Read Mongondow SAMUEL 2 10 Bible Online

SAMUEL 2 10 - Mongondow bible

SAMUEL 2 10

¹Diá noonggot nongkon tua ki Nahas datu in Amon minatoi, bo ki Hanun ki adínea ḷoḷaki in nobaḻí datu.

²Bo nogumandon in ki Datu Daud, “Ki Nahas in yobayatku inta mosatia. Dá akuoi in mustibí doman moyobayat i Hanun ki adínea.” Tuamai in ki Daud nopotabádon in totabá minayá in butá in Amon sin moḻipoi kon i Hanun popisí in kinopatoian i amánea.

³Naonda in mosia nodapot kon Amon, itoi mita kon butá tatua in noguman kon i Datu Hanun, “Dikabí morai kon ki Daud tua in nopotabá mangoi in totabánea tatua sin moibog mohoromat kon i amá i Tuang! Sia tua in nopotabá mangoi in intaunea mita tatua sin mobaḻíbí toimata mita sin monaridi kon kotá tanaa, sinbá koagowandon.”

⁴Bo ki Hanun in nodomok kon totabá mita i Daud tatua, nongarug kon kumi monia toḷosi, nomongkó kon pakeang monia nodapot in kayang, bodongka pinotabá nobui.

⁵Táe mosia in mooyá in mobui kon butá monia. Naonda in pinotaau kon i Daud in onu inta nobaḻí tatua, nokidia in sia in koyow sinbá totabá mita tatua in mogutun kon Yerikho modapot in kumi monia mobiagdon bui.

⁶Onda intua intau in Amon nosadardon kon aid monia tua in nokopomukádon kon saturu i Daud kon i monia. Tuamai in nonondan in mosia kon 20.000 in tontara in Siria inta nogutun kon Bet-Rehob bo Zoba, bo 12.000 in tontara nongkon Tob, takin datu in butá in Maakha bo intaunea 1.000.

⁷Naonda in kinodongogan i Daud intua, nopotabá in sia kon i Yoab takin bayongan in tontaranea minayá nonubu kon musung.

⁸Intau in Amon iḻumuai nomia kon pipidan monia kon tayowon in ngara moḷoben in Raba ibukotá monia, yo intau in Siria, intau in Tob bo Maakha nomia kon pipidan monia kon tampat monia tontaní.

⁹Inontong i Yoab kon kogupitan in tontara in musung i mosia inta nongkon muna bo nongkon tumi. Tuamai nomiḻí in sia kon tontara in Israel inta totok in mongopia bo sinampatnea pinoyogintayow in tontara in Siria.

¹⁰Kiagat in tontara inta nongkon Israel in inogoinea kon i Abisai ki ai-ainea, inta nomia kon pipidan monia pinoyogintayow in tontara in Amon.

¹¹Ki Yoab in noguman kon i ai-ainea tatua, “Aka akuoi diádon mokotongod in monayow kon tontara in Siria, yo koḷamemet angoi tuḷungai in akuoi; ná doman tua, aka iko in diá domandon mokotongod in monayow kon tontara in Amon, dá ḷagidon in akuoi mamangoi motuḷung kon inimu.

¹²Mokoporoton kon gina! Koḻigai kita mokopobarani in moḷongasi sin kopontingan in bangusa naton bo kopontingan in kotá mita i Allah naton. Igumon mako ki Allah in mogaid kon onu in koibog-Nea.”

¹³Ki Yoab takin tontaranea minayá nonubu, nodapot in tontara in Siria noḷagui.

¹⁴Naonda in inontong in intau in Amon kon tontara in Siria noḷagui, dá noḷagui domandon in mosia kon i Abisai bo inumundok sinumuot kon kotá. Naonda in nonubu kon intau in Amon, ki Yoab nobui kon Yerusalem.

¹⁵Kinotaauandon in intau in Siria kon sinaḷowdon in mosia in intau Israel, tuamai in nogoiní in mosia kon bayongan in tontara monia sinbá moyosipundon bui.

¹⁶Bo ki Datu Hadadezer nokioiní in intau in Siria inta kon dotá in pomukaan kon Ongkag in Eprat, dá namangoidon in mosia kon Helam kon bonu in tongganut i Sobakh, tongguḷu totokan in tontara i Datu Hadadezer nongkon Zoba.

¹⁷Nokodongogmai kon natua, baḷúdon in ki Daud nosipun kon bayongan tontara in Israel, bodongka iḷumoḷan kon Ongkag in Yordan, onda intua minayá in Helam. Kon tua intau in Siria nonompia kon pipidan monia bo minayá nonubu kon tontara i Daud.

¹⁸Táe sinaḷow in intau Israel in tontara in Siria nodapot in inumundok. Ki Daud takin tontaranea nokoḻimod kon 700 in intau inta sinumakoi kon kereta in parang, bo 40.000 in tontara inta sinumakoi kon kabaḷo; koḻikud intua ki Sobakh tongguḷu totokan in tontara in musung sinompaḻíandon nodaḷom dá minatoi kon tampat pinoparangan.

¹⁹Naonda in datu mita inta kinawasa i Hadadezer nokoontong kon sinaḷowdon in mosia in tontara in Israel, nopoigum in mosia moyodame bo tumungkudon kon intau in israel. Nongkon dodaidon intua intau in Siria in diádon mokobaḻí motuḷung kon intau in Amon.