Read Mongondow KINOBAḺIAN 4 Bible Online

KINOBAḺIAN 4 - Mongondow bible

KINOBAḺIAN 4

¹Onda intua ki Adam in nosiug noyotakin i Hawa, ki buḷoinea, bo sidiadon in bobay tatua. Sia nopononggadí in adí ḷoḷaki tobatú, ki Hawa in noguman, “Takin totuḷung i TUHAN akuoi nokouḻí kon adí ḷoḷaki.” Dá sinangoiannea in adí tatua ki Kain.[14]

²Bo ki Hawa in bui nopononggadí in adí ḷoḷaki tobatú, tangoinea in ki Habel. Ki Habel in nobaḻí gombala in domba, táe ki Kain nobaḻí monononggobá.

³Diá noonggot kon tua ki Kain nogamá kon tosilai nongkon bungai in pinomuḷanea bo pinosumbanea kon i TUHAN.

⁴Bo ki Habel in nogamá doman kon ki adí in dombanea inta guya-guyang, iratánea bodongka pinosumbanea kon i TUHAN in onu inta totok in nopira. Nopia in gina i TUHAN kon i Habel takin sosumbanea tatua,

⁵táe ki Kain takin sosumbanea diá sinarima-Nea. Ki Kain sinumorú totok bo totokdon in rumongut.

⁶Dá ki TUHAN nogumandon kon i Kain, “Nongonu sin tumorúbí in iko? Nongonu sin totokbí in morongut iko?

⁷Aka iko mogaid kon inta mopia, yo pasti pogotmu in diábí morongut mako;[15] táe aka iko mogaid kon inta moraat, dá dosa in dongka mogoḷat mako sin tumuot kon ginamu. Dosa in moibog mongawasa kon inimu, táe musti ḷawangonmu in sia.”

⁸Bo ki Kain in noguman kon i Habel, ki ai-ainea tua, “Koḻigai kita mayá in gobá.” [16] Naonda in mosia kon tua, ki Kain in nomongkug bo poḷat noḻimod kon i Habel inta ki ai-ainea tontaní tua.

⁹Ki TUHAN in noḻibó kon i Kain, “Kon onda in ki Habel ki ai-aimu?” Ki Kain in notubag: “Diábí kinotaauanku. Deemanbí in akuoi moḷoḷukad i ai-aiku?”

¹⁰Bo ki TUHAN in noguman, “Nongonu sin iko in nogaidbí kon soaḷ inta mokoondok natua? Dugú i ai-aimu in nokuani kon Inakó nongkon butá, naonda bo singog inta nomaḷú mokituḻí.

¹¹Iko in binaḷa modapot in diádon motaau monontotayak nongkon butá tatua. Butá aindon nonotop kon dugú i ai-aimu, butá naonda bo gumanga mako motarima kon dugú i ai-aimu tungkuḷ in iḻimodmu in sia.

¹²Aka iko monompinomuḷa, butá in diábí mopoḷuai bungai in boyó. Iko in mobaḻídon intau inta tongá tantú maya-mayá mako, diá motantú kon tampat bo diá in pogutunan kon dunia naa.”

¹³Dá guman i Kain kon i TUHAN, “Totuu mobogat in hukuman tatua, diá mokopotaan in akuoi kon tua.

¹⁴Iko TUHAN mopoguntun kon inakó nongkon butá tanaa, mokopoyayú nongkon tayowon-Mu. Akuoi in mobaḻí intau inta tongá umuran maya-mayá mako inta diá kotampat pogutunan kon dunia naa, bo akuoi in ḻimodon i inekadon inta moyodungkuḷku.”

¹⁵Táe ki TUHAN in noguman, “Diábí. Aka iko Ḻimodon, dá tontuḻínea kon tua, pitu intau takin inta noḻimod kon inimu in ḻimodon doman.” Onda intua ki TUHAN nobogoi in tomponuot kon i Kain sinbá ki inekabí in moyodungkuḷnea yo diá moḻimod kon inia.

¹⁶Bo minayádon in ki Kain nongkon tayowon i TUHAN bo nogutun kon butá inta tangoinea “Pinoḷaḻean” kon dotá in pomukaan nongkon Eden.

¹⁷Ki Kain bo ki buḷoinea nokouḻí kon adí ḷoḷaki, inta sinangoian monia ki Henokh. Onda intua ki Kain noposindog in kotá tobatú bo sinangoiannea in kotá tatua tangoi i adínea tatua.

¹⁸Ki Henokh ki amá i Irad. Ki Irad ki amá i Mehuyael. Ki Mehuyael ki amá i Metusael, bo ki Metusael ki amá i Lamekh.

¹⁹Ki Lamekh naa doyowa in ki buḷoinea, ki Ada bo ki Zila.

²⁰Ki Ada in nokouḻí kon adí ki Yabal in tangoinea, bo buí i Yabal tuata in bangusa mita inta moibog monombobiagon bo inta nogutun kon ḷoḷaigan.

²¹Ki ai-ainea tangoinea in ki Yubal, bo buí i Yubal naa in mopia totok mopogogitog in musik kecapi bo bansí.

²²Ki Zila in nopononggadí kon i Tubal-Kain, buínea mogogaid kon bayongan pakakat[17] nongkon tambaga bo uatoi. Ki ai-ai bobay i Tubal-Kain tangoinea ki Naama.

²³Nogumandon in ki Lamekh kon i buḷoinea doyowa tua, “Ada kamunda i Zila, indongogaipa! Tobatú tayowmobiag iḻimodku sin sia ain nomongkug kon inakó.

²⁴Aka pitu intau ḻimodon sin motuḻí kon pinoḻimodan i Kain, dá pitu nopuḷú bo pitu intau in ḻimodon aka akuoi in ḻimodon.”

²⁵Ki Adam bo ki buḷoinea bui nokouḻí kon adí ḷoḷaki. Guman i Hawa, “Ki Allah aindon nobogoi bui kon inakó in adí ḷoḷaki tobatú nobaḻí toḻiu i Habel, inta ain iḻimod i Kain.” Tuamai sinangoian i Hawa in adí tatua ki Set.[18]

²⁶Ki Set in kogadí kon adí ḷoḷaki inta sinangoian ki Enos. Kon tungkuḷ intuata intau nomangkoidon nonangoi kon tangoi TUHAN aka mosia in mosumba.