Read Mongondow KINOBAḺIAN 49 Bible Online

KINOBAḺIAN 49 - Mongondow bible

KINOBAḺIAN 49

¹Noiduduimai kon tua ki Yakub nogoiní kon i adínea mita bo noguman, “Poyosipundon kon naa, kon diugku. Potaaukudon kon i monimu onu in kobayáan monimu kon singgai moiduduimai:

²Poyosipundon uḻe in moiko, ei adí mita i Yakub Indongogaidon in ki Israel, ki amá monimu.

³Ruben, ki adíku inta guya-guyang, ikobí in ropotku, bungai uḷuan in ḷoḷakiku. Iko in moroton totok bo moropot kon sigad in bayongan adíku mita.

⁴Iko in mogampang moḻimbok naonda bo tubig, sahingga in deemandon iko inta totok in moponting; sin iko ain nosiug takin i buḷoiku inta bobantung tua, kinotoranmudon tosiugan i amámu.

⁵Ki Simeon bo ki Lewi mogutat; abit monia in aid motogat.

⁶Akuoi in diábí dumudui kon pinoyopakatan monia, diá doman tumuot kon pinoyosipunan monia. Sin mosia in noḻimod popisí in dinia in yaat in gina, mopotungkud in bantong sin tua in mokosanang kon i monia.

⁷Katuḷaandon in torú monia tatua, sin moiḻiudon totok natua. Katuḷaandon in rogi moḷoben monia tua, sin moraatdon totok. Poyayitonkudon in mosia kon sigad i adí mita i Yakub. Bo moponabud kon i monia kon sigad in adí mita i Israel.

⁸Yohuda, iko in modomok kon sindun in musungmu; ki utatmu mita in moduí kon inimu bo tumungkud kon tayowonmu.

⁹Ki Yohuda naonda bo singa batánea; sia in moḻimod kon kokaanonnea bodongka bui mayá kon dumunnea; sia momuḻikai bodongka umuḻid, bo diá tobatúmai intau mokobaḻí monuyayow kon inia.

¹⁰Ki Yohuda in mokadai kon tungkud in dodatuan, Buínea in momarenta dapot in mononoi. Bangusa mita in modia mangoi kon pajak,[98] bo tumungkud takin moondok kon tayowonnea.

¹¹Ki adí in keledainea sinogotnea kon pangkoi, pangkoi in anggur inta totok in mopia. Sia in nomatá kon pakeangnea takin momaké in anggur, anggur ná kopura in dugú.

¹²Mopura in matanea sin nonginum kon anggur, nobudó ingiponnea sin nonginum kon susu.[99]

¹³Ki Zebulon in mogutun kon diug in dagat; kapaḷ mita in sinumubu kon pintadnea; modapot kon Sidon in sigad toḻibutánea.

¹⁴Ki Isakhar tua in naonda bo keledai moropot inta inumuḻid kon sigad in karansi mita pobobonuan kon datognea.

¹⁵Inindoiannea totuu mopia in tampat tatua bo totuu mogaga in butá tatua, dá kumuyungdon in sia bo moibogdon popotakoian in datog, bo pakisaan mogaid saḷaku bobantung.

¹⁶Iko Dan, mononantú kon taḷá in bangusamu, iko in mobaḻí suku ná suku ibanea kon Israel.

¹⁷Iko naonda bo uḷag kon bingkí in daḷan, uḷag mobisa kon bingkí in lorong, inta monobak kon singkod in kabaḷo modapot in moigarab in intau inta sinumakoi.

¹⁸O Tuhan, kasaḷamatan inta inogoi-Mu, tuata inta inoḷatku mako.

¹⁹Gad, iko in tubuon in mogogagow, tongá ikobí in bui mogagow kon i monia.

²⁰Asyer, kaanonmu mobarong totok, iko in moposadia kon kaanon in datu mita.

²¹Naptali, naonda bo rusa nokobuḻi, tumongo ḷunat in ki adínea mita.[100]

²²Ki Yusup naonda bo keledai inta batánea, keledai kaḻig kon diug in bokaká, noribatuk kon aḻet in buḷud.[101]

²³Umpaka totokdon tubuon in musung, aḷowan monia bo pioton.

²⁴Táe kokaḷ[102] i Yusup umuran motorindog, umuran moropot in piotnea, sin kawasa I Gombala Inta totok in moropot, ki Allah i Yakub, in Mogogoḻiung in Israel.

²⁵Ki Allah i amámu motuḷung kon inimu; Inta Totok in Mokawasa momarakat kon inimu takin mobogoi in uyan nongkon ḷangit bo tubig nongkon ḻimonag in butá. Takin adí bo sapi,

²⁶gandum bo bungang.[103] Barakat i Allah i amámu moiḻiu kon kaoyúonan in buḷud mita inta totokdon in noonggot.[104] Poigumon mako moponagdon in bayongan barakat tatua kon uḷu i Yusup, kon ḻimonik in pogotnea. Siata in noiḷontú kon i utatnea mita.

²⁷Ki Benyamin in serigala inta morogi. Kon wakutu in doḷo-doḷom sia modomok kon kokaanonnea. Onda in doḷom silaionnea intua magí-mako.”

²⁸Tuata in suku Israel inta mopuḷú bodoyowá, bo tosingogon inta siningog i amá monia bo poḷat nobogoi in barakat pangabisan kon i monia kon batúannea.

²⁹Onda intua ki Yakub nongoyow kon i adínea mita, “Diádon moonggot in akuoi bo matoidon ná mogoguyangku. Ḷobongdon in akuoi kon símai monia kon bonu in angob kon Makhpela, kon dotá in pomukaan kon Mamre kon butá in Kanaan. Ki Abraham ain notaḷui kon angob bo gobá kon diugneamai nongkon i Epron intau in Het sin baḻíon tampat poḷoḷobongan.

³¹Kon tua in pinoḷobongan kon i Abraham bo kon i Sara, kon i Ishak bo kon i Ribka; bo kon tua doman pinoḷobonganku kon i Lea.

³²Gobá bo angob inta kon tua ain sinaḷui nongkon intau in Het. Ḷobongdon in akuoi kon tua.”

³³Naonda in ki Yakub nopaḷut nobogoi in koyow kon i adínea mita, inumuḻidon in sia bodongka minatoi.