Read Mongondow KINOBAḺIAN 36 Bible Online

KINOBAḺIAN 36 - Mongondow bible

KINOBAḺIAN 36

¹Naa in buí mita i Esau inta dinonoi doman ki Edom.

²Ki Esau nonika takin bobay intau in Kanaan toḷu: ki Ada, ki adí i Elon intau in Het; ki Oholibama, ki adí i Ana bo ki ompu i Zibeon[86] intau in Hewi;

³Ki Basmat, ki adí i Ismael nayadua i Nebayot.

⁴Ki Ada in nopononggadí kon i Elipas, ki Basmat nopononggadí kon i Rehuel,

⁵bo ki Oholibama in nopononggadí kon i Yeus, Yaelam bo ki Korah. Adí mita tatua noilahir kon butá in Kanaan.

⁶Onda intua ki Esau nonaḷámai kon i Yakub bo minayá in butá ibanea nodia kon i buḷoinea mita, kon i adínea bo bayongan intau inta kon baḷoinea, takin bayongan bobiagon bo kapunyaan inta ain nouḻínea kon Kanaan.

⁷Ki Esau in sinumontanídon kon i Yakub sin kapunyaan monia noiḻiudon antó dapot in mosia diádon motaau mogutun moyotakin. Apa doman butá inta iḻitúan monia tua in diá tugat popokaanan in bobiagon monia inta moantó totok tua.

⁸Dá ki Esau inta dinonoi doman ki Edom, nogutundon notantú kon buḷud in Seir.

⁹Naa in buí i Esau, mogoguyang intau in Edom.

¹⁰Ki buḷoi Esau inta ki Ada nopononggadí in tobatú adí ḷoḷaki, tangoinea ki Elipas. Bo ki Elipas kogadí kon adí ḷoḷaki ḻima, inta ki Téman, ki Omar, ki Zepo, ki Gaetam bo ki Kenas. Ki Elipas kobuḷoi doman kon bobantung, tangoinea ki Timna. Sia nopononggadí in adí ḷoḷaki, ki Amalek in tangoinea. Ki buḷoi i Esau inta ki Basmat nopononggadí in tobatú adí ḷoḷaki, tangoinea ki Rehuel. Bo ki Rehuel kogadí kon opat in adí ḷoḷaki, inta ki Nahat, ki Zera, ki Syama bo ki Miza.

¹⁴Ki buḷoi i Esau inta ki Oholibama, inta ki adí i Ana ki ompu i Zibeon,[87] nopononggadí in adí ḷoḷaki toḷu, inta ki Yeus, ki Yaelam bo ki Korah.

¹⁵Naa in tongguḷu in suku mita buí i Esau: ki Elipas, ki adí guya-guyang i Esau, in nobaḻí mogoguyang in suku mita tanaa: Téman, Omar, Zepo, Kenas,

¹⁶Korah, Gaetam bo Amalek. Mosia komintan buí i Ada, ki buḷoi i Esau.

¹⁷Ki Rehuel, ki adí i Esau, in nobaḻí mogoguyang in suku mita tanaa: Nahat, Zerah, Syama bo Miza. Mosia komintan buí i Basmat, ki buḷoi i Esau.

¹⁸Suku mita inta moiduduimai naa in buí i Esau nongkon i buḷoinea inta ki Oholibama ki adí i Ana, tuata in suku Yeus, Yaelam bo Korah.

¹⁹Suku mita tatua buí i Esau.

²⁰Intau mita inta nogutun kon Edom sinilai nobaḻí suku mita buí i Seir, intau in Hori. Suku mita tatua in: Lotan, Syobal, Zibeon, Ana, Disyon, Ezer bo Disyan.

²²Ki adí mita i Lotan in ki Hori bo Heman. (Ki Lotan kogutat kon bobay, tangoinea ki Timna.)

²³Naa in ki adí mita i Syobal: Ki Alwan, ki Mahanat, ki Ebal, ki Syepo bo ki Onam.

²⁴Ki Zibeon kogadí kon adí ḷoḷaki doyowa, ki Aya bo ki Ana. (Ki Ana naa inta nokouḻí kon bokaká mita in tubig mopatú kon padang gurun, kon tungkuḷ in sia koyogot mopokaan in keledai mita i amánea.)

²⁵Ki Ana naa ki amá i Disyon, bo ki Disyon ki adínea in ki Hemdan, ki Esyban, ki Yitran bo ki Keran. Ki Ana kogadí doman kon adí bobay tobatú, tangoinea ki Oholibama.

²⁷Naa in ki adí mita i Ezer: Ki Bilhan, ki Zaawan, bo ki Akan.

²⁸Ki adí mita i Disyan in ki Us bo ki Aran.

²⁹Naa in suku mita i Hori kon butá in Edom: ki Lotan, ki Syobal, ki Zibeon, ki Ana, ki Disyon, ki Ezer bo ki Disyan.

³¹Kon dodai in diápa in datu nomarenta kon Israel, datu mita inta noiduduimai tanaa nomarenta kon butá in Edom noyo-noyodudui: Ki Bela ki adí i Beor kon i Dinhaba. Ki Yobab ki adí i Zera nongkon i Bozra. Ki Husyam nongkon butá in Téman. Ki Hadad ki adí i Bedad nongkon Awit (sia tuata inta nonaḷow kon intau in Midian tungkuḷ in noparang kon butá in Moab). Ki Samla nongkon Masreka. Ki Saul nongkon Rehobot inta kon bingkí in ongkag. Ki Baal-Hanan ki adí i Akhbor. Ki Hadar nongkon Pahu (Tangoi buḷoinea in ki Mehetabeel, ki adí i Matred inta ki ompu i Mezahab).

⁴⁰Ki Esau in nobaḻí mogoguyang in suku-suku Edom inta noiduduimai naa: Timna, Alwa, Yete, Oholibama, Ela, Pinon, Kenas, Téman, Mibzar, Magdiel, bo Iram. Pomuḷoi in suku nobogoi in tangoi kon butá pinogutunan monia tontaní.