Read Mongondow KINOBAḺIAN 44 Bible Online

KINOBAḺIAN 44 - Mongondow bible

KINOBAḺIAN 44

¹Nopaḷut mako kon tua ki Yusup nomarenta kon itoi mogogurus kon tombonu in baḷoinea, “Bonuaidon in gandum in karong intau mita tatua, kobarongon dapot in kodiaan monia, bo bonu bui kon karong monia in doit monia, potudu kon ḻimonik in gandum tatua.

²Pobonu doman in piala saḷakaku kon bonu in karong i ai-ai monia inta muit, takin doit boḻi inta pinotaḷuinea kon gandum.” Bobantung tatua in nogaid doman kon onu inta pinoki aid kon inia tua.

³Nopoikoḷomai kon singgai, doḷo-doḷompa totok, ki Yusup noyogapídon takin i utatnea mita, bo mosia in nobuidon takin keledai monia.

⁴Diápa in mosia noyayú nongkon kotá tatua, ki Yusup nogumandon kon bobantungnea koina, “Ḷagidon batuk in intau mita tatua. Aka kobatukandon, pogumandon kon i monia, ‘Nongonu sin aid mopia tuḻíanbí monimu in moraat?

⁵Nongonu sin moiko in nonakowbí kon piala saḷaka i tuangku?[95] Piala tatua pakéonneamai pongonginuman bo alat pooindoian kon onu in mobaḻí kon singgai moiduduimai. Moiko nogaidon kon inta totok in moraat!’ ”

⁶Naonda in bobantung tatua nodapot kon i utat mita i Yusup, sia in noguman kon onu inta ain pinoki aid i Yusup kon inia.

⁷Tubag monia kon inia, “Onu in makusud i Tuang? Kami in mongibot kon kami in diábí nogaid kon soaḷ natua!

⁸Kinotaauan bidon tontaní i Tuang kon doit mita inta nodungkuḷ kon bonu in karong nami inta sinudu kon gandum tatua, ain bidon pinobui nami kon i Tuang. Dá diábí doman inta kami in monakow kon saḷaka ande buḷawan nongkon baḷoi i gubernur!

⁹Tuang, aka kuma barang tatua bo mouḻí kon sigad nami, dá pomayádon mako in sia hukumon matoi, bo kami in mobaḻí bobantung i Tuang.”

¹⁰Bobantung tatua in noguman, “Mopia; táe tongábí ki ine in kouḻían kon piala tatua, siata in mobaḻí bobantungku; ibanea in motaau bidon mayá.”

¹¹Bo ḷagidon in mosia nopoponag in karong monia bo nobuká bui.

¹²Bobantung i Yusup tatua nomirikisadon kon karong mita tatua takin kinotaḻit, pinangkoi kon karong kapunyaan in inta guya-guyang nodapot kon karong i inta muit, bo piala tatua in nouḻí kon bonu in karong i Benyamin.

¹³Nonakitdon totok in gina i guya-guyangnea mita dapot in mosia nomera-merakdon kon ḷambung monia. Mosia in buidon nopodatog in bahan mita monia kon keledai bo nobui kon kotá.

¹⁴Naonda in ki Yohuda bo ki utatnea mita noyaputdon kon baḷoi i Yusup, sia kon tuapa, bo mosia in sinumungkudon kon tayowonnea.

¹⁵Dá nosingogdon in ki Yusup, “Onu in pinomia monimu tanion? Diábí kinotaauan monimu degá kon intau ná akuoi naa monotaaubí kon oaidmu inta moraat takin sinotaauku?”

¹⁶“Onu in motaau singogon nami, Tuangku?” tubag i Yohuda. “Naondabí in pomomayow nami, onupa in singogon nami pomayow kon tosingogon i Tuang? Ki Allah ain nopoontong in taḷá nami. Tanaa kami komintan nobaḻídon bobantung mita i Tuang, deemanbí tongá sia inta kinouḻían kon piala tatua.”

¹⁷Guman i Yusup, “Diá! Akuoi in doíbí mogaid kon natua! Tongábí sia inta kino uḻían kon piala tatua in mobaḻí bobantungku. Ibanea in motaau bidon mobui kon i amámu.”

¹⁸Ki Yohuda in minayá dinimiug kon i Yusup bo noguman, “Maap, Tuangku, ogoipa in bobantungmu naa mosingog bui takin i Tuangku. Dika tumorú kon inakó inta tongá bobantung naa; Ki Tuang nádon ki datu in Mesir tontaní.

¹⁹Ki Tuangku ain noḻibó kon i nami naa, ‘Degá moiko ko amápa ande kogutatpa kon ibanea mako?’

²⁰Kami ain notubag, ‘Ki Amá nami ain nogoguyang bo ki ai-ai nami pinononggadí kon dodai in ki amá nami ain noguyang. Ki guya-guyang toináan i ai-ai nami tua ain minatoi, dá tanaa dongkadon sia in nobiagpa in kon sigad i nayadua, bo ki papa totok in motabi kon inia.’

²¹Ki Tuangku ain nopotabá kon inami modia mangoi kon naa, sinbá ontongondon i Tuang in sia,

²²bo kami ain noguman kon adí tatua in diábí motaau moyoguat takin i amánea; sin aka sia moyoguatdon takin i amánea dá ki amánea in matoi bidon.

²³Táe ki Tuangku in noguman, ‘Moiko in diábí motaau mamangoi bui kon tayowonku aka diá modia kon i ai-ai monimu tua.’

²⁴Naonda in kami nobui kon i amá nami, pinotaau nami in tosingogon i Tuang tatua.

²⁵Onda intua ki amá nami bui nopotabá kon inami mamangoi in naa sin motaḷui kon kaanon.

²⁶Kami in notubag, ‘Kami in diábí motaau bui mayá in tua, sin kami in diábí motaau bui tumayow kon i gubernur aka ki ai-ai nami inta muit diá dumudui kon inami. Kami in motaau bui mayá intua koḻikudbí in aka ki ai-ai nami mayá doman.’

²⁷Onda intua ki amá nami in noguman, ‘Kinotaauan monimu kon ki Rahel, ki buḷoiku tua tongá kogadí kon doyowa.

²⁸Inta muna ain nonaḷámai kon inakó. Notantúdon kon sia tua ain dinomok in mahaḷuk moraat, sin nodapotdon kon tanaa mako diádon in sia inontongku bui.

²⁹Aka moiko mogamá kon adí muit tanaa nongkon inakó, bo oyúon in mobaḻí kon inia, yo roriga in gina inta poantug monimu kon inakó tua in mokopopisí bidon kon kopatoianku, sin akuoi naa in nogoguyangdon.’ ”

³⁰“Tuamai, Tuangku,” Guman i Yohuda kon i Yusup, “aka bobantungmu naa mayádon bui kon i amá nami bo diá kotaki-takin i ai-ai nami tatua, yo notantú bidon kon ki amá nami tua in matoibí. Nyawanea in noitogot bidon kon adí tatua, bo sia totokdon in nogoguyang sahingga ajar in gina inta diaan nami kon inia tua mokopopisídon kon kopatoiannea.

³²Apa doman akuoi naa ain nodandi kon i amáku kon akuoi in mobaḻí jaminan kon adí tatua. Akuoi noguman kon inia, kon aka akuoi diá modia bui mangoi kon adí tatua kon inia, dá akuoidon in motanggung kon hukuman kon bonu in mobiagpa kon dunia naa.

³³Dá, bobantung naa mopoigum, bá ogoidon i Tuangku in akuoi mogutunpa kon naa mobaḻí bobantung i Tuangku monoḻiu kon i ai-ai nami naa; bo pomayádon mako in sia mobui moyotakin i guya-guyangnea mita.

³⁴Naondabí in pobobuiku aka ki ai-ai nami tua diá kotaki-takin nami? Akuoi in diábí mokotahang mokoontong kon bodito inta moiantug kon i amá nami tua.”