Read Mongondow KINOBAḺIAN 43 Bible Online

KINOBAḺIAN 43 - Mongondow bible

KINOBAḺIAN 43

¹Malarat kon Kanaan totokdon modugang motoyang, bo naonda in nodaitdon in gandum inta dinia nongkon Mesir kon motoḷuadí i Yakub, ki Yakub in nogumandon kon i adínea mita, “Bayádon bui in Mesir bo buidon potaḷui kon gandum sin kaanon naton.”

³Dá ki Yohuda in noguman kon inia, “Ki Gubernur mesir ain nobogoi in tompoingat kon kami in diábí motaau bui mamangoi in tayowonnea aka kami in diá modia mangoi kon i ai-ai nami tatua.

⁴Aka ogoi papa in ki ai-ai nami tatua dumudui, yo moibogpa bui in kami mayá intua sin motaḷui kon kaanon.

⁵Táe aka diá ogoi papa in ki Benyamin dumudui, yo doíbí doman in kami mayá, sin ki gubernur tatua ain noguman muna kon kami in diábí motaau mayá kon tayowonnea aka ki ai-ai nami in diá dumudui.”

⁶Guman i Yakub, “Nongonu sin moiko in mokoposusabímai kon inakó takin minayá bo noguman kon intau tatua kon oyúonpa in ki ai-ai monimu?”

⁷Tubag monia, “Intau tatua in tantúbí moḻibó mongo naonda in kami bo naonda in motoḷuadí naton, gumannea, ‘Nobiagpa degá in ki amámu? Degá oyúonpa in ki ai-ai monimu ḷoḷaki ibanea?’ Dá pakisadon sinubagan nami in bayongan inta iḻibónea tatua. Naondabí in kinototaau nami kon sia in mopotabá kon inami modia mangoi kon i ai-ai nami tatua?”

⁸Bo ki Yohuda in noguman kon i amánea, “Popomayádon mako adí tatua dumudui, bo akuoi in kitogi totaau kon inia. Kami in ḷagidon mobuat sinbá diá in kon sigad naton matoi in gogoy.

⁹Akuoidon in nobaḻí potaru kon inia, bo motaaubí tuntuton i amá kon inakó in sia. Aka sia bo diá diaanku mangoi takin kaadaan mosaḷamat, yo tanggungonku in hukumannea kon bonu in akuoi mobiagpa.

¹⁰Aka kuma bo kita in diá noonggot kon pogoḷatan mako, yo tantú kita tanaa ain bidon kodua minayá.”

¹¹Dá ki amá monia in noguman, “Aka totuu kon natuabí, dá podiadon kon boyó inta totok in mopira kon butá naton naa, bonudon kon karong monimu baḻíon tombuinag kon i gubernur tatua: Taḷong, biluk, pododungú mita, bungai in boyaau bo bungai in badam.

¹²Diadon doman doit inta kobayongnea kodua ná kobayong inta muna, sin doit inta nouḻí monimu kon bonu in karong monimu tatua musti monimu pobuion. Sin degá tua in tongábí notoboḻingo.

¹³Diadon in ki ai-ai monimu tua, bo ḷagidon pobui mangoi.

¹⁴Poigumon mako ki Allah Inta Totok in Mokawasa mopobaḻí kon i gubernur tatua motabi kon i monimu, dapot in moibogdon in sia mopobui mangoi kon i Benyamin bo kon i Simeon kon i monimu. Yo akuoi naa, aka mustibí kobuḻian i adíku mita, yo donaaidon mako aka tuabí in mobaḻí.”

¹⁵Onda intua ki utat mita i Yusup nodia kon tombuinag mita tatua bo doit inta kobayongnea kodua ná inta muna dinia, bodongka nobuat minayá in Mesir noyotakin i Benyamin. Naonda in noyaput kon tua, mosia in minayádon kon tayowon i Yusup.

¹⁶Naonda in ki Yusup nokoontong kon i Benyamin bo kon i guya-guyangnea mita, sia noguman kon bobantungnea inta nobaḻí itoi mogogurus kon tombonu in baḷoi, “Diadon in intau mita tatua kon baḷoiku. Mosia in mongaan moyotakinku in singgai naa, tuamai in poratádon kon bobiagon tobatú bo sadiadon intua.”

¹⁷Bobantung tatua nogaid kon onu inta pinoki aid bo nodia kon i utat mita i Yusup sinumuot kon baḷoi i gubernur.

¹⁸Naonda in mosia dinia sinumuot kon baḷoi Yusup, mosia inagían in ondok bo norai, “Kita in dinia namangoi kon naa, popisí in doit inta nouḻí naton kon bonu in karong naton kon tungkuḷ in kita namangoi koḻipod. Mosia in daḻídon modomok kon inaton, bodongka gamáan monia in keledai naton bo kita baḻíon ki ata monia.”

¹⁹Manangka intua, kon diug in ngara in baḷoi Yusup, mosia in noguman kon itoi inta mogogurus kon tombonu in baḷoi,

²⁰“Maapdon, Tuang, kami nokoimontandon namangoi in naa sin notaḷui kon kaanon.

²¹Kon binayáan nobui, naonda in kami mogogai sin mosiugpa, kami in nobukádon kon karong nami. Kinobukaanmai yo bayongan doit inta pinoguboḻi nami kon gandum nami pinoyobonubí monia in gandum kon karong. Diábí kinotaauan nami mongo ki ine in nopobonu in doit tatua.”

²³Bobantung tatua in noguman, “Dika moondok. Dika mohawatir. Ki Allahmu, inta ki Allah inta sinumba i amámu, Sia tuata inta nopobonu in doit tatua kon bonu in karong monimu. Akuoi in notarimadon kon boḻi in gandum inta sinaḷui monimu tua.” Onda intua dinianeadon mangoi in ki Simeon kon i monia,

²⁴bodongka inatodneadon in mosia sinumuot kon baḷoi. Sia in nobogoi in tubig sin pondaritan monia kon sioḷ, bo nobogoi doman in kokaanon in keledai monia.

²⁵Nopaḷut mako kon tua sinadiadon monia in tombuinag inta ogoi kon i Yusup aka sia in mamangoidon kon oras in moutudon in singgai, sin ain pinotaau kon i monia kon mosia in mongaan moyotakinnea.

²⁶Naonda in ki Yusup noyaputdon kon baḷoi, mosia nobogoi in tombuinag mita tatua kon i Yusup takin sinumungkud kon tayowonnea.

²⁷Ki Yusup noḻibó kon kaadaan monia, bo noguman, “Moiko ain nongonguman kon inakó soaḷ ki amá monimu inta ain nogoguyang tua. Naonda in kaadaannea, Nopia-pia degá?”

²⁸Tubag monia, “Bobantung i Tuang, ki amá nami, nopiapabí in kaadaannea.” Bo sinumungkud in mosia kon tayowonnea.

²⁹Naonda in ki Yusup nokoontong kon i Benyamin, ki ai-ainea, sia in noguman, “Dá sia tanaa degá in ki ai-ai monimu inta muit tatua, inta ain inouman monimu kon inakó? Igumon mako ki Allah momarakat kon inimu, adíku.”

³⁰Gina i Yusup totokdon in morobonoḷ sin dinia in tanob bo tabinea kon i ai-ainea. Gogió bo diádon in sia mokotahang kon ginanea, tuamai sia in baḷúdon minayá nongkon tua bo sinumuot in sia kon gopot poḷat nongombaḷ.

³¹Nopaḷut mako kon tua sia in nongiamot, bodongka iḻumuai bui, bo takin nonahang kon ginanea, sia nokioḷudon in kaanon.

³²Ki Yusup nongaan tontaní kon meja tobatú, bo ki utatnea mita kon meja ibanea. Intau mita in Mesir inta kon tua nongaan doman kon meja ibanea, sin mosia ná batangan pinokopo ompámai aka mongaan moyotakin intau in Ibrani.

³³Ki utat mita i Yusup pinoki ḻitúan kon meja inta noyogintayowan i Yusup, mosia iḻimitú podudui in umur monia, pinangkoi kon inta guya-guyang totok nodapot kon inta ai-ai totok. Naonda inontong monia in pinononampat natua, mosia in nooindoian takin herang.

³⁴Mosia inogoian in kaanon nongkon meja i Yusup, bo ki Benyamin inogoian koḻima in kobayongnea nongkon i guya-guyangnea. Bo nongaan bo nonginumdon in mosia noyotakin i Yusup nodapot in nobotug.