Read Mongondow KINOBAḺIAN 6 Bible Online

KINOBAḺIAN 6 - Mongondow bible

KINOBAḺIAN 6

¹Naonda intau nodugangdon nobarong kon dunia naa, bo adí mita bobay noilahir domandon,

²mahaḷuk mita i allah[20] in nokoontong kon adí mita bobay tatua mongoḷunat. Bo mulai tonibuḷoion monia in mongodeaga mita inta koibog monia.

³Dá ki TUHAN in noguman, “Diábí ogoi-Ku in intau mobiag mononoi; mosia tua in mahaḷukbí ilo-ilow, inta musti matoi. Nongkon tanaa mako umur monia in diá bidon moiḻiu kon mogatut bodoyowá nopuḷú notaong.”

⁴Kon zaman intua, bo kon noiduduimai kon tua, oyúon in intau mita inta mongo itoi bo mongoḷoben kon dunia naa. Mosia tua in buí in bobay mita inta notonibuḷoi takin i adí mita i allah. Intau mita inta moitoi bo moḷoben tua in mongoroton bo ponango-nangoian kon tungkuḷ intua.

⁵Inontong i TUHAN kon totokdon moraat in intau mita kon dunia naa; bayongan in raian monia umurandon moraat.

⁶Nomanasaḷdon in Sia nomia kon i monia bo nonampat kon i monia kon dunia naa. Totok nomanasaḷ in Sia,

⁷dapot in Sia noguman, “Yopúon-Kudon in intau inta ain pinomia-Ku tua, bo takin doman bayongan in ḷagapan bo mahaḷuk mita ibanea, sin Akuoi in nomanasaḷdon ain nopomia kon i monia.”

⁸Táe kobobiag i Nuh in nokosanang kon gina i TUHAN.

⁹Naadon in ouman soaḷ ki Nuh. Sia in kogadí kon ḷoḷaki taya toḷu, tangoi monia ki Sem, ki Yapet bo ki Ham. Ki Nuh in diá nogaid kon onu inta noitaḷá, bo tongádon sia in intau mopia kon tungkuḷ intua. Sia in nobiag modagin kon i Allah.

¹¹Táe bayongan intau ibanea komintandon moraat inontong i Allah, bo kobobiag inta moromú nobaḻídon kon bayongan in tampat.

¹²Ki Allah in noindoi kon dunia naa bo tongádon nokoontong kon onu inta moraat, sin bayongan intau moraatdon in kobobiag monia.

¹³Bo ki Allah in noguman kon i Nuh, “Sinimpod-Kudon in singog kon daiton-Kudon paḷuton kobiagan in bayongan mahaḷuk. Yopúon-Kudon in mosia takin butá naa, sin butá naa nopuḻingdon in oaid monia inta moromú.

¹⁴Pogaidon iko kon uangga moḷoben tobatú kon inimu, aidai nongkon kayu inta morigon bo mopira; bo bonu in uangga tatua aidai ḷonga-ḷongaton, bo aipai in aspal dotá in bonunea bo dotá in ḷuainea.

¹⁵Uangga tatua kobanatnea musti mogatut bo toḷu nopuḷú bo toḷu nometer, bo oḷadnea in doyowa nopuḷú bodoyowá nometer bo ḷantudnea in mopuḷú botoḷú nometer.

¹⁶Atopai in uangga tatua, bo tonsigadnea togogopat nopuḷú bo opat nosenti pomuḷoi in atop[21] bo dindingnea mita. Uangga tatua pomia toḷu noḷandak, bo aidai doman in tobatú ḷoḻingkop kon sínea.

¹⁷Poangoi-Ku in ḷunud moḷoben sin poyopú kon bayongan in mahaḷuk inta nobiag kon dunia naa. Bayongan yagi-yagi kon dunia naa modaitbí matoi,

¹⁸táe Akuoi in mogaid kon dodandian takinmu. Tuotdon kon bonu in kapaḷ tatua takin ki buḷoimu, ki adímu mita takin ki buḷoi monia mita.

¹⁹Dia doman kon bonu in uangga tatua in ḷagapan bo bayongan mahaḷuk ibanea tumongo par koḷakian bo kobaayan, sinbá mosia diá doman moitakin moyopú.

²¹Podia doman kon bayongan kokaanon monimu bo kaanon in bayongan mahaḷuk tatua.”

²²Ki Nuh in dinumudui poḷat nogaid kon bayongan inta pinoki aid i Allah kon inia.