Read Mongondow KINOBAḺIAN 5 Bible Online

KINOBAḺIAN 5 - Mongondow bible

KINOBAḺIAN 5

¹Naadon in buí mita i Adam. [Kon tungkuḷ in ki Allah nomia kon intau, pinomia-Nea in mosia notombatangan-Nea tontaní.

²Pinomia-Nea in mosia ḷoḷaki bo bobay. Binarakatan-Nea in mosia bo sinangoian “Intau”.]

³Naonda in ki Adam umurdon mogatut bo toḷu nopuḷú notaong, nokouḻídon in sia kon adí ḷoḷaki inta notombatangannea, bo sinangoiannea ki Set.

⁴Nopaḷut mako kon tua ki Adam in nobiagpa waḷu nogatut notaong bo buipa doman nokouḻí kon adí mita ibanea.

⁵Sia in minatoi kon umur siow nogatut bo toḷu nopuḷú notaong.

⁶Kon tungkuḷ in ki Set umur mogatut bo ḻima notaong, nokouḻí in sia kon adí ḷoḷaki, tangoinea in ki Enos.

⁷Naonda in ki Set nobiagpa kon bonu in waḷu nogatut bo pitu notaong, nokouḻípa in sia kon adí mita ibanea mako.

⁸Sia in minatoi tungkuḷ in umurdon siow nogatut bo mopuḷú bodoyowá notaong.

⁹Kon tungkuḷ in ki Enos umurdon siow nopuḷú notaong, nokouḻí in sia kon adí ḷoḷaki, tangoinea in ki Kenan.

¹⁰Nopaḷut mako kon tua ki Enos in nobiagpa waḷu nogatut bo mopuḷú bo ḻima notaong bo nokouḻípa bui kon adí mita ibanea.

¹¹Sia in minatoi tungkuḷ in umurdon siow nogatut bo ḻima notaong.

¹²Kon tungkuḷ in ki Kenan umurdon pitu nopuḷú notaong, sia in nokouḻí kon adí ḷoḷaki, tangoinea in ki Mahalaleel.

¹³Ki Kenan in nobiagpa waḷu nogatut bo opat nopuḷú notaong bo nokouḻípa bui kon adí mita ibanea.

¹⁴Sia in minatoi tungkuḷ in umurdon siow nogatut bo mopuḷú notaong.

¹⁵Kon tungkuḷ in ki Mahalaleel umur onom nopuḷú boḻima notaong, sia in nokouḻí kon adí ḷoḷaki, tangoinea in ki Yared

¹⁶Nopaḷut mako kon tua ki Mahalaleel nobiagpa waḷu nogatut bo toḷu nopuḷú notaong bo nokouḻípa kon adí mita ibanea.

¹⁷Sia in minatoi tungkuḷ in umurdon waḷu nogatut bo siow nopuḷú boḻima notaong.

¹⁸Kon tungkuḷ in ki Yared umurdon mogatut bo onom nopuḷú bodoyowá notaong, sia in nokouḻí kon adí ḷoḷaki, tangoinea ki in Henokh.

¹⁹Nopaḷut mako kon tua ki Yared nobiagpa waḷu nogatut notaong bo nokouḻípa bui kon adí mita ibanea.

²⁰Sia in minatoi kon tungkuḷ in umurdon siow nogatut bo onom nopuḷú bodoyowá notaong.

²¹Kon tungkuḷ in ki Henokh umurdon onom nopuḷú boḻima notaong, sia in nokouḻí kon adí ḷoḷaki tangoinea in ki Metusalah.

²²Onda intua ki Henokh in nobiag notobatú takin i Allah kon bonu in toḷu nogatut notaong. Sia in nokouḻí kon adí ḷoḷaki mita ibanea

²³bo umurnea nodapot in toḷu nogatut bo onom nopuḷú boḻima notaong.

²⁴Pinopisí in ki Henokh umuran nobiag modagin kon i Allah, dá diádon in sia kon dunia naa sin diniadon i Allah.

²⁵Kon tungkuḷ in ki Metusalah umurdon mogatut bo waḷu nopuḷú bo pitu notaong, sia in nokouḻí kon adí ḷoḷaki, tangoinea ki Lamekh.

²⁶Onda intua ki Metusalah nobiagpa pitu nogatut bo waḷu nopuḷú bodoyowá notaong, sia in buipa nokouḻí kon adí mita ibanea.

²⁷Sia in minatoi tungkuḷ in umurdon siow nogatut bo onom nopuḷú bo siow notaong.

²⁸Kon tungkuḷ in ki Lamekh umur mogatut bo waḷu nopuḷú bodoyowá notaong, nokouḻí in sia kon adí ḷoḷaki.

²⁹Ki Lamekh in noguman, “Adí tanaa mokogaat kon saged naton kon dodai in kita rumoriga in mogaid mononggobá kon butá inta kinutuk i TUHAN.” Tuamai sinangoian i Lamekh in adí tatua ki Nuh.[19]

³⁰Onda intua ki Lamekh nobiagpa ḻima nogatut bo siow nopuḷú boḻima notaong. Sia in buipa nokouḻí kon adí mita ibanea,

³¹bo minatoi dodai in umurdon pitu nogatut bo pitu nopuḷú bopitu notaong.

³²Naonda in ki Nuh umurdon ḻima nogatut notaong, sia in nokouḻí kon adí ḷoḷaki toḷu, tangoi monia ki Sem, ki Yapet bo ki Ham.