Read Mongondow KINOBAḺIAN 31 Bible Online

KINOBAḺIAN 31 - Mongondow bible

KINOBAḺIAN 31

¹Ki Yakub nokodongog kon ki adí mita i Laban nosingog nanaa, “Ki Yakub ain nogamá kon bayongan kapunyaan i amá naton. Bayongan kapunyaannea komintan nongkon kapunyaan i amá naton.”

²Inontong i Yakub kon ki Laban in diádon ná koḻipod in kopopianea kon inia.

³Bo ki TUHAN in noguman kon i Yakub, “Pobuidon kon butá i amámu bo kon i utat bo ginaḷummu. Akuoi in koyota-yotakinmubí.”

⁴Onda intua ki Yakub nopotabádon kon intau mayá mopotaau kon i Rahel bo kon i Lea sinbá mosia in moyodungkuḷdon kon tampat popokaanan in bembé dombanea.

⁵Bo ki Yakub in noguman kon i monia, “Inontongkudon kon ki amá monimu in diádon ná biasamai in kopopianea kon inakó; táe ki Allah inta sinumba i amáku in koyota-yotakinkubí.

⁶Kinotaauan domandon namunda kon akuoi totokdon irumopot in nogaid sin nobantung kon i amá monimu.

⁷Bo umpaka natua táe akuoi inuboḷanneapa doman bo binaḷuaineadon tondan in pinogaidanku nodapot in kopuḷú. Táe diábí pinomayá mako i TUHAN in sia nopoaid in inta moraat kon inakó.

⁸Kon dodai in ki amámu noguman, ‘Bembé inta notudi-tudik in mobaḻí tondan in pinogaidanmu,’ dá bayongan paanan nopononggadí doman in inta notudi-tudik. Kon dodai in sia noguman, ‘Bembé inta nobaḷam-baḷang in nobaḻí tondan in pinogaidanmu,’ dá bayongan paanan tatua komintan doman mopononggadí in nobaḷam-baḷang.

⁹Natuata in aid i Allah nogamá kon paanan biag kapunyaan i amámu bodongka ogoi-Nea kon inakó.

¹⁰Bo kon sempo in biag mita tatua mobuḷoi, akuoi tumogoindop mokoontong kon bayongan bembé inta nobuḷoi tua in batangannea nongo goḷong-goḷong, notudi-tudik bo nobaḷang.

¹¹Bo malaekat i Allah noguman kon inakó kon bonu in togoindop tatua: ‘Yakub!’ Tubagku, ‘Ya TUHAN!’

¹²Malaekat tatua noguman bui, ‘Indoiai, komintan bembé koḷakian inta koyogot mobuḷoi tatua batangannea noloreng, notudi-tudik bo nobaḷang. Sinuod-Kubí inaidan intua kon inimu sin ain inontongku in bayongan inta inaidan i Laban kon inimu.

¹³Akuoibí naa in ki Allah inta nokipogontong kon inimu kon Betel. Kon tua iko ain noposindog in batu tompoingat tobatú, poḷat nopobutak in ḷana zaitun kon tudunea. Kon tampat doman tatua iko nongibot kon inakó. Tanaa pobasadiadon bo pobuidon kon butá kinolahiranmu.’ ”

¹⁴Dá ki Lea bo ki Rahel in notubag, “Diá bidon in silai nongkon kapunyaan i amá nami in tarimaan nami.

¹⁵Kami in pinomianeadon ná intau ango-angoi. Sia ain nopotaḷui kon inami bo onu inta ain sinarimanea tatua, ain domandon kinodaitnea tontaní.

¹⁶Bayongan kaoyúonan inta ain ginamá i Allah nongkon i amá nami sabanarnea kapunyaanbí nami bo i adí mita nami. Dá aidaidon onu inta pinoki aid i Allah kon inimu.”

¹⁷Bo ki Yakub nonoḻisídon sin mobui kon i amánea kon butá in Kanaan. Ki buḷoinea mita takin ki adínea mita pinoponikneadon kon unta, bo dinianeadon bayongan paanan bembé dombanea bo bayongan onu inta ain nouḻínea kon Mesopotamia.

¹⁸

¹⁹Kon dodai intua ki Laban kon tampat ponggonsingan kon bubuḷ in domba, koyogot doman monggonsing kon bubuḷ in dombanea mita, bo kon dodai intuata ki Rahel nonakow kon patong [72] kapunyaan i amánea.

²⁰Ki Yakub in nonguboḷ kon i Laban takin diá noguman mosia in minayá

²¹Sia nogamá kon bayongan in kapunyaannea bo iḻimika-ḻikat in minayá. Sia iḷumoḷan nongin Ongkag in Eprat bodongka nopobayá in buḷud Gilead.

²²Bain kon singgai intoḷunea bo pinotaaudon kon i Laban kon ki Yakub ain noḷagui.

²³Bo ki Laban nosipundon kon intaunea mita bo noyotakindon monia nogaḷow kon i Yakub pitu nosinggai in koonggotnea nodapot in kinobatukannea kon butá in buḷud Gilead.

²⁴Kon tungkuḷ in doḷom ki Allah namangoi kon i Laban kon bonu in togoindopnea, bo noguman, “Pokoingat dika mokoimontanmai iko mopogogondok kon i Yakub takin tosingogon tongáka totontagá.”

²⁵Kon dodai intua ki Yakub ain noposindog in ḷoḷaigannea kon buḷud tobatú. Onda intua kon buḷud toḷosi kon butá tatua doman ki Laban bo intaunea mita noposindog doman in ḷoḷaigan monia.

²⁶Nopaḷut mako kon tua ki Laban noguman kon i Yakub, “Nongonu sin iko in monguboḷbí kon inakó bo nodia noḷagui kon i adíku mita, nádon onda bo mosia tua intau mita inta dinakop kon parang?

²⁷Nongonu sin iko in nonguboḷbí kon inakó takin minayá inumuni-uni, takin diá noguman? Aka kuma iko bo noguman, yo pasti inogoikubí iko minayá takin pia in gina bo inatod sinakinan in musik rebana bo kecapi!

²⁸Nodapot in diádon inogoianmu in akuoi in kasampatan nongayok kon i adí bo kon i ompuku saḷaku tanda moyogapídon. Totuu mobodok in aidmu tanaa!

²⁹Moḷobenbí in ropotku aka akuoi mogaid kon inta moraat kon inimu, táe kogobíi ki Allah inta sinumba i amámu nobogoidon in tompoingat kon inakó sinbá diá mopogogondok kon inimu.

³⁰Kinotaauankubí kon iko nobuat tatua popisí in iko moibogdon totok mobui. Nongonu sin iko nonakowbí kon patong moḷoḷukad kon i motoḷuadíku?”

³¹Bo ki Yakub in notubag, “Akuoi in minayá takin inumuni-uni sin moondok in akuoi dikabo ampaganmu in ki adímu mita.

³²Soaḷ patong tatua, aka mouḻímu in tobatú intau kon naa inta ain nonakow yo intau tatua hukumon matoi. Tayakdon, mongo oyúon in kapunyaanmu kon naa. Aka oyúon, yo gamádon. Bo intau mita naton in mobaḻí sakusi.” Diábí kinotaauan i Yakub kon ki Rahelbí tua in nonakow kon patong tatua.

³³Bo ki Laban minayá kon ḷoḷaigan i Yakub bo notayak; nopaḷut mako kon tua sia minayá in ḷoḷaigan i Lea bo ḷoḷaigan in bobantungnea bobay doyowa tua, táe patong tatua diábí nouḻínea. Pangabisannea sia sinumuot kon ḷoḷaigan i Rahel.

³⁴Táe munadon ginamá i Rahel in patong tatua bo pinopobonunea kon botutu inta pinopobongkoḷ kon unta, bo sia iḻimitúdon mako kon bongkoḷ tatua. Ki Laban nomirikisa kon tombonu in ḷoḷaigan i Rahel, táe diá doman nouḻínea in patong tatua

³⁵Bo ki Rahel in noguman kon i amánea, “Donaaidon ki papa tumorú, akuoi in diádon motaau simindog motomu kon i papa, sin akuoi inangoinea.” Ki Laban totokdon nonaridi in notayak, táe diá nouḻínea in patong tatua.

³⁶Dá sinumorúdon in ki Yakub, “Romúdon onu inta ain inaidanku?” Sia in noḻibó takindon sinumorú totok. “Onu in taḷáku nodapot iko nogaḷow kon inakó?

³⁷Tanaa, naonda in noḷekai kon bayongan barangku, yo oyúon degá in nouḻímu in barang kapunyaanmu? Poḷuaidon in barang tatua bo ukatdon kon naa, sinbá intauku mita bo intaumu mita mokoontongdon bo monantúdon mongo ki ine in kon sigad naton in mobanar.

³⁸Doyowadon nopuḷú notaong akuoi in nogutun kon inimu. Paanan domba bo bembému nodugangdon nobarong, bo diápabí dodai onda akuoi in nokaan kon tobatúmai in bembé koḷakian nongkon bobiagonmu.

³⁹Inta minatoi dinomok in mahaḷuk ibanea diábí dodai onda diniaku mangoi kon inimu, táe akuoibí tontaní in monoḻiu kon tua. Inta sinakow kon wakutu in singgai ande doḷom umuran doman tuntutonmu sinbá toḻiuanku.

⁴⁰Mokakit in akuoi mopatú totok kon dodai in singgai bo tumonow kon dodai in doḷom. Bo mokakit doman akuoi in diádon mokosiug.

⁴¹Ná domai tua in rorigaku tungkuḷ in akuoi nogaid kon inimu doyowa nopuḷú notaong koonggotnea. Mopuḷú bo opat notaong koonggotnea akuoi nogaid kon inimu sinbá motaau mobuḷoi kon i adímu doyowa tatua — bo onompa doman notaong bui sinbá mokouḻí kon paanan bembé bo domba tatua. Bo solama intua iko ain kopuḷú nomaḷui kon tondan in pinogaidanku.

⁴²Aka kuma bo akuoi diá iḷukadan i Allah in mogoguyangku, ki Allah inta sinumba i Abraham bo i Ishak, dá tantú akuoi ain bidon pinotabámu minayá takin diá nodia kon onu bo onu. Táe ki Allah ain noindoi kon rorigaku bo oaidan inta ain inaidanku, bo kogobíi Sia ain nobogoi in kaputusan-Nea.”

⁴³Bo ki Laban notubag kon i Yakub, “Bobay doyowa tatua ki adíku; ki adí mita monia in akuoi doman kitogi, bo paanan in domba tatua kapunyaanku doman. Bo bayongan inta inontongmu kon naa akuoibí in kitogi. Táe diábí in motaauku aidan kon i adí bo ompuku tanaa.

⁴⁴Tuamai koḻigaidon kita mogaid kon dodandian bo mongguntuḷ kon batu inta baḻíon tanda in dodandian tatua.”

⁴⁵Onda intua ki Yakub nogamá kon batu tobatú bo pinosindognea nobaḻí batu tompoingat.

⁴⁶Bo sia in nopotabá kon intaunea mita nosipun kon batu bo ginuntuḷ kinoḷantud. Nopaḷut mako kon tua mosia in nongaan noyotakin kon diug in guntuḷan batu tatua.

⁴⁷Ki Laban nonangoi kon guntuḷan batu tatua Yegar-Sahaduta,[73] yo ki Yakub nonangoi kon tua Galed.[74]

⁴⁸Guman i Laban kon i Yakub, “Guntuḷan batu tanaa in mobaḻí tompoingat kon i natonda.” Tuamai tampat tatua sinangoian Galed.

⁴⁹Ki Laban in noguman doman, “Poigumon mako ki TUHAN umuran moindoi kon i naton kon bonu in kita mobiag moyogiyayúan.” Tuamai tampat tatua sinangoiandon Mizpa.[75]

⁵⁰Ki Laban buipa doman noguman, “Aka iko mogaid kon inta moraat kon i adíku mita, ande mobuḷoi bui kon bobay mita ibanea, umpaka diá in nokototaau, yo pokotorop, ki Allah tantú moindoi mako kon inaton.

⁵¹Naadon in batu mita inta ain pinoyoguntuḷku, bo binaḻí batu tompoingat.

⁵²Pinomayá guntuḷan batu tanaa, ande batu tompoingat tatua moponorop kon i naton kon akuoi in diábí motaau ḻimimpat kon guntuḷan tanaa sin monubu kon inimu, bo iko doman diábí motaau ḻimimpat kon guntuḷan bo batu tompoingat tanaa sin mamangoi monubu kon inakó.

⁵³Ki Allah inta sinumba i Abraham bo sinumba i amáku ki Nahor[76] in mobaḻí hakim kon sigad natonda.” Bo ki Yakub nongibot pinodoyon kon i Allah inta sinumba i Ishak, ki amánea, sin dumudui mogaid kon dandinea.

⁵⁴Sia in noratá kon biag tobatú bo pinosumbanea kon tudu in buḷud tatua. Bo inoiníneadon in intaunea mita sin mongaan moyotakin. Naonda in nopaḷut mako nongaan, mosia in nogogaipa kon tudu in buḷud tatua.

⁵⁵Nobangon monik doḷo-doḷom, ki Laban nongayokdon kon i adí bo kon i ompunea saḷaku tanda moyogapídon, poḷat sia nomarakat kon i monia, onda intua sia nobuidon kon tampat pinogutunanea.