Read Mongondow KINOBAḺIAN 39 Bible Online

KINOBAḺIAN 39 - Mongondow bible

KINOBAḺIAN 39

¹Ki Yusup ain dinia in intau mita Ismael tatua kon Mesir, bo pinotaḷui kon i Potipar, tobatú porwira i datu inta nokadai kon jabatan saḷaku tongguḷu in moḷoḷukad kon komaḻig.

²Ki TUHAN notuḷung kon i Yusup dapot in sia umuran mokodungkuḷ kon inta mopia onukabí in aidannea. Sia in nogutun kon baḷoi i tuangnea, intau in Mesir tatua.

³Inontong i Tuangnea kon ki TUHAN notuḷung kon i Yusup dá tuamai ki Yusup umuran mokodungkuḷ kon inta mopira onukabí in aidannea.

⁴Nopia in gina i Potipar kon i Yusup, bo sia binaḻíneadon simpaḷnea; bo inogoianneadon in oaidan ki Yusup monompia kon baḷoi bo bayongan kapunyaannea.

⁵Mulai sia inogoian kawasa mogurus kon baḷoi bo bayongan in kapunyaannea, ki TUHAN nomarakatdon kon baḷoi intau bo bayongan kapunyaan intau in Mesir tatua sin oaid i Yusup, pinomayá inta kon baḷoi ande inta kon gobá.

⁶Bayongan onu inta kon i Potipar pinopopirisayadon kon i Yusup. Takin natua ki Potipar beresi bidon sia doí monotaau kon bayongan inta kon baḷoinea, koḻikudbí in soaḷ kaanonnea. Ki Yusup naa in moroton bo moḷunat totok.

⁷Diá noonggot kon tua, ki buḷoi Potipar nomangkoidon nongibog kon i Yusup, bo tayowmobiag tatua inanutanneadon mosiug moyotakinnea.

⁸Doí in ki Yusup bo sia in noguman kon i buḷoi Potipar, “Ampung, Nyora, ki tuang Potipar ain nopopirisaya in bayongan kapunyaannea kon inakó. Sia diá in bidon paraḷu momikir kon onuka in kon baḷoi tanaa.

⁹Kon naa kawasaku notongkai in kawasanea. Diábí in tobatúmai diá pinopopirisayanea kon inakó koḻikudbí in ki Nyora. Yo naondabí in akuoi momia kon inta moraat natua bo mogaid kon dosa kon i Allah?”

¹⁰Umpaka ki buḷoi Potipar umuran modondouḷug kon i Yusup pomuḷoi in singgai, táe tayowmobiag tatua in umuranbí doman doí mosiug takinnea.

¹¹Kon singgai tobatú kon dodai in ki Yusup sinumuot kon baḷoi sin mogaid kon oaidannea, diá tobatúmai intau in kon tua.

¹²Ki buḷoi Potipar nokadai kon jubah i Yusup bo poḷatnea inugut bo noguman, “Igai mosiug moyotakin in kitada.” Ki Yusup in nomarow bo nokobuḻidon, bo poḷat in sia iḻumuai noḷagui, táe jubahnea kokada-kadaipa in bobay tatua.

¹³Naonda in ki buḷoi Potipar nokoontong kon ki Yusup ain noḷagui bo jubahnea in kinotaḷáan,

¹⁴sia nogoiní kon bobantungnea mita bo noguman, “Indoiaika! Intau in Ibrani inta dinia mangoi i buḷoiku kon baḷoi tanaa, nopohinamaidon kon inaton. Sia sinumuot in gopotku bo modomok kon inakó, táe kinumarak in akuoi.

¹⁵Onda in dinongognea kon akuoi in kinumarak, sia noḷagui iḻumuai bo jubahnea in kinotaḷáan.”

¹⁶Bo ki buḷoi Potipar notagú kon jubah tatua dapot in ki buḷoinea nobui kon baḷoi.

¹⁷Naonda in ki buḷoinea nobui, sia in bayá-bayádon noguman kon i buḷoinea, kainia, “Intau Ibrani inta diniamu tua, sinumuot kon gopotku sin mopoyagi-yagimai kon inakó.

¹⁸Táe naonda in akuoi kinumarak, sia in noḷagui iḻumuai bo jubahnea in kinotaḷáan.”

¹⁹Ki Potipar sinumorúdon totok.

²⁰Bo sia in nomarenta sinbá ki Yusup ḷagidon domokon bo popobonu kon ponjara, tampat pongongurungan kon datu mita.

²¹Táe ki TUHAN notuḷung kon i Yusup bo umuran motabi kon inia, dapot in itoi in ponjara motabi kon inia.

²²Bayongan intau kon ponjara tatua pinoki indoineadon kon i Yusup, bo ki Yusupdon moindoi kon bayongan oaidan kon bonu in ponjara tatua.

²³Itoi in ponjara tatua diá bidon umuran moindoimai kon onu inta ain pinoki aidnea kon i Yusup, sin ki TUHAN notuḷung kon inia dapot in bayongan inta aidannea umuranbí mobaḻí motompia.