Read Mongondow KINOBAḺIAN 8 Bible Online

KINOBAḺIAN 8 - Mongondow bible

KINOBAḺIAN 8

¹Ki Allah in diábí nokoḻiong kon i Nuh bo bayongan in mahaḷuk inta noyotakinnea kon bonu in uangga moḷoben tatua. Binaḻí i Allah in tompot nogirup, dá tubig tatua in momangkoidon momiot.

²Komintan bokaká kon ḻimonag in tubig bo bayongan ḷoḻingkop in tubig kon ḷangit iḻingkopan-Nea. Uyan in notontádon,

³bo tubig kogiot-kogiot domandon. Naonda in mogatut boḻima nopuḷú nosinggai tubig in diádon totok noḷantud.

⁴Kon tanggal mopuḷú bopitu buḷan nogimpitu, uangga moḷoben tatua in noikondad kon tudu in buḷud tobatú inta tangoinea buḷud in Ararat.

⁵Tubig in umurandon kogiot-kogiot bo kon tanggal imitanea buḷan nogimpuḷú, tudu mita in buḷud momangkoidon koontongan.

⁶Naonda in opatdon nopuḷú nosinggai, ki Nuh in nomukat kon tobatú jandela in uangga moḷoben tatua,

⁷bo nomuḻi kon ḷagapan kawag. Ḷagapan tatua diá bidon nobui mangoi kon uangga tatua, sia in tantú bidon iḷumayug magí mako nodapot in tubig tatua nogiotdon totu-totuu.

⁸Kon dodai intua, ki Nuh bui nomuḻi kon ḷagapan paḷoma tobatú sin monotaau mongo tubig tatua in totu-totuudon nogiot.

⁹Táe pinopisí in tubig umuranpa doman nonagom mako kon tudu in butá, dá ḷagapan tatua in diá nokouḻí kon pinonguyomanea. Dá nobuidon in sia kon uangga; Ki Nuh nopoḷuai in ḻimanea sinbá dompáan in ḷagapan tatua bo ḷagapan tatua in buineadon dinia pinotuot kon bonu in uangga.

¹⁰Ki Nuh in nogoḷatpa bui pitu nosinggai nongkon tua, bodongka bui nomuḻi kon ḷagapan paḷoma tatua.

¹¹Kon dodai in ḷoḷabungnea ḷagapan tatua nobui mangoi kon i Nuh takin kodia-dia in daun zaitun topatá inta koḷuno-ḷunowpa, daun tatua pinangkoknea bo dinia. Tanaa kinotaauandon i Nuh kon tubig aindon nogiot totok.

¹²Naonda in nogoḷatpa pitu nosinggai bui nongkon tua, bui in sia nomuḻi kon ḷagapan paḷoma tatua; bo kon tua ḷagapan tatua diádon nobui mangoi kon inia.

¹³Kon dodai in ki Nuh umurdon onom nogatut bo tobatú notaong, kon tanggal tobatú buḷan tobatú doman, tubig totu-totuudon nogiot. Ki Nuh in nomukat kon atop in uangga tatua, bo nobobui magí-mako kon ḻibunea. Inontongnea tudu in butá noingkagdon.

¹⁴Kon tanggal doyowa nopuḷú bopitu buḷan nogindua, butá in totu-totuudon noingkag.

¹⁵Bo ki Allah in nogumandon kon i Nuh,

¹⁶“Ḷuaidon nongkon uangga tanaa moyotakin i buḷoimu, i adímu mita takin ki buḷoi monia mita.

¹⁷Diadon ḷumuai in bayongan ḷagapan bo mahaḷuk mita ibanea, moḷoben ande mointok, sinbá mosia in modugangdon mobarong kon dunia naa.”

¹⁸Bo iḷumuaidon ki Nuh nongkon uangga tatua noyotakin i buḷoinea, i adínea mita takin i buḷoi monia.

¹⁹Bayongan in ḷagapan bo mahaḷuk in toba iḻumuai nongkon uangga tatua, mosia iḻumuai podudui in rupanea tontaní.

²⁰Ki Nuh noposindog in mezbah tobatú kon i TUHAN. Sia in nogamá kon tumongo batu nongkon sigad in ḷagapan bo mahaḷuk mita ibanea inta halal, bodongka pinosumbanea saḷaku kuruban inta sinubá kon tudu in mezbah tatua.

²¹Bó mobondu in kuruban sosumba tatua nokosanang kon gina i TUHAN, bo Sia in nosingog kon bonu in gina, “Akuoi in diá bidon bui mongutuk kon dunia naa popisí in oaid intau; kinotaauan-Ku, kon nongkon sia noguodpamai, raian intau tua in moraatbí. Diá bidon mokoimontanmai in Akuoi moyopú kon bayongan mahaḷuk inta nobiag ná inta bagu-Ku inaidan tanaa.

²²Kon tungkuḷ in dunia naa oyúon, umuranbí oyúon in sempo monompinomuḷa bo monoḻisí kon bungai in pinomuḷa, oyúon in sempo in tumping bo sempo in patú, sempo in poninggai bo sempo in uagat, singgai bo doḷom.”