonu in kawasanea.”

¹⁷Bo ki TUHAN in noguman kon ḷoḷaki tatua, “Iko ain nokidongog kon tosingogon i buḷoimu bo nokaan kon bungai in kayu inta diá inogoi-Ku kaanonmu. Pinopisí in oaidmu tatua, dá kinutukdon in butá. Iko in musti mokoporajing in mogaid kon bonu in kobiaganmu sinbá butá mobogoipa in boyó inta tugat pakéon monimu.

¹⁸Bonganga bo dugi mita poḷuaion in butá kon inimu, bo mobobiag mita inta tongá kino bia-biagnea in mobaḻí kokaanonmu.

¹⁹Iko totok in rumoriga in mogaid modapot in uḷatan sinbá butá mobogoi in boyó kon inimu, modapot in iko mobui mobaḻí butá, sin iko in pinomiabí nongkon butá. Iko in pinomia nongkon butá, bo bui mobaḻí butá.”

²⁰Ki Adam[11] nonontangoi kon i buḷoinea ki Hawa,[12] sin bobay tatua nobaḻí ki iná in bayongan umat intau.

²¹Dá ki TUHAN Allah in nomia kon pakeang monia nongkon kuḻit in mahaḷuk bodongka pinopopaké kon i nayadua.

²²Ki TUHAN Allah in noguman, “Tanaa intau aindon nobaḻí ná Kita bo oyúondon in pongotahuan soaḷ inta mopia bo inta moraat. Dá musti in sia popoyayú sinbá diá bui in sia mogamá bo mokaan bui kon bungai inta mobogoi in kobiagan, sinbá diá in sia mobiag mononoi.”

²³Dá ki TUHAN Allah in nopoguntun kon i monia nongkon taman Eden bo nopotabá moramuji mogaid nongkon butá inta pinomiaan kon inia tontaní.

²⁴Onda intua, kon dotá in pomukaan kon taman tatua kon tayowon ngara tumuot, sinampat i TUHAN Allah in kerub mita,[13] bo kedang tobatú modokot inta moburow monangkaḻibu magí mako, sin moḷukad kon daḷan mopobayá in pangkoi inta mobogoi in kobiagan tua. Natua inaidan i Allah dá diá tobatúmai intau in motaau tumuot bo dimiug kon pangkoi in kayu tatua.