Read Mongondow KINOBAḺIAN 33 Bible Online

KINOBAḺIAN 33 - Mongondow bible

KINOBAḺIAN 33

¹Ki Yakub nokoontong kon i Esau namangoi takin intaunea opat nogatut. Tuamai sinilainea in ki adínea mita kon i Lea, kon i Rahel bo kon i buḷoinea inta bobantungnea doyowa tua.

²Bobantungnea doyowa tatua takin ki adí mita monia in kon muna, bo noiduduimai ki Lea takin ki adínea mita, bodongka ki Rahel bo ki Yusup in kon tumi totok.

³Ki Yakub in minayá kon muna totok monia komintan, bo koyogot in sia mayá dimiug kon i guya-guyangnea, sia sindaḷan tumungkud nodapot in kopitu.

⁴Táe ki Esau in noribatuk namangoi kon i Yakub, bo nonggakap poḷat nongayok kon inia. Bo taya dua tua tumpaḷadon nongombaḷ.

⁵Naonda in ki Esau nokoontong kon bayongan bobay takin adí mita tatua, sia in noḻibó, “Ki ine in mosia inta noyotakinmu tanaa?” “Mosia naa in ki adíku mita,” tubag i Yakub, “Ki Allah ain noponotabi in adí mita tatua kon inakó.”

⁶Onda intua bobantungnea mita takin ki adí mita monia inumuna bodongka nosumba.

⁷Onda intua namangoi domandon in ki Lea takin ki adínea mita, bo kon tumi totok in ki Yusup bo ki Rahel in dinimiug bodongka sinumungkud nosumba.

⁸Ki Esau noḻibó, “Onu in makusudmu takin rombongan mita inta noyodungkuḷku koina?” Ki Yakub in notubag, “Moposanang kon gina in Guya-guyang.”

⁹Táe ki Esau in noguman, “Tugat bidon in kapunyaanku uḻeku, diáka bidon iko mobogoi in tombuinag kon inakó.”

¹⁰Guman i Yakub, “Donaai! Aka akuoi ain nokouḻí kon tabimu, yo tarimadon in sosumbaku tanaa. Aka kon inakó, nokoontong kon pogot in guya-guyang naonda bo nokoontong kon pogot i Allah, sin Iko noibogdon notarima kon inakó takin tabi moḷoben.

¹¹Poigumonku, tarimadon in sosumba inta diniaku tanaa. Ki Allah ain notabi kon inakó bo ain nobogoi in bayongan yagi-yagi inta paraḷuku.” Ki Yakub umuran nodondouḷug kon i Esau, nodapot in aher mako sinarimaneadon.

¹²Bo ki Esau in noguman, “Koḻigaidon kita mobasadiadon mobuat bo mayá, akuoi in mayá umuna kon inimu.”

¹³Ki Yakub in notubag, “Kinotaauanbí i Tuangku kon adí mita tanaa moyangkópa, bo mustiku ḷukadan doman in bobiagon mita inta kogadí kon mointokpa. Aka ḻimikat in modia kon i monia, umpaka tongá tosinggai, yo matoibí in bobiagon mita tanaa.

¹⁴Unadon, akuoi in mayá doman dumuduianmai umpaka ḷumaḷoyanmai podudui in ḷampang in bobiagon mita tanaa, bo podudui doman in ḷampang i adíku mita modapot in akuoi moyaput kon i tuangku kon Edom.”

¹⁵Guman i Esau, “Aka natua, dá bain taḷaanku in tongonumai intau inta noyotakinku naa.” Táe ki Yakub in notubag, “Donaaidon mosusamai, akuoi in tongábí moibog moposanang gina in Guya-guyang.” [80]

¹⁶Dá nobuidon in ki Esau kon singgai doman tatua, sia nobui kon Edom.

¹⁷Táe ki Yakub minayá in Sukot, bodongka noposindog in baḷoinea bo tampat pononiungan in bobiagonnea mita. Tuamai tampat tatua sinangoian Sukot.[81]

¹⁸Kon binayáan nongkon Mesopotamia, noyaputdon in ki Yakub takin nosaḷamat kon kotá in Sikhem kon butá in Kanaan, bo noposindog in ḷoḷaigan kon dotá in pomukaan kon kotá tatua.

¹⁹Noiduduimai kon tua sinaḷuineadon in tampat tatua nongkon intau mita inta buí i Hemor, ki amá i Sikhem, boḻinea mogatut doit saḷaka.

²⁰Onda intua sia in noposindog in mezbah kon tua bo sinangoiannea “El, Allah Israel”.