Read Mongondow KINOBAḺIAN 40 Bible Online

KINOBAḺIAN 40 - Mongondow bible

KINOBAḺIAN 40

¹Naonda in tua mita nobaḻí, bobantung i datu in Mesir doyowa, inta mopoposadia in pongonginuman bo inta mopoposadia in kaanon, nomia kon noitaḷá kon i datu.

²Dá sinumorúdon in ki datu kon bobantungnea doyowa tatua,

³bo mosia in pinobonuneadon kon ponjara kon bonu in baḷoi moḷoḷukad kon komaḻig, kon tampat pinomonjaraan kon i Yusup.

⁴Noonggotbí doman in mosia kon ponjara tatua, bo itoi in moḷoḷukad kon komaḻig nobogoi in tugas kon i Yusup moindoi kon i monia.

⁵Kon doḷom tobatú intau inta mopoposadia in oinumon i datu bo inta mopoposadia in kaanon i datu tumpaḷa sinumogoindop. Táe togoindop nayadua tua in diá notongkai dá mangaḻenea in diábí doman notongkai.

⁶Naonda in ki Yusup namangoi kon i monia nopoikoḷomai kon singgai, koontongan molamurú mako in taya dua tua.

⁷Dá ki Yusup in noḻibó, “Nongonu sin tai utat mita totokbí in molamurú mako in singgai naa?”

⁸Tubag monia, “Kogobíi kami in sinumogoindop, bo diá doman kotaauan nami in mangaḻenea.” Guman i Yusup, “Tongábí ki Allah in motaau mobogoi in mangaḻe in togoindop. Oumanka in togoindop monimu tatua.”

⁹Mopoposadia in oinumon i datu tatua in noguman, “Kon togoindop tua, akuoi in nokoontong kon oyúon pangkoi in anggur kon tayowonku.

¹⁰Pangkoi in anggur tatua nonanga toḷu. Bagupa in tanganea mita tatua monondaun, indoianmai mulaidon ḷumuai doman in bungainea, bo indoianmai bungainea in noḷutúdon.

¹¹Kon dodai intua akuoi kokada-kadai in galas pongonginuman i datu, dá ginamáku in bungai in anggur tatua bo pinugutku kon bonu in galas i datu, bodongka binayáku inogoi sin inumon i datu.”

¹²Ki Yusup in noguman, “Naa in mangaḻenea: Tanga toḷu tatua mangaḻenea toḷu nosinggai.

¹³Kon bonu in toḷu nosinggai moiduduimai ki datu mopoḷuaidon kon inimu, ampunganneadon in iko bo popobuineadon in iko kon oaidanmu inta koḻipod. Iko in bui bidon moposadia in oinumon i datu ná koḻipod.

¹⁴Táe kotoropaipa in akuoi aka iko motompiadon in kobobiagmu. Tuḷungai bo pogumandon kon i datu onu inta nobaḻí tanaa, sinbá akuoi poḷuaiondon kon ponjara tanaa.

¹⁵Sin, sabanarnea koḻipod akuoi sinakow nongkon butá intau Ibrani bo kon naa, kon Mesir, akuoi in diábí kon dodai in onda in nogaid kon inta moraat nodapot in akuoi pinotuot kon bonu in ponjara tanaa.”

¹⁶Naonda intau inta mopoposadia in roti tatua nokotaau kon mangaḻe in togoindop in mopoposadia kon oinumon i datu tatua mopia, dá sia in noguman doman kon i Yusup, “Akuoi in sinumogoindop doman, akuoi noguntu kon karansi toḷu kon bonu in roti.

¹⁷Kon bonu in karansi inta totok in koḻimonik noyagi-yagimai in kukis sin diaan ogoi kon i datu, táe ḷagapan mita namangoibí bo nokaan kon kukis mita tatua.”

¹⁸Tubag i Yusup, “Naa in mangaḻe in togoindopmu tatua: Karansi toḷu tatua mangaḻenea toḷu nosinggai.

¹⁹Toḷupa nosinggai naa ki datu mopotabádon kon intau momongkó kon uḷumu bodongka bambéonnea in mayatmu kon oigi tobatú, bo ḷagapan mita mamangoi mokaan kon tapúmu.”

²⁰Toḷu nosinggai noiduduimai kon tua in singgai kinotompodan umur i datu, bo sia nogaid kon rame moḷoben sin pogoiníannea kon bayongan pogawainea. Sia nomarenta sinbá mopoposadia in oinumonnea bo intau inta mopoposadia in kaanonnea poḷuaidon kon bonu in ponjara bo diaan kon tayowon in bayongan pogawai in komaḻig.

²¹Itoi in mopoposadia kon oinumon pinopobuineadon kon oaidannea koḻipod.

²²Táe inta mopoposadia kon kaanonnea ihukum dapot in minatoi. Tua komintan in nobaḻí notongkai ná inta ain pinoguman i Yusup.

²³Táe mopoposadia kon oinumon i datu tatua in diá bidon kinotoropannea in ki Yusup. Totok bidon in kinoḻiongannea in ki Yusup.