Read Mongondow KINOBAḺIAN 9 Bible Online

KINOBAḺIAN 9 - Mongondow bible

KINOBAḺIAN 9

¹Ki Allah in nomarakat kon i Nuh bo kon i adínea mita takin noguman, “Pononggadí bo pononggompudon inta kobarongon, sinbá buímu in mogutun kon dunia naa.

²Bayongan ḷagapan bo toyá takin mahaḷuk mita ibanea moondokbí kon inimu. Mosia in komintanbí kon bonu in kawasamu.

³Bayongan intua motaaubí mobaḻí kokaanonmu, ná doman tua in mobobiag mita inta nongoḷunow; bayongan tua in ogoi-Ku kon inimu sin baḻíon kokaanonmu.

⁴Inta diá motaau kaanonmu in tongábí tapú inta oyúonpa in dugúnea, sin nyawa tua in kon bonubí in dugú.

⁵Pomuḷoi intau bo mahaḷuk inta moḻimod kon intau in hukumon-Kubí dapot in matoi.

⁶Intau in pinomia ná batangan-Ku; tuamai, ki ine in moḻimod kon intau, yo sia tua in ḻimodon doman in intau.

⁷Iko in musti mononggadí bo mononggompu inta mobayong, sinbá buímu in mogutun kon dunia naa.”

⁸Ki Allah in noguman kon i Nuh bo kon i adínea mita,

⁹“Tanaa Akuoi in mogaid kon dodandian-Ku takin i monimu bo takin buímu,

¹⁰bo takin bayongan in mahaḷuk inta nobiag, tuata in ḷagapan mita bo bayongan mahaḷuk kon toba, mangaḻenea in bayongan inta iḻumuai nongkon uangga moḷoben noyotakin monimu.

¹¹Naadon in dodandian-Ku takin i monimu: Akuoi in modandi kon bayongan in mahaḷuk inta nobiag diá bidon yopúon-Ku takin mopoangoi in ḷunud moḷoben. Diá bidon poangoi bui in ḷunud moḷoben inta mokoyopú kon dunia naa.

¹²Nobaḻí tanda dodandian mononoi, inta pomiaan-Ku takin i monimu bo takin bayongan in mahaḷuk inta nobiag,

¹³dá aḻibobag ukaton-Ku kon goḷom mobaḻí tanda dodandian-Ku takin dunia naa.

¹⁴Aka kon singgai moiduduimai bo poangoi-Ku in goḷom kon dunia naa, bo koontongan in aḻibobag tatua,

¹⁵yo kotoropan-Ku in dandi-Ku kon i monimu bo kon bayongan mahaḷuk inta nobiag, kon ḷunud moḷoben in diá bidon bui moyopú kon bayongan inta nobiag.

¹⁶Aka aḻibobag koontongan kon goḷom, yo indoian-Ku intua bo kotoropan-Ku in dodandian-Ku inta mononoi tua takin bayongan mahaḷuk inta nobiag kon dunia naa.

¹⁷Tuata in tanda dodandian-Ku inta inogoi-Ku kon bayongan in mahaḷuk inta nobiag kon dunia.”

¹⁸Ki adí mita i Nuh inta iḻumuai nongkon uangga moḷoben tatua in ki Sem, ki Yapet bo ki Ham. (Ki Ham naa ki amá in Kanaan.)

¹⁹Ki adí i Nuh toḷu tatua nobaḻí mogoguyang in bayongan intau kon dunia naa.

²⁰Ki Nuh naa monononggobá, bo sia tuata inta muna-munamai nogaid kon gobá in anggur.

²¹Naonda in ki Nuh nonginum kon anggurnea, sia in noḷoḷangu. Iḷongkutnea in bayongan pakeangnea bo nosiug in sia nomilang kon bonu in ḷoḷaigannea.

²²Naonda in ki Ham, inta ki amá in Kanaan, nokoontong kon ki amánea nomilang, sia in iḻumuai bo nopotaau intua kon i utatnea doyowa.

²³Onda intua ki Sem bo ki Yapet in nogamá kon tobatú jubah bo sinongká monia kon obaga monia. Mosia in minayá takin inumundok sinumuot kon ḷoḷaigan tatua bodongka nopodaing in jubah tatua kon i amá monia. Mosia in nobobui kon tampat ibanea sinbá diá mokoontong kon i amá monia inta nopilang tatua.

²⁴Naonda in ki Nuh nosadar nongkon ḷoḷangunea bo nonotaaudon kon onu inta pinomia i adínea muit tatua kon inia,

²⁵sia noguman, “Binutungdon in Kanaan! Sia in mobaḻí ata inta totok in mohina kon i utatnea mita.

²⁶Dinayo-dayowdon TUHAN, ki Allah i Sem! Kanaan in mobaḻí ata i Sem.

²⁷Poigumon mako ki Allah in modugangpa doman kon barakat kon i Yapet[22] bo moginoḷad kon tampat iḻitúannea. Poigumon doman mako buínea in mogutun moyotakin in buí i Sem. Kanaan in mobaḻí ata i Yapet.”

²⁸Naonda in nopaḷut mako in ḷunud tatua, ki Nuh in nobiagpa toḷu nogatut bo ḻima nopuḷú notaong.

²⁹Sia in minatoi kon dodai in umur siow nogatut bo ḻima nopuḷú notaong.