Read Mongondow KINOBAḺIAN 45 Bible Online

KINOBAḺIAN 45 - Mongondow bible

KINOBAḺIAN 45

¹Ki Yusup in diádon mokotahang kon ginanea kon tayowon in pogawainea mita. Tuamai pinotabáneadon in mosia nonaḷámaidon kon yuang tatua sinbá sia in motaaudon gumuman kon i utatnea mita tatua.

²Naonda in bayongan pogawainea iḷumuaidon kon yuang, ki Yusup totokdon in nongombaḷ, sahingga intau mita in Mesir inta kon ḷuai in yuang nokodongogdon kon ombaḷnea, bo noiyaputdon in habar tatua kon komaḻig in datu.

³Ki Yusup in noguman kon i utatnea mita, “Akuoi naa in ki Yusupbí. Nobiagpa in ki papa?” Nokoontongmai kon natua in ki utatnea mita noondokdon totok, dapot in mosia diádon nokotubag.

⁴Bo ki Yusup in noguman kon i monia, “Kodiugdon magí kon naa.” Mosia in dinimiugdon, bo sia in nogumandon bui, “Akuoi naa in ki Yusupbí, inta ain pinotaḷui monimu kon intau in Mesir.

⁵Dika moondok ande momanasaḷ popisí in nopotaḷui kon inakó in moiko. Sin in ki Allahbí tontaní inta ain nodia kon inakó namangoi in naa umuna kon i monimu sin moposaḷamat in kobiagan in intau mobarong.

⁶Tanaa bagu kon taong induanea kon sempo in malarat, bo ḻimapa notaong intau diápabí motaau momajeko ande mogamá kon boyó in gobá.

⁷Ki Allah ain nodia kon inakó inumuna kon i monimu sin moposaḷamat kon i monimu pinongin daḷan inta mokoherang tanaa, bo mojamin kon kasaḷamatanmu bo tondoḷ in buímu.

⁸Dá sabanarnea in deemanbí moiko in nokopopisí kon inakó noiangoi in naa, táe ki Allahbí. Binaḻídon i Allah in akuoi pogawai i datu inta kon ḻimonik in bayongan pogawainea kon Mesir naa. Akuoi ain inogoian in kawasa kon bayongan komaḻignea bo bayongan butá in Mesir.

⁹Tanaa, ḷagidon pobui in moiko kon i papa bo pogumandon kon inia kon ki Yusup, ki adínea, noguman nanaa, ‘Binaḻídon i Allah in akuoi pongawasa kon bayongan butá in Mesir; ḷagidon angoi naa.

¹⁰Ki Amá in motaaubí mogutun kon butá in Gosyen, modiug kon inakó — ki amá takin adí bo ompu, domba, bembé, sapi bo bayongan kapunyaan i amá.

¹¹Aka ki amá kon Gosyen, yo akuoi in motaau moḷukad kon i amá. Sempo in malarat naa in ḻimapa notaong bo usahaanku sinbá ki papa takin adí mita bain ompu bo ginaḷum bo bobiagon i amá diá in matoi in gogoy.’ ”

¹²Guman bui i Yusup, “Tanaa indoiaidon monimu tontaní, bo indoiaimu doman Benyamin, kon akuoi in totu-totuubí ki Yusup.

¹³Potaaudon kon i amá naton kon totokbí in moḷoben kawasaku kon naa, kon Mesir, bo oumandon kon inia in bayongan inta ain inontong monimu. Bo ḷagidon dia mangoi in sia.”

¹⁴Onda intua sia nonggakap kon i Benyamin, ki ai-ainea tua, bodongka nongombaḷ; ki Benyamin nongombaḷ poḷat nonggakap doman kon i Yusup.

¹⁵Onda intua, takin koomba-ombaḷpa, ki Yusup nonggakap kon i utatnea mita bo poḷat doman nongayok kon i monia komintan. Nopaḷut mako kon tua mosia in nomangkoidon nongonguman takinnea.

¹⁶Naonda in kinodongogandon kon komaḻig i datu in habar kon ki utat mita i Yusup namangoi, dá nosanang domandon in gina i datu bo pogawainea mita.

¹⁷Bo ki datu in nogumandon kon i Yusup, “Potabádon in ki utatmu mita tatua mopodatog in gandum mita kon keledai monia bo mobui kon Kanaan

¹⁸sin monontomu kon i amá monia takin buḷoi, adí bo ginaḷum monia sin momampingdon mangoi kon naa. Ogoiankudon in mosia in butá inta totok in mopia kon Mesir, sahingga in mosia mobiagdon motompia nongkon boyó in butá tatua.

¹⁹Pokidiaai domandon in mosia in tongonumai in kereta sin takoian i buḷoi bo adí mita monia inta nongointokpa, bo monontomu kon i amá monia.

²⁰Mosia in dika bidon momanasaḷ monaḷámai kon barang mita inta diádon kodiaan, sin onu inta totok in mopia kon Mesir in nobaḻíbí doman kapunyaan monia.”

²¹Ki adí mita i Yakub dinumudui poḷat nogaid kon onu inta pinarenta tatua. Ki Yusup nobogoidon kon i monia in tongonumai in kereta, podudui in parenta i datu, bo tongkaaḷ doman kon binayáan.

²²Inogoiannea doman kon i monia in tumongo par mako in ḷambung mobagu, bo ki Benyamin inogoiannea doman in doit toḷu nogatut doit in saḷaka bo ḻima doman no par in ḷambung nobagu.

²³Pinoki dianea doman in ki amánea in keledai mopuḷú inta dinatogan in barang mita inta totok in mongopia kon Mesir, bo keledai doman mopuḷú inta dinatogan in gandum, roti bo kokaanon ibanea sin kaanon monia kon binayáan mopoangoi in Mesir.

²⁴Onda intua ki utatnea mita inogoineadon minayá, takin koyow kon i monia, “Donaai mobobayowan in kon daḷan.”

²⁵Mosia in nonaḷámai kon Mesir bo nobui kon Kanaan kon i Yakub, ki amá monia.

²⁶“Ki Yusup nobiagpa!” guman monia kon inia. “Sia in nobaḻídon pongawasa kon bayongan butá in Mesir!” Nokodongog kon habar tatua, sia in tongábí kibio-biómai, bo diábí pinirisayanea in tosingogon monia tua.

²⁷Táe naonda in mosia nongonguman kon bayongan inta pinoguman i Yusup kon i monia, bo naonda in sia nokoontong kon kereta inta pinoki dia mangoi i Yusup sin potomunea bo poḷat modia kon inia mayá in Mesir, noropotdon bui in ginanea.

²⁸“Ki adíku ki Yusup nobiagpa!” gumannea. “Tongábí tuata in kinoibogku! Akuoi in mustibí mayá bo moindoi kon inia kon dodai in akuoi diápa matoi.”