Read Mongondow KINOBAḺIAN 30 Bible Online

KINOBAḺIAN 30 - Mongondow bible

KINOBAḺIAN 30

¹Táe ki Rahel in diápa doman kogadí. Manangka intua nointoidon in sia kon i guya-guyangnea, bo sia noguman kon i Yakub, “Ogoiaidon akuoi in adí, aka diá, yo akuoi in simimpatoidon.”

²Ki Yakub sinumorú kon i Rahel bo noguman, “Akuoi naa in deemanbí ki Allah. Ki Allahbí tua in nopobaḻí kon inimu bantó.”

³Bo ki Rahel noguman, “Naa in bobantungku ki Bilha; posiugdon takinnea sinbá sia mobogoidon in adí kon inakó. Bo bá pongin inia akuoi in mokouḻídon kon buí.”

⁴Bo inogoineadon ki Bilha kon i buḷoinea, bo ki Yakub nosiugdon noyotakin in bobantung tatua.

⁵Ki Bilha sidia bo nopononggadí in adí ḷoḷaki tobatú.

⁶Ki Rahel noguman, “Ki Allah ain nobogoi in koadilan kon inakó. Inindogogan-Neadon in sambayangku bo inogoian-Neadon akuoi in adí ḷoḷaki tobatú.” Bo sinangoianneadon in adí tatua ki Dan.[62]

⁷Ki Bilha in sidia bui bo nopononggadí in adí ḷoḷaki tobatú.

⁸Guman i Rahel, “Akuoi in totokdon irumopot moḷawang kon i guya-guyangku, bo akuoi in nountung,” tuamai adí tatua sinangoiannea ki Naptali.[63]

⁹Naonda in kinorasaanmai Lea kon sia diádon bui mokouḻí kon adí, dá inogoineadon in bobantungnea, ki Zilpa, inogoinea kon i Yakub sinbá pobuḷoionnea.

¹⁰Ki Zilpa nopononggadí in adí ḷoḷaki tobatú.

¹¹Ki Lea in noguman, “Akuoi nomujur,” bo sinangoianneadon in adí tatua ki Gad.[64]

¹²Ki Zilpa bui doman nopononggadí in adí ḷoḷaki tobatú,

¹³bo ki Lea in noguman, “Totuudon mosanang in akuoi! Tanaa mako bayongan bobay in mogumandon kon akuoi in totuudon mosanang.” Tuamai adí tatua sinangoianneadon ki Asyer.[65]

¹⁴Kon sempo in ponoḻisían kon boyó in gandum, ki Ruben nodondaḷoi magí-mako bo nokouḻí in sia kon pinomuḷa undam,[66] bo dinianea kon i inánea inta ki Lea. Ki Rahel in noguman kon i Lea, “Ogoiaidon akuoi in topiḻik nongkon undam inta nouḻí i adímu tatua.”

¹⁵Tubag i Lea, “Eta diápa doman tugat kon inimu in nogamá kon i buḷoiku? Tanaa iko monungkuḷ doman mogamá kon undam inta nouḻí i adíku.” Guman i Rahel, “Aka ogoimu kon inakó in pinomuḷa undam inta nouḻí i adímu tua, yo motaau in iko mosiug takin i Yakub in doḷom naa.”

¹⁶Naonda in ki Yakub nobui nongkon tampat popokaanan in bobiagon, ki Lea nonontomu kon inia poḷat noguman, “Mosiugdon takinku in iko in doḷom naa sin inuboḻiankudon in pinomuḷa undam inta nouḻí i adíku.” Bo ki Yakub nosiugdon takinnea in doḷom tua.

¹⁷Inindongogan i TUHAN in sambayang i Lea, sia sidiadon bui bo nopononggadí in adí inta noginḻima.

¹⁸Guman i Lea, “Ki Allah ain nobogoi in tondan pinogaidanku sin akuoi ain noposarakan kon i Zilpa ki buḷoiku,” tuamai adí tatua in sinangoiannea ki Isakhar.[67]

¹⁹Ki Lea in sidiadon bui bo nopononggadídon in adí inggonomnea.

²⁰Gumannea, “Ki Allah ain nobogoi kon inakó in tombuinag inta mogaga totok. Tanaa ki buḷoiku in mogutundon moyotakinku, sin akuoi ain nopolahir in adí ḷoḷaki onom,” tuamai sinangoiannea in adí tatua ki Zebulon.[68]

²¹Nopaḷut mako kon tua ki Lea nopononggadídon in adí bobay tobatú inta sinangoiannea ki Dina.

²²Bo kinotoropandon i Allah in ki Rahel; ki Allah in notubagdon kon sambayangnea bo inogoi-Neadon sia nononggadí.

²³Dá ki Rahel in sidiadon bo nopononggadí in adí ḷoḷaki tobatú. Guman i Rahel, “Ki Allah ain nomopat kon inta mokooyá kon inakó.

²⁴Igumon mako ki Allah buipa doman mobogoi kon inakó in adí ḷoḷaki tobatú.” Tuamai sinangoiannea adí tatua ki Yusup.[69]

²⁵Naonda in ki Rahel nopononggadí kon i Yusup, ki Yakub in noguman kon i Laban, “Ogoidon in akuoi mobui kon butáku.

²⁶Pomayádon mako akuoi modia kon i buḷoiku doyowa takin ki adíku mita, inta nouḻíku saḷaku tondan in pinogaidanku kon inimu. Kinotaauanmu, kon akuoi aindon totu-totuu nogaid kon inimu.”

²⁷Ki Laban in noguman kon inia, “Indongogaipa muna: Kinoontongankudon kon ki TUHAN ain nomarakat kon inakó sin popisí in iko.

²⁸Pogumandon kon inakó mongo tongonu in igumonmu.”

²⁹Tubag i Yakub, “Kinotaauanmu bidon tontaní kon akuoi ain totu-totuu nogaid, bo bobiagonmu in nodugangdon nobarong sin akuoi in nomiag.

³⁰Kon tungkuḷ in akuoi diápa namangoi, kapunyaanmu diápa naonda, táe tanaa iko in totokdon in nooyúon. Ki TUHAN ain nomarakat kon inimu sin popisí in akuoi.[70] Tanaa wakutuneadon akuoi mogaid sin pomiagku kon buḷoi bo adíku tontaní”.

³¹Guman i Laban, “Mobaḻímai onu in ogoiku kon inimu?” Ki Yakub in notubag, “Donaidon ogoianmu in onu bo onu. Akuoi in umuranbí momiag kon bobiagonmu, asaḷ bo iko moibog kon onu inta poigumonku tanaa:

³²Ogoiaidon akuoi in wakutu in singgai naa modondaḷoi kon yua-yuak in bayongan paanan bembé dombamu, bo mogamá kon ki adí in domba inta norondí,[71] bo pomuḷoi doman bembé inta batáneapa inta baḷam-baḷang ande inta notudi-tudik. Tongábí tua tondan in pinogaidanku inta kinoibogku.

³³Kon singgai moiduduimai kotaauanmudon mongo akuoi in nojujurdon nogaid. Aka iko mamangoi bo moindoi kon tondan in pinogaidanku, bo mokoontong kon oyúon in bembé inta diá notudi-tudik ande nobaḷam-baḷang, ande domba inta diá norondí, yo kotaauanmudon kon biag tatua in sinakowku.”

³⁴Ki Laban notubag, “Mobaḻí! Aidan natonda in onu inta pinoigum tatua!”

³⁵Táe kon singgai tua ki Laban nopotondídon in bayongan bembé koḷakian inta nogoḷong-goḷong ande baḷam-baḷang bo bayongan bembé kobaayan inta nobaḷam-baḷang, notudi-tudik, ande inta oyúon in tontudik nobudónea; sia nopotondí doman in bayongan domba inta norondí. Onda intua pinotabáneadon in ki adínea mita pinoki biagan in bobiagon mita tatua,

³⁶bo minayádon in mosia takin bobiagon mita tatua iyumayú kon i Yakub, koyayú in binayáan monia tua in toḷu nosinggai in bayáan. Ki agat in paanan bembé domba kapunyaan i Laban iḷukadan i Yakub.

³⁷Onda intua ki Yakub nogamá kon tanga mita nointok nongkon pangkoi in hawar, pangkoi in badam bo pangkoi in berangan, bo iningkuḻitan in toḷosi dá nobaḻí nobaḷam-baḷang.

³⁸Inukatnea in tanga mita tatua kon tayowon in paanan bembé tatua, kon bonu in tampat pongonginumannea, sin biag mita tatua moibog mobuḷoi kon dodai in mosia monginum.

³⁹Dá aka bembé mita tatua mobuḷoi kon tayowon in tanga mita tatua, yo ki adínea in mogoḷong-goḷong ande nobaḷang ande motudi-tudik.

⁴⁰Onda intua ki Yakub nogamá kon domba mita tatua bodongka pinotayownea kon bembé mita inta nogoḷong-goḷong bo norondí. Natua in akaḷnea dapot in sia nokouḻí kon paanan bobiagonnea tontaní bo pinotondíneadon kon paanan bobiagon i Laban.

⁴¹Aka biag mita inta moropot koyogot mobuḷoi, dá ki Yakub mopoukat in tanga mita inta sinayipanea tatua kon tayowon monia, kon bonu in tampat pongonginumannea.

⁴²Táe tanga mita tatua diábí poukatnea kon tayowon in biag mita inta noḻemé. Dá, bayongan mahaḷuk inta nobudó tua moyangkó, bo tuadon in kapunyaan i Laban, sedang komintan biag inta norondí, nobaḷang bo notudi-tudik tua moropot, bo tuata in kapunyaan i Yakub.

⁴³Tua in pinomia i Yakub bo sia nobaḻí nobiag nooyúon totok. Sia kopaanan bembé domba, unta, keledai bo bobantung mita.