Read Mongondow KINOBAḺIAN 50 Bible Online

KINOBAḺIAN 50 - Mongondow bible

KINOBAḺIAN 50

¹Ki Yusup inumuḻid bo nonggakap kon i amánea poḷat nongombaḷ bo nongayok kon pogot i amánea.

²Ki Yusup in nomarenta kon intau mita inta mononompia kon mayat sinbá pakéandon in bahan mita inta ponahang kon mayat bá diá mobondot in mayat i Yakub.

³Oaidan tatua modait motoḻisí kon bonu opat nopuḷú nosinggai, tuata in wakutu inta biasamai pakéon monompia kon mayat. Intau in Mesir nongombaḷ kon i Yakub, pitu nopuḷú nosinggai in koonggotnea.

⁴Naonda in nopaḷut in wakutu pinonogumatoian, nogumandon in ki Yusup kon pogawai mita i datu, “Poyaputdon in koyow tanaa kon i datu,

⁵‘Tungkuḷ in ki amáku motoyongdon matoi, pinoigumneadon kon inakó sinbá akuoi in modandi kon inia, kon akuoi in mustibí moḷobong kon inia kon bonu in poḷoḷobongan inta ain sinadianea kon butá in Kanaan. Tuamai, ogoiaipa akuoi in wakutu mayá moḷobong kon i amáku. Mopaḷut mako kon tua akuoi in buibí mamangoi.’ ”

⁶Bo ki datu in nogumandon, “Bayádon poḷobong kon i amámu ná inta ain pinodandimu kon inia.”

⁷Bo minayádon in ki Yusup sin moḷobong kon i amánea. Komintan pogawai i datu, guhanga mita kon komaḻig bo bayongan intau moḷoben kon Mesir, minayá noyotakin i Yusup.

⁸Buḷoi, adí, utat mita i Yusup bo ginaḷum motoḷuadí inta ibanea minayá doman. Tongádon adí mita mointok bo bobiagon monia in sinaḷáan kon butá in Gosyen.

⁹Rombongan inta sinumakoi kon kereta bo inta sinumakoi kon kabaḷo sinumakin doman, dapot in pipidan intau mita inta sinumakin totok in moḷanggó.

¹⁰Naonda in mosia nodapot kon tampat pobobantingan in intau kon gandum kon Goren-Haatad, kon dotá in pomukaan kon Ongkag in Yordan, mosia in nongombaḷ takin kuyang in gina bo takin doman ombaḷ moropot. Ki Yusup nomia kon pinonusaan, pitu nosinggai in koongotnea.

¹¹Naonda intau mita in Kanaan nokoontong kon kinopatoian kon Goren-Haatad tatua, mosia in noguman, “Totokdon in mokokuyang kon gina in kinopatoian intau in Mesir tatua!” Tuamai tampat tatua sinangoian Abel-Mizraim.[105]

¹²Natuadon ki adí mita i Yakub nomia kon onu in tongkoyow i Yakub kon i monia.

¹³Mosia in nodia kon mayatnea pinobayá in Kanaan bo iḷobong kon bonu in angob in Makhpela, kon dotá in pomukaan kon Mamre, kon gobá inta ain sinaḷui i Abraham kon i Epron intau in Het tatua, sin baḻíon poḷoḷobongan.

¹⁴Nopaḷut mako in ki Yusup noḷobong kon i amánea, sia in nobuidon minayá in Mesir noyotakin i utatnea mita bo bayongan intau inta noyotakinnea minayá kon pinoḷobongan kon i amánea tua.

¹⁵Naonda in ki amá monia minatoi, ki guya-guyang mita i Yusup in noguman, “Naonda-ondadon mako aka kuma ki Yusup umuran motagú mako kon gina bo moibog monuḻí kon aid moraat naton koḻipod?”

¹⁶Tuamai in mosia nokidia in koyow tanaa kon i Yusup, “Kon dodai in ki amá naton diápa minatoi,

¹⁷sia in nopotabá kon inami mopotaau kon inimu in koyow tanaa, ‘Ampungaidon in taḷá koḻipod inta ain inaidan i guya-guyangmu kon inimu.’ Dá saḷaku bobantung mita i Allah inta sinumba i amá naton, kami in mopoigum, ampungaidon in taḷá inta ain inaidan nami.” Ki Yusup in nongombaḷ kon dodai in notarima kon koyow tatua.

¹⁸Bo ki utatneadon in namangoi tontaní bo sinumungkud kon tayowonnea takin noguman, “Kami naa in bobantungmu.”

¹⁹Táe ki Yusup in noguman kon i monia, “Dikabí moondok; sin akuoi in diábí motaau gumamá hak ná ki Allah.

²⁰Moiko ain noyopakat sin mogaid kon inta moraat kon inakó, táe ki Allah ain nomaḷui kon inta moraat tua nobaḻí kopiaan, sinbá pinongin onu inta ain nobaḻí koḻipod tua mobayong intau inta nobiag masai naa in motaau posaḷamaton.

²¹Donaai mosingkúang mako in gina. Posadiaankubí in moiko kon onu inta paraḷu pakéon monimu motoḷuadí.” Natuata in pinoḷoḻipoi i Yusup kon ondok i utatnea mita. Sia nopoyaput in tosingogon tatua takin dodia moaḷus bo ḷukó in pososingog.

²²Ki Yusup umuran nogutun kon Mesir takin i utatnea mita; sia in nobiag dapot in umur mogatut bo mopuḷú notaong.

²³Sia in nokooḷat bo nokoontongpa kon i adí bo ompu i Epraim. Ná doman tua ki adí mita i Makhir, inta ki ompu i Manasye sinompianeapamai ná ki adínea tontaní.

²⁴Gumannea kon i utatnea mita, “Wakutuku matoi nodiugdon, táe ki Allah pastibí kon umuranbí moḷukad kon i monimu bo modia kon i monimu ḷumuai nongkon butá tanaa, bo mayá in butá inta ain pinodandi-Nea takin nongibot kon i Abraham, kon i Ishak bo kon i Yakub.”

²⁵Bo ki Yusup nopoigum kon bayongan adí bo utatnea nongibot, kainia, “Podandidon kon inakó, kon aka ki Allah modiadon kon i monimu mayá in butá tatua, yo poyodiaan domandon monimu in tuḷanku mita.”

²⁶Onda intua minatoidon in ki Yusup kon Mesir kon dodai in umurdon mogatut bo mopuḷú notaong. Mosia in nonompia kon mayat tatua takin nomaké in bahan mita inta biasamai pakéon kon intau minatoi. Bahan mita tatua binonu monia kon poti intau minatoi.