Read Mongondow KINOBAḺIAN 46 Bible Online

KINOBAḺIAN 46 - Mongondow bible

KINOBAḺIAN 46

¹Ki Yakub nonoinutdon kon bayongan in kapunyaannea bodongka nobuat. Nodapotmai kon Bersyeba sia noposumbadon in kuruban kon i Allah inta sinumba i Ishak ki amánea.

²Kon tobatú oontongon wakutu in doḷom, ki Allah noguman kon inia, “Yakub, Yakub!” “Ya, Tuhan,” tubagnea.

³“Akuoi ki Allah, inta sinumba i amámu,” guman-Nea. “Dika moondok in mayá kon Mesir. Baḻíon-Ku in buímu bangusa inta moḷoben kon tua.

⁴Takinan-Ku iko mayá in Mesir, bo bui modia mangoi kon buímu mobui mangoi kon butá tanaa. Bo ki Yusup in mogompigbí kon inimu aka wakutumudon.”

⁵Bo nobuatdon in ki Yakub nongkon Bersyeba. Ki adí mita i Yakub nopoponikdon kon i amá bo kon i adí bo buḷoi monia kon bonu in kereta inta pinoki dia mangoi i datu in Mesir.

⁶Mosia in nodia domandon mangoi kon bobiagon bo bayongan kapunyaan inta nouḻí monia kon Kanaan, bodongka nobuat minayá in Mesir. Ki Yakub in nodia kon buínea mita,

⁷bayangan adí bo ompunea ḷoḷaki bo bobay.

⁸Tangoi mita in motoḷuadí i Yakub inta sinumakin minayá in Mesir in:

⁹ki Ruben, adí guya-guyang; ki adínea mita: in ki Henokh, ki Palu, ki Hezron bo ki Karmi.

¹⁰Ki Simeon; ki adínea mita: ki Yemuel, ki Yamin, ki Ohad, ki Yakhin, ki Zohar bo ki Saul, ki adí i buḷoinea intau in Kanaan.

¹¹Ki Lewi; ki adínea mita: ki Gerson, ki Kehat bo ki Merari.

¹²Ki Yohuda; ki adínea mita: ki Syela ki Peres bo ki Zerah, yo ki adí mita i Yohuda ibanea, ki Er bo ki Onan in minatoi kon Kanaan. Ki adí mita i Peres in ki Hezron bo ki Hamul.

¹³Ki Isakhar; ki adínea mita: Ki Tola, ki Pua, ki Ayub bo ki Simron.

¹⁴Ki Zebulon; ki adínea mita: ki Sered ki Elon bo ki Yahleel.

¹⁵Mosia tua in ki adí mita i Lea kon i Yakub inta pinononggadí kon Mesopotamia, koḻikud intua ki adínea doman bobay inta tangoinea ki Dina. Dá bayongan buí i Yakub nongkon i buḷoinea ki Lea kobayongnea in toḷu nopuḷú botoḷú.

¹⁶Ki Gad; ki adínea mita: ki Zipyon, ki Hagi, ki Syuni, ki Ezbon, ki Eri, ki Arodi bo ki Areli.

¹⁷Ki Asyer; ki adínea mita: ki Yimna, ki Yiswa, ki Yiswi bo ki Beria, ki Serah in ki utat monia bobay. Ki adí mita i Beria in ki Heber bo ki Malkiel.

¹⁸Taya mopuḷú bo onom tua in buí i Yakub kon i Zilpa, bobantung bobay inta inogoi Laban kon i Lea, ki adínea bobay tatua.

¹⁹Ki Rahel ki buḷoi Yakub kogadí kon doyowa, ki Yusup bo ki Benyamin.

²⁰Kon Mesir ki Yusup nokouḻí kon doyowa in adí, ki Manasye bo ki Epraim inta pinononggadí i buḷoinea inta ki Asnat in tangoinea, ki adí i Potisaḷaka, inta nobaḻí imang kon Heliopolis.

²¹Ki adí mita i Benyamin; in ki Bela, ki Bekher, ki Asybel, ki Gera, ki Naaman, ki Ehi, ki Ros, ki Mupim, ki Hupim bo ki Ared.

²²Taya mopuḷú bo opat tatua in buí i Yakub nongkon i buḷoinea inta ki Rahel.

²³Noiduduimai kon tua ki Dan; ki adínea in ki Husim.

²⁴Ki Naptali; ki adínea mita: ki Yahzeel, ki Guni, ki Yezer bo ki Syilem.

²⁵Taya pitu tua in buí i Yakub kon i Bilha, bobantung bobay inta inogoi i Laban kon i Rahel ki adínea.

²⁶Buí i Yakub inta minayá in Mesir kobayongnea in onom nopuḷú bo onom in intau, diápabí pinoyoiyap in ki mototakanea mita.

²⁷Ki adí mita i Yusup inta pinononggadí kon Mesir in taya dua, sahingga motoḷuadí i Yakub inta noyaput kon Mesir kobayongnea komintan in pitu nopuḷú.

²⁸Ki Yakub nopotabá kon i Yohuda minayá inumuna kon inia sin mogoiní kon i Yusup sinbá tomuoneadon in ki amánea kon Gosyen. Naonda in mosia nodapot kon Gosyen,

²⁹ki Yusup in sinumakoi kon keretanea sin mayá mokipodungkuḷ kon i amánea kon tua. Onda in mosia noyodungkuḷ, ki Yusup ginumakap kon i amánea bo noonggot in pinongombaḷnea.

³⁰Guman i Yakub kon i Yusup, “Tanaa akuoi diá bidon moondok in matoi, sin inontongkudon iko bo kinotaauankudon kon nobiagpabí in iko.”

³¹Bo ki Yusup in noguman kon i utatnea mita bo kon ginaḷumnea ibanea, “Akuoi in mustidon mayá bo mopotaau kon i datu kon bayongan i utatku mita takin motoḷuadí naton inta nogutun kon Kanaan aindon noiangoi.

³²Pogumankudon kon moiko in gombala mita in domba bo sapi, bo ain nodia kon bobiagon bo bayongan in kapunyaan monimu.

³³Aka ki datu mogoiní kon i monimu bo moḻibó kon oaidanmu,

³⁴potaaudon kon inia kon moiko in mononombobiagon nongkon mointokanmai, notongkai ná mogoguyang monimu. Aka natua dá potabáneadon in moiko mayá mogutun kon butá in Gosyen.” Ki Yusup noguman natua sin intau in Mesir ná pokopoonagonmai aka moyobayat takin gombala mita.