Read Mongondow KINOBAḺIAN 7 Bible Online

KINOBAḺIAN 7 - Mongondow bible

KINOBAḺIAN 7

¹Bo ki TUHANin noguman kon i Nuh. “Inontong-Kudon kon dongkadon iko tontaní in intau inta nogaid kon onu inta kinoibog-Ku. Dá, tuotdon kon bonu in uangga tatua in moiko motoḷuadí.

²Diaan doman in pitu nogapang nongkon bayongan ḷagapan bo mahaḷuk ibanea inta diá haram, yo onda inta haram tongádon tumongo gapang in torupa. Aidai intua sinbá nongkon bayongan in mahaḷuk oyúon in diá moitakin yopúon bo mosia in buipa doman mobiag bo mobaḻí mobarong kon dunia naa.

⁴Pitupa nosinggai bo poonag-Ku in uyan inta diá motonta-tontá kon bonu in opat nopuḷú nosinggai bo opat nopuḷú nogobii, sinbá mahaḷuk nobiag inta ain pinomia-Ku tua in modait matoi.”

⁵Bo ki Nuh in nogaid kon bayongan inta pinoki aid i TUHAN kon inia.

⁶Umur i Nuh onom nogatut notaong tungkuḷ in kinobaḻian in ḷunud moḷoben tatua kon dunia naa.

⁷Ki Nuh bo ki buḷoinea, bo ki adínea mita takin ki buḷoi monia mita, sinumuot kon bonu in uangga moḷoben tatua sinbá mosaḷamat nongkon ḷunud moḷoben tatua.

⁸Tobatú in tuḷug bo tobatú in toina kon bayongan ḷagapan bo mahaḷuk ibanea — pinomayá inta halal ande inta haram —

⁹sinumuot kon bonu in uangga moḷoben noyotakin i Nuh, podudui in guman i Allah.

¹⁰Pitu nosinggai noiduduimai kon tua noiangoidon in ḷunud moḷoben totok kon dunia naa.

¹¹Kon tungkuḷ in ki Nuh umur onom nogatut notaong, kon tanggal mopuḷú bopitu buḷan nogindua, nobokatdon in bayongan bokaká kon ḻimonag in butá naa. Bayongan ḷoḻingkop in tubig kon ḷangit nobukat,

¹²bo uyan namonag kon bonu in opat nopuḷú nosinggai bo opat nopuḷú nogobii.

¹³Kon singgai doman tatua, ki Nuh bo ki buḷoinea sinumuot kon bonu in uangga moḷoben tatua takin ki adínea taya toḷu, ki Sem, ki Yapet bo ki Ham takin ki buḷoi monia mita.

¹⁴Noyotakin doman monia sinumuot in bayongan ḷagapan bo mahaḷuk ibanea, pinomayá inta moyonok ande inta kaḻig, inta moḷoben ande inta mointok.

¹⁵Tobatú in koḷakian bo tobatú doman in kobaayan nongkon bayongan rupa in mahaḷuk sinumuot kon bonu in uangga moḷoben tatua noyotakin i Nuh,

¹⁶podudui in parenta i Allah kon inia. Naonda in komintandon sinumuot, iḻingkopandon i TUHAN in ḷoḻingkop in uangga moḷoben tatua.

¹⁷Ḷunud tatua in umuran nonagom kon dunia naa kon bonu in opat nopuḷú nosinggai bo opat nopuḷú nogobii, bo tubig nobaḻídon totok moḷantud nodapot in uangga moḷoben tatua iḷumantakdon mako.

¹⁸Tubig kodugang-kodugangdon in koḷantudnea, bo uangga moḷoben tatua in iḷumantakdon mako kon tudu in tubig.

¹⁹Tubig tatua umuranpa doman modugang moḷantud, nodapot in nodaitneadon sinaḷom in bayongan buḷud mita inta totok in moḷantud.

²⁰Tubig umuran doman modugang modapot in koḷantudnea nodapotdon pitu nometer nongkon tudu in buḷud mita inta totok moḷantud

²¹Ki TUHAN noyopú kon bayongan in mahaḷuk inta nobiag kon dunia naa: Intau, ḷagapan bo mahaḷuk mita kon toba pinomayá mointok ande moḷoben. Inta diá minatoi in tongá bidon ki Nuh bo bayongan inta noyotakinnea kon bonu in uangga moḷoben tatua.

²⁴Tubig tatua diá nopona-ponag in koḷantudnea kon bonu in mogatut boḻima nopuḷú nosinggai.