Read Mongondow SAMUEL 2 11 Bible Online

SAMUEL 2 11 - Mongondow bible

SAMUEL 2 11

¹Datu mita biasamai in mayá moparang kon sempo in pononubú in kayu. Bo kon sempo in pononubú in kayu kon taong tatua nopotabá in ki Daud kon i Yoab minayá noparang takin porwiranea mita bo bayongan tontara in Israel; bo nonaḷow in mosia kon intau in Amon poḷat noḻibut kon kotá in Raba. Táe nogutunpa in ki Daud kon Yerusalem.

²Kon singgai inta moḷoḷabungdon tobatú, naonda in ki Daud nobangon nongkon pinosiugannea, nodondaḷoi in sia kon atop in komaḻig inta notondodai tatua. Nongkon tua inontongnea in bobay tobatú yogot in moinggú, moḷunat totok in bobay tatua.

³Bo binayá i Daud pinoki ḻibó mongo ki ine in bobay tatua, bo pinotaaudon kon inia kon bobay tatua in ki Batsyeba in tangoinea; ki amánea in ki Eliam bo ki buḷoinea in ki Uria intau in Het.

⁴Binayá pinoki gamá i Daud in bobay tatua, bo naonda in sia namangoi in komaḻig, ki Daud nosiug takinnea. (Batsyeba bagupabí nogaid kon upacara pinondaritan naonda in nopaḷut inangoinea). Bo nobuidon in sia kon baḷoinea.

⁵Diá noonggot kon tua ki Batsyeba nonogusiandon, bo habar tatua pinoki potaauneadon kon i Daud.

⁶Dá ḷagidon in ki Daud nokidia in parenta kon i Yoab, kainia, “Potabápa mangoi in ki Uria intau in Het tatua mamangoi kon inakó.” Dá pinotabádon i Yoab in ki Uria tua namangoi nokipodungkuḷ kon i Daud.

⁷Naonda in ki Uria namangoi kon tayowon i Datu Daud, ki datu in noḻibó mongo naonda in kaadaan i Yoab takin tontara mita in Israel, bo naonda in bobayá in parang tatua.

⁸Onda intua ki Daud noguman kon i Uria, “Pobuipa kon baḷoimu bo pogogaipa topiḻikmai.” Naonda in ki Uria nonaḷámai kon komaḻig, ki Daud nokidia in tombuinag inta inatod kon baḷoi i Uria.

⁹Táe ki Uria in diábí nobui tongábí in sia nosiug kon ngara in komaḻig noyotakin in moḷoḷukad mita in datu.

¹⁰Soaḷ tatua pinotaaudon kon i Daud. Dá noḻibó in sia kon i Uria, “Iko nion in bagupabí nobui nongkon bobayáan moyayú, nongonu sin diábí nobui kon baḷoimu?”

¹¹Tubag i Uria, “Tontara in Israel bo Yohuda mopotarudon in kobiagan monia kon parang bo Poti Dodandian i TUHAN kotaki-takin monia; ki Yoab itoi nami takin porwiranea mita in nononḷoḷaigan kon tampat popoparangan. Yo umpaka akuoi in tongá mobui kon baḷoi, bo mongaan monginum poḷat mosiug takin i buḷoiku? Popisí in nyawa i Tuang bo nyawaku, yo diábí pomiaanku intua!”

¹²Bo ki Daud in noguman, “Mopiadon, pogogaipa bui kon naa bo ikoḷom doḷo-doḷom in ogoikudon iko mayá.” Dá ki Uria in nogutunpa kon Yerusalem in singgai tua. Kon singgai noiduduimai sia inoiní i Daud noyotakinnea.

¹³Dá nongaandon in sia bo inogoian doman in oinumon mokoḷoḷangu nodapot in sia noḷoḷangu. Táe kon doḷom tua ki Uria in diábí doman nobui kon baḷoinea, táe nosiugbí in sia takin nopogompat in daingnea[24] kon bonu in yuang in moḷoḷukad kon komaḻig.

¹⁴Nopoikoḷomai kon singgai nomais in ki Daud kon surat kon i Yoab, bo pinoki dianea kon i Uria.

¹⁵Naa in pinaisnea, “Tampatdon in ki Uria kon pipidan inta totok in kon muna, kon tampat poparangan inta totok in motoyang, bo undokdon in iko táe dika moguman kon inia sinbá matoi koḻimodan in sia.”

¹⁶Dá koyogot in ki Yoab nongopung kon kotá tatua, ki Uria pinoki bayáannea in tampat inta ain kinotaauannea kon totok in iḷukadan in musung.

¹⁷Naonda in tontara in musung iḻumuai nongkon kotá bo nonubu kon tontara i Yoab, tongonumai in porwira i Daud in kinoḻimodan, noitakin doman in ki Uria.

¹⁸Onda intua ki Yoab nopotabá in totabá minayá kon i Daud nopotaau in bobayá in parang tatua.

¹⁹Parenta i Yoab kon totabá tatua, “Naonda in ki tuang mokodongog kon tosingogon inta diniamu naa soaḷ bobayá in parang tanaa,

²⁰degá tumorú in sia bo moḻibó kon inimu, ‘Nongonu sin moiko in totokbí in dinimiug kon kotá tatua? Eta diábí kinotaauan monimu kon musung mita in notantú bidon kon mopokuti in piot monia nongkon tudu in dindingnea mita?

²¹Kinoḻiongandon degá monimu kon naonda in ki Abimelek adí i Gideon tua kinoḻimodan kon Tebes? Kinotaauan bidon monimu kon sia tua in minatoi sin bobay tobatú in nopogonag in batu poḷoḻintogan kon topong kon inia nongkon dinding tatua! Dá nongonu sin moiko in totokbí in dinimiug kon dinding tatua?’ Aka moḻibó natua in ki Datu, yo pogumandon kon inia, ‘Ki Uria porwira i Tuang, noitakin doman minatoi!’ ”

²²Bo minayádon in totabá tatua kon tayowon i Daud bo nopotaau kon onu inta pinoki potaau i Yoab kon inia.

²³Totabá tatua in noguman, “Musung nami in moropo-ropot bo mosia in iḻumuai kon kotá bo nonubu kon inami kon popoparangan. Táe kami in noḷongasi totok nonubu kon i monia nodapot in ngara moḷoben in kotá.

²⁴Onda intua nongkon tudu in dinding mosia nopopiot in piot monia kon inami, bo tongonumai in porwira i Tuang in minatoi bo noitakin domandon in ki Uria in minatoi.”

²⁵Ki Daud in noguman kon totabá tatua, “Irotonaidon in gina i Yoab bo pogumandon kon inia kon dikadon moajar in ginamu, sin diábí kotaauan mongo ki ine in matoi kon bonu in parang. Pogumandon kon inia sinbá umuran kotoyangon in monubu kon kotá tatua dapot in kotá tatua tumungkud.”

²⁶Naonda in kinodongogan i Batsyeba kon ki buḷoinea in minatoidon, nonogumatoidon in sia.

²⁷Onda intua naonda in nopaḷutdon in pinonogumatoian tatua, binayá pinoki gamá i Daud in bobay tatua bo dinia mangoi in komaḻig bo binaḻídon i Daud ki buḷoinea in sia. Tongonumai nobuḷan noiduduimai, nopononggadí in sia in adí ḷoḷaki tobatú. Táe kinodoíbí i TUHAN in aid i Daud tatua.