Read Mongondow KINOBAḺIAN 48 Bible Online

KINOBAḺIAN 48 - Mongondow bible

KINOBAḺIAN 48

¹Diá noonggot kon tua pinotaaudon kon i Yusup kon ki amánea in notakitdon moyoyiga. Dá minayádon in sia takin ki adínea doyowa, ki Manasye bo ki Epraim, minayá noḷongow kon i Yakub.

²Naonda in kinodongogandon i Yakub kon ki Yusup namangoi, sinipunnea in bayongan ropotnea bo iḻimitú kon tosiugannea.

³Ki Yakub in noguman kon i Yusup, “Ki Allah Inta Totok in Mokawasa ain nokipogontong kon inakó kon Lus, kon butá in Kanaan, bo ain nomarakat kon inakó.”

⁴Sia in noguman kon inakó nanaa, “Akuoi in mobogoi kon inimu in adí bo ompu inta mobarong, sinbá buímu mobaḻí bangusa inta mobarong; Akuoi in mobogoibí in butá tanaa kon buímu mobaḻí kapunyaan monia inta mononoi.”

⁵Guman bui i Yakub, “Yusup, ki adímu doyowa, ki Epraim bo ki Manasye inta noilahir kon Mesir naa kon dodai in akuoi diápa noyaput kon naa, inanggapkubí ná ki adíku tontaní, pinodayan ná ki Ruben bo ki Simeon.

⁶Aka iko buipa mokouḻí kon adí mita, yo mosia in diá bidon anggaponku ki adíku mita táe tatap bidon ki adímu; tonsilai kon i monia in tarimaan monia nongkon i Epraim bo nongkon i Manasye.

⁷Tua mita pinomiaku sin ki Rahel ki inámu. Kon binayáanku nobui nongkon Mesopotamia, ki inámu minatoi kon butá in Kanaan, diá noyayú nongkon Eprata, bo totok in norobonoḷ in ginaku. Iḷobongku in sia kon tua, kon bingkí in daḷan mayá ná Eprata.” (Tanaa mako Eprata tua in Betlehem.)

⁸Naonda in ki Yakub nokoontong kon i adí mita i Yusup tatua, sia noḻibó, “Ki ine in adí mita tanaa?”

⁹Tubag i Yusup, “Naa in ki adíku mita inta inogoi i Allah kon inakó kon naa, kon Mesir.” Ki Yakub in noguman, “Podiugdon mangoi kon inakó in mosia sinbá barakatanku.”

¹⁰Pooindoi i Yakub diádon mosilangmai sin ain mogoguyang bo matanea nobuḷoḷowdon. Ki Yusup in nopodiug kon i adínea mita tatua kon i Yakub, bo kinoyotannea in mosia poḷat inayokannea.

¹¹Bo ki Yakub in nogumandon kon i Yusup, “Totok bidon diá kon gina-ginaku mako kon buipa akuoi moyodungkuḷmu, táe tanaa ki Allah nobogoipa doman in wakutu kon inakó noyodungkuḷ i adímu mita.”

¹²Onda intua ki Yusup nogamá kon i monia nongkon kokoyo-koyot i Yakub, bo sia doman tontaní sinumungkud kon tayowon i amánea.

¹³Nopaḷut mako kon tua ki Yusup in nopodiug kon i adínea mita kon i Yakub, ki Epraim inta ai-ai kon dotá in koḷoigi bo ki Manasye inta guya-guyang kon dotá in koḷanan. Táe ki Yakub nopoyotanga in kokaḷnea bo nopoukat in ḻimanea koḷanan kon uḷu i Epraim, bo ḻimanea koḷoigi in pinoukatnea kon uḷu i Manasye.

¹⁵Nopaḷut mako kon tua binarakatannea in ki Yusup,[97] gumannea, “Ki Allah, Sia tuata in ki Tuhan, inta sinumba i Abraham bo i Ishak, Sia tuata inta nokapit kon inakó dapot in tanaa mako;

¹⁶Sia tuata in malaekat inta ain nomilat kon inakó nongkon bayongan bodito. Poigumon mako ki Allah tatua in momarakat kon adí mita tanaa. Poigumon mako umuran mobiag in tangoiku bo tangoi i Abraham bo i Ishak sin adí mita tanaa! Poigumon mako mosia in mononggadí mononggompu, bo momuí mobarong kon dunia naa.”

¹⁷Diá nosanang gina i Yusup nokoontong kon i amánea nopoukat in ḻimanea koḷanan kon uḷu i Epraim; dá kinadaiannea in ḻima i amánea sin pampingon kon uḷu i Manasye.

¹⁸Sia in noguman kon i amánea, “Donaai natua, Papa. Naabí in adí guya-guyang; poukatdon in ḻima i Papa koḷanan kon uḷunea.”

¹⁹Táe ki amánea noguman, “Kinotaauankubí uḻeku, kinotaauankubí. Ki Manasye in mobaḻí moḷoben in kawasanea bo buínea in mobaḻíbí doman bangusa inta moḷoben. Táe kawasabí i ai-ainea in moḷobe-ḷoben nongkon kawasanea, bo buí i ai-ainea in mobaḻí bangusa mita inta moḷoben.”

²⁰Bo binarakatanneadon bui in adí mita tatua kon singgai tatua, gumannea, “Intau mita Israel in monangoidon kon tangoimu aka mosia momarakat kon intau. Mosia in mogumanbí, ‘Poigumon mako ki Allah mopobaḻí kon inimu naonda ki Epraim bo ki Manasye.’ ” Kon tosingogonnea tatua noniatadon kon ki Yakub nopounadon kon i Epraim nongkon i Manasye.

²¹Bo ki Yakub nogumandon kon i Yusup, “Ná inta inontongmu tanaa, wakutuku matoi nodiugdon, táe ki Allah in motuḷungbí kon i monimu bo modia bui kon i monimu mayá in butá in mogoguyangmu.

²²Kon inimubí nion, bo deemanbí kon i utatmu mita, ogoiku kon inimu in Sikhem, butá inta moḷumbá tatua inta ain inagowku nongkon intau mita in Amori takin kedang bo piotku.”