Read Mongondow SAMUEL 2 14 Bible Online

SAMUEL 2 14 - Mongondow bible

SAMUEL 2 14

¹Kinotaauan i Yoab kon mokotanobdon totok in ki Datu Daud kon i Absalom,

²tuamai nokioiní in sia in bobay mobijaksana tobatú inta nogutun kon Tekoa. Naonda in bobay tatua noyaput mangoi, noguman in ki Yoab kon inia, “Ki iná in musti ki ubo-uboḷmaidon nonogumatoi; pogiḷambungdon in ḷambung pinonogumatoian, bo dika momaké in ḷana mobondu. Pomiadon naonda bo bobay inta ain noonggot in nongombaḷmai kon kinopatoian in intau inta totok in kinotabinea.

³Onda intua bayádon kon i datu, bo pogumandon kon inia nanaa.” Bo ki Yoab nopotaau kon inia onu in musti singogonnea.

⁴Bo bobay tatua minayádon kon tayowon i datu, bo sinumungkud nosumba poḷat noguman, “Tuangku Inta Momulia, tuḷungaipa in bobantung!”

⁵“Nongonu?” noḻibó in ki datu kon inia. Bobay tatua in notubag, “Bobantung naa in dongkadon boba-bobay inta nobiag nobogá. Ki buḷoiku in minatoidon.

⁶Bobantung naa in kogadí kon adí ḷoḷaki doyowa, bo kon singgai tobatú taya dua in noropatoi kon apow. Popisí in diá in nopoyoguat, dá tobatú kon sigad nayadua tatua in minatoi kinoḻimodan.

⁷Bo tanaa, bayongan in ginaḷumku in mosaturudon kon inakó bo monuntut sinbá akuoi in mobogoidon kon i monia kon adíku inta noḻimod tatua, sinbá popoḷabúan monia in hukuman matoi, sin sia in noḻimodon kon i utatnea. Aka ogoikudon in ki adíku tatua, dá dongkadon aku-akuoi mita. Mosia in momoguyaatdon kon inta nobaḻí andoḷan in kobiaganku bo diádon monaḷámai kon adí ḷoḷaki tobatú kon i buḷoiku sin mongingguput kon buínea.”

⁸“Pobuidon,” tubag i datu, “bain tompiaanku in pelekara tatua.”

⁹“Tuangku Inta Momulia,” guman in bobay tatua, “onukabí in pomiaan i Tuangku, bobantungbí naa bo motoḷuadíku in mobaba kon bungainea; Ki Tuangku bo motoḷuadí i Tuang in diábí kotaḷá.”

¹⁰Ki Datu in notubag, “Aka oyúon in intau in mopogogondok kon inimu, diádon mangoi in sia kon inakó, dá kon singgai moiduduimai notantú bidon kon sia in diá bidon monuyayow kon inimu bui.”

¹¹Guman in bobay tatua, “Poigumon mako ki Tuangku in mosambayang kon i TUHAN Allah i Tuangku, sinbá intau inta moibog motuḻí kon kinopatoian i adíku tatua in diá modapot in mogaid kon inta moraat moḷoben takin moḻimod kon i adíku inta dongkadon tobatú tatua.” Tubag i Daud, “Podoyon kon i TUHAN inta nobiag, ki adímu tatua in diábí onuon umpaka tongá topiḻikmai.”

¹²Bo bobay tatua in nosingogdon bui, “Tuangku Inta Momulia, ogoipa in bobantung naa mosingog kon topiḻikamai bui.” “Mopia,” tubag i datu.

¹³Guman in bobay tatua, “Takin tosingogon i Tuangku tatua, dá ki Tuangku ain nongaku kon ki Tuangku tontaní in kotaḷádon sin diá nobogoi kon i adí ḷoḷaki i Tuangku mobui nongkon pinoḷaguiannea. Nongonu sin ki Tuangku in momiabí kon noitaḷá ná tatua kon umat i Allah?

¹⁴Kita komintan in matoibí; kita naa in naonda bo tubig inta noibutak kon butá bo diábí motaau sipunon bui. Ki Allah in diábí doman momiag bui kon intau inta ain minatoi; tuamai in igumon mako ki Tuang in moḷongasi sinbá intau inta iḷumbú mokobuidon mangoi.[34]

¹⁵Bobantung naa in namangoi kon tayowon i Tuangku sin oyúon in intau in mopogogondok kon inakó. Bo akuoi in norai kon mopia-piabí kon mamangoi in akuoi mongonguman kon i Tuangku poḷat moharap mako kon onu in pinoigumku naa duduianpa i Tuangku.

¹⁶Iraiku kon ki Tuangku in mokidongogbí bo moposaḷamat kon inakó bo kon i adíku. Mosia in makusud mopoguntun kon inami nongkon butá inta inogoi i Allah kon umat-Nea.

¹⁷Noyakinbí in akuoi kon dandi i Tuangku tatua in mokojaminbí kon kasaḷamatanku sin ki Tuangku naa in naonda bo malaekat i Allah, inta motaau mopoyoposi kon onu inta mopia bo onu inta moraat.[35] Igumon mako ki TUHAN Allah i Tuangku koyota-yotakin i Tuangku!”

¹⁸Ki Datu in notubag, “Oyúon in ḻibóonku kon inimu, tubagai takin gina motuḻid.” “Pogumandon mangoi Tuangku,” tubag in bobay tatua.

¹⁹Guman i datu, “Ki Yoab degá in nopotabá kon inimu?” Tubag in bobay tatua, “Podoyon kon nyawa i tuangku, bobantung in diábí momayow kon onu inta iḻibó i Tuangku.[36] Totuubí Tuangku, ki Yoab ain nopotaau kon bobantung naa onu inta musti pomiaan bo singogon in bobantung naa.

²⁰Táe tua in inaidannea sin nopoyotutui kon pelekara tatua takin kopiaan. Ki Tuangku in intau inta mobijaksana naonda bo malaekat i Allah dá nonotaau kon bayongan inta nobaḻí.”

²¹Nopaḷut mako kon tua ki datu nogoiní kon i Yoab bo noguman kon inia, “Onu in koibogmu tua in duduiankudon. Bayádon tomu in ki Absalom bo diádon mangoi kon naa in sia.”

²²Ki Yoab in sinumungkud kon tayowon i Daud, bo noguman, “Igumon mako ki Allah in momarakat kon i Tuang datu! Tanaa in kinotaauandon in bobantung kon ki Tuang in moibogdon kon inakó sin ki Tuang in noibogdon nokidogog kon onu in pinoigum in bobantung naa.”

²³Bo minayádon in ki Yoab kon Gesur sin mogamá kon i Absalom mobui kon Yerusalem.

²⁴Táe diábí inogoi i datu in ki Absalom mogutun kon komaḻig. “Doíbí in akuoi moindoi kon inia,” guman i datu. Dá ki Absalom in baḷúdon nobui kon baḷoinea tontaní, bo diádon minayá in tayowon i datu.

²⁵Ki Absalom pinuji saḷaku intau inta totok in mogaga kon bayongan in Israel. Diábí in poḻiu kon kogaganea. Pinangkoi kon paḷad in sioḷnea nodapot kon ubung in buok diábí in bogitnea.

²⁶Buoknea in totuu mobarong, bo musti in sia mokigonsing totaong in komintan sin mobogatdon in korasaannea. Buok inta ginonsingnea tatua kobogatnea in noiḻiu kon doyowa nokilo podudui in pononimbangan i datu.

²⁷Ki Absalom in kogadí kon ḷoḷaki toḷu bo bobay tobatú inta totok in moḷunat, ki Tamar in tangoinea.

²⁸Doyowadon notaong in ki Absalom in nogutun kon Yerusalem, táe diápa doman in sia noyodungkuḷ i datu.

²⁹Dá kon singgai tobatú nogoiní in sia kon i Yoab, sin mopotabá kon inia mayá kon tayowon i datu, táe doí in ki Yoab mamangoi, komintanpa doman in ki Absalom nokioiní bui, táe ki Yoab in doíbí doman namangoi.

³⁰Onda intua nogumandon in ki Absalom kon mogogaidnea mita, “Kinotaauan monimu in gobá i Yoab inta noyodiugmai in gobáku inta binunakan in makoya? Turubdon in gobá tatua.” Dá sinurub domandon monia.

³¹Dá namangoidon in ki Yoab kon baḷoi i Absalom bo noḻibó, “Nongonu sin intaumu mita in nonurubí kon gobáku?”

³²Tubag i Absalom, “Popisí in doí in iko mamangoi wakutu in pinoki oiníku. Akuoi in moibog mopotabá kon inimu mayá kon tayowon i datu bo mopotaau in tosingogonku tanaa, ‘Onubí in mangaḻenea akuoi in nonaḷámai kon Gesur bo nobui mangoi kon naa? Maníka nogutundon in akuoi kon tua.’ ” Bo guman doman i Absalom bui, “Ḷongasidon sinbá motaau in akuoi mayá kon tayowon i datu, bo aka akuoi tantúpa doman inanggap kotaḷá, yo mosadiabí in akuoi hukumon matoi.”

³³Onda intua minayádon in ki Yoab kon tayowon i Datu Daud bo nopotaau in oigum i Absalom. Bo ki datu in nogoiní kon i Absalom, bo ki Absalom in namangoi sinumungkud kon tayowon i datu. Bo sinontomu in sia inayokan i datu.