Read Mongondow KINOBAḺIAN 34 Bible Online

KINOBAḺIAN 34 - Mongondow bible

KINOBAḺIAN 34

¹Kon singgai tobatú, ki Dina adí bobay i Yakub bo i Lea, minayá nokipodungkuḷ kon tongonumai in bobay mita in Kanaan.

²Naonda in ki Sikhem, ki adí i Hemor intau in Hewi inta nobaḻí datu kon butá tatua nokoontong kon i Dina, pinoḷaguinea in mongodeaga tatua bo pinakisanea siniugan.

³Táe sia in totokbí in moibog kon i Dina, dapot in sia totokdon in moibog bo moramuji sinbá mongodeaga tatua moibog domandon kon inia.[82]

⁴Ki Sikhem noguman kon i amánea, “Akuoi in mopoigum sinbá ramujion i Papa in mongodeaga tatua popotonibuḷoi takinku. Moibog in akuoi mononibuḷoi kon inia.”

⁵Kinodongogandon i Yakub kon ki adínea ki Dina ain kinotontaḷáan, táe ki adínea mita koyogotpa in moḷukad kon bobiagonnea kon tampat popokaanan in bobiagon, dá sia in tongápabí kibio-biómai in pinogoḷa-goḷatan kon mosia mobui mangoi.

⁶Ki Hemor, ki amá i Sikhem, namangoi kon i Yakub sin mopoyosingog kon tua.

⁷Tongkaná intua ki adí mita i Yakub nobuidon nongkon tampat pinopokaanan monia in bobiagon. Nokodongogmai kon onu in nobaḻí tatua, mosia in noitaḻikokog bo totok in sinumorú. Sin aid i Sikhem natua kon i adí i Yakub notongkai in mosia nokopooyámaidon kon bayongan intau Israel.

⁸Guman i Hemor kon i Yakub, “Ki adíku ki Sikhem, noibogdon kon i adímu; dá akuoi in mopoigum kon inimu sinbá ogoimudon in ki adíku motonibuḷoi takin i adímu.

⁹Koḻigaidon in kita mogaid kon yopakat in tosingogon kon bangusa i Utat bo bangusa nami in motaaudon motonibuḷoi.

¹⁰Dá tai utat mita in motaaudon mogutun moyotakin nami kon butá tanaa; kon ondakabí in koibog monimu. Tai Utat mita motaaubí in motayak bo mogutun motantú kon naa.”

¹¹Bo ki Sikhem noguman kon i amá i Dina bo kon i guya-guyangnea mita, “Duduiaidon in oigumku tanaa, dá akuoi in dumudui bidon kon onuka in kinoibog monimu.

¹²Pogumandon mongo tombuinag onu in kinoibog monimu, bo tantúdon in kobayong in buḷawan ogoi inta mobaḻí bobogoi kon tonibuḷoinea. Akuoi in mobogoibí in onukadon poigumon monimu, asaḷ bo ogoi monimu in akuoi motonibuḷoi takin adí bobay tatua.”

¹³Popisí in ki Sikhem ain nokopooyámai kon kahoromatan i ai-ai monia ki Dina, dá ki adí mita i Yakub nonguboḷ kon i Sikhem bo kon i Hemor ki amánea.

¹⁴Guman monia kon i nayadua tua, “Kami mooyá in mobogoi kon i ai-ai nami motonibuḷoi takin intau inta diá sinoit.

¹⁵Kami in moibogbí dumudui kon onu in pinoigummu monimu tanion táe musti takin tobatú sarat,: Moiko musti mobaḻí ná doman kami, mangaḻenea bayongan ḷoḷaki kon sigad monimu in musti toiton komintan.

¹⁶Bain mopaḷut mako kon tua bo duduian nami in oigum monimu motonibuḷoi kon sigad in bangusamu bo bangusa nami. Kami in mogutundon motantú kon yua-yuak monimu bo kita in mobaḻídon tobangusa.

¹⁷Táe aka doí dumudui kon sarat mita nami, bo doí sunaton, buidon gamáan nami in ki bobay nami tatua bo mayá.”

¹⁸Dá ki Hemor bo ki Sikhem ki adínea noibogdon kon onu in pinoigum monia tatua.

¹⁹Bo ki Sikhem noibogdon ḷagi dinumudui kon onu in sarat tatua popisí in totokdon ibognea kon i Dina. Kon sigad in bayongan ginaḷum motoḷuadí monia ki Sikhemdon naa inta totok in ihoromat monia.

²⁰Onda intua ki Hemor bo ki Sikhem minayá kon tampat poyoyodungkuḷan kon ngara in kotá, bo nopotaau kon bayongan intau kon kotá monia, nanaa in guman monia tua:

²¹“Intau mita in Israel tua in yobayat naton. Dá tuamai pomayádon mako in mosia mogutun kon butá tanaa moyotakin naton takin diá in ḷamboi in maya-mayá mako kon ondaka in koibogan monia. Butá tanaa in tugatbí doman potarimaan kon i monia. Kita in motaaubí motonibuḷoi takin adí mita mongodeaga monia, bo mosia doman in motaaubí motonibuḷoi takin adí mita naton mongodeaga.

²²Tongá intau mita tatua moibog mogutun moyotakin naton bo mobaḻí tobangusa naton takin tobatú sarat nanaa: bayongan ḷoḷaki kon sigad naton musti doman toiton ná mosia.

²³Bain bayongan paanan bobiagon monia bo bayongan kapunyaan monia mobaḻí doman kapunyaan naton. Dá koḻigai bá duduiandon naton onu in pinoigum monia tua sinbá mosia in mogutundon moyotakin naton.”

²⁴Komintan intau kon kotá inta noyosipun kon tua noibog kon onu in pinoguman i Hemor bo i Sikhem tua, bo bayongan ḷoḷaki inta ain nogurang kon kotá tatua sinoitdon.

²⁵Toḷu nosinggai noiduduimai kon tua, kon wakutu in intau mita ḷoḷaki nonahangpa mako kon monakit pinopisí in bagupa sinoit, indoianmai yo ki adí i Yakub doyowa, inta ki guya-guyang i Dina inta ki Simeon bo ki Lewi, nogamádon kon pitow monia, bo takin diá noguman sinumuot kon kotá. Onda intua mosia noḻimod kon bayongan ḷoḷaki kon tua,

²⁶noitakin doman in ki Hemor bo ki Sikhem. Bo mosia in nogamádon kon i Dina nongkon baḷoi Sikhem bo minayá.

²⁷Naonda in nopaḷut pinoḻimodan tatua, ki adí mita i Yakub ibanea nogagow kon kotá tatua saḷaku toḻiu in yaat in gina monia sin ki ai-ai monia ain pinokopo oyámai monia.

²⁸Mosia in nogamá kon paanan bembé domba, sapi, keledai bo bayongan inta kon bonu ande kon ḷuai in kotá tatua.

²⁹Mosia in nogamá kon bayongan barang inta koboḻi, nodomok kon bayongan bobay bo adí mita, bo nogagow kon bayongan tombonu in baḷoi mita kon kotá tatua.

³⁰Ki Yakub noguman kon i Simeon bo kon i Lewi, “Moiko mokopororigamaidon kon inakó. Tanaa intau in Kanaan bo intau in Peris bo bayongan intau kon butá kon naa moyaatdon in gina monia kon inakó. Intau mita naton tongábí topiḻik; aka komintan intau kon naa motobatú komintan moḷawang bo monubu kon inakó, yo bayongan buḷoi, adí bo ginaḷum naton modaitbí moyopú.”

³¹Táe mosia in notubag, “Kami in doíbí mopomayá mako kon i ai-ai nami pomiaan ná bobay sundaḷ.”