Read Mongondow SAMUEL 2 1 Bible Online

SAMUEL 2 1 - Mongondow bible

SAMUEL 2 1

¹Naonda in ki Saul minatoi mako, ki Daud in nobui nongkon pinoparangan nonaḷow kon intau in Amalek, bo nogutun in sia kon Ziklag doyowa nosinggai.

²Kon singgai nogintoḷu, namangoidon in tayowmobiag tobatú nongkon pinononḷoḷaigan i Saul. Nobaḻí tomponuot kon pinonogumatoian sia in nomerakdon kon pakeangnea bo nopotoguḷudon in butá in sia. Minayá in sia kon i Daud bo sinumungkud kon tayowonnea.

³Ki Daud noḻibó kon inia, “Nongkon onda in iko?” Tubagnea, “Bobantung naa in nokoḷagui nongkon pinononḷoḷaigan in intau in Israel.”

⁴Bui in ki Daud noḻibó, “Oumanka mongo onu in nobaḻí!” Tubag in tayowmobiag tatua, “Tontara nami in noḷagui nongkon pinoparangan, bo nobayong in minatoi, noitakin doman in ki Saul bo ki Yonatan.”

⁵“Nongonu sin kinotaauanmubí?” ki Daud noḻibó bui kon inia.

⁶Tubagnea, “Noikoḷatbí totok kon akuoi in kon Buḷud in Gilboa, bo nokoontong kon ki Saul in inumandoḷ kon pandongnea, bokaka kereta mita bo tontara in musung inta sinumakoi kon kabaḷo in dinimiugdon sin mongopung kon inia.

⁷Ki Saul in nobobui ná tumi, bo nokoontong kon inakó, bo inoinínea in akuoi, bo akuoi sinumubag, ‘Onu, Tuangku.’

⁸Bo iḻibónea mongo ki ine in akuoi, bo akuoi in noguman kon intau in Amalek in akuoi.

⁹Bo noguman in sia kon inakó, ‘Koḻigaipa kon naa, bo ḻimodon in akuoi! Kinekebandon modaḷom in akuoi, bo gogiódon matoi.’

¹⁰Dá dinimiug in akuoi kon inia, bo poḷat noḻimod kon inia, sin kinotaauanku kon aka moumpag in sia sin diádon moropot in simindog, yo notantúbí kon matoibí domandon. Bo ginamáku in sapoyo in datu nongkon uḷunea bo ḻingkit nongkon kokaḷnea, bo diniaku mangoi kon i Tuangku.”

¹¹Nokodongogmai kon tua in ki Daud, nomerak in sia kon ḷambungnea sin pinongoibú, bo bayongan in intaunea nomia domandon natua.

¹²Mosia in nogamui bo nonogumatoi poḷat nopuasa nodapot in doḷom sin kinopatoian i Saul bo i Yonatan, bo takin doman in bayongan in intau in Israel, umat i TUHAN, sin nobayongdon totok in minatoi kon pinoparangan tatua.

¹³Noiduduimai kon tua ki Daud in noḻibó kon tayowmobiag inta nodia kon habar tatua, “Nongkon onda in iko?” Tubagnea, “Bobantung naa in intau in Amalek, intau mododondaḷoi kon butá i Tuangku.”

¹⁴Guman i Daud, “Mokobaḻíbí totok in iko in moḻimod kon datu inta piniḻí i TUHAN!”

¹⁵Bo nogoiní in sia kon intaunea tobatú bo nomarenta, “Ḻimodon in sia!” Bo intau i Daud tatua nonibat kon intau in Amalek tatua dapot in minatoi.

¹⁶Guman i Daud kon tayowmobiag intau in Amalek tatua, “Ikobí tontaní in nopoḷabú in hukuman matoi kon inimu tontaní takin nongaku kon ain iḻimodmu in ki datu inta piniḻí i TUHAN!”

¹⁷Nopaḷut mako kon tua ki Daud nopodondong in amui tanaa kon i Saul bo kon i Yonatan,

¹⁸bo nomarenta sinbá dondong tanaa[1] in tundúon kon suku in Yohuda. (Dondong tanaa in pinais kon bonu In Buk Yasar).

¹⁹“Israel, kon buḷudmu mita, kon tua minatoidon in pahlawan, adí mita ḷoḷaki in ḻipú, minatoidon in mosia nobaḻí bungang in bangusa.

²⁰Poigumon mako in intau mita in Gat diá nokodongog kon habar tatua. Poigumon mako in lorong mita in Askelon diá nokodongog kon habar soaḷ tatua. Dika modapot in bobay mita in Pilistin morogiowdon dika modapot in bobay kaper momaḷú moyotakin.

²¹Ei buḷud mita in Gilboa, indongogaidon in baḷúku: Dika modapot in oḷú bo uyan momuntad kon inimu! Pomayádon mako moingkag bo moḷogat in gobá bo tampat popokaanmu in biag. Sin kon tuata in kinogambatan in kaḻeaw in intau mita mobarani. Bo kaḻeaw i Saul in kaḻiotáan, diádon iḻepoan bui in ḷana.

²²Piot i Yonatan totok in motoyang, mokopatoi. Kedang i Saul diábí nonotaau kon totabian moḻimod kon musung, nomutú kon ḷawang.

²³Ki Saul bo ki Yonatan, totuu mopia in pososingog bo kinotabi; umuran motobatú kon bonu in nobiagpa nodapot in minatoidon; mosia in moḻika-ḻikat in ḷagapan garuda, moropo-ropot nongkon singa batánea.

²⁴Ei, bobay in Israel, ombaḷaidon in ki Saul, datu tobatú! Inta nopoḷambá kon inimu in pakeang nopura inta mopia totok, Bo nopoḷambá in buḷawan permata kon inimu.

²⁵Aindon minatoi in intau mita mobarani, minatoi kon pinoparangan bo kon buḷud mita motorindog ki Yonatan noitongkob, notorondódon.

²⁶Yonatan, uḻe utatku, monakit totok in ginaku, sin moḷoben totok in mangaḻemu kon inakó. Tabimu kon inakó in totuu motuḻid, nodapot in noiḻiubí kon tabi in bobay.

²⁷Aindon minatoi in intau mita inta mobarani. Diádon in mangaḻe in pakakat in parang monia!”