Read Mongondow SAMUEL 2 15 Bible Online

SAMUEL 2 15 - Mongondow bible

SAMUEL 2 15

¹Nopaḷut mako kon tua ki Absalom nosadiadon kon kereta in parangnea tobatú bo kabaḷo takin intaunea ḻima nopuḷú

²Pomuḷoi in singgai ki Absalom in mobangon doḷo-doḷom bo simindog kon bingkí in daḷan kon diug in ngara moḷoben in komaḻig. Pomuḷoi in intau inta mamangoi mopotaau in pelekaranea kon i datu, oiníon bo ḻibóon i Absalom, kainia, “Nongkon suku táonda in iko?” Bo aka intau tatua motubag, “Nongkon suku tanaa andeka tatua,”

³dá ki Absalom in moguman, “Podudui in hukum, iko in noitutui, táe nokotabian yo diá in oḻit i datu in moibog mokidongog kon onu in pinongadumu.”

⁴Bo sia in moguman doman, “Aka akuoi in mobaḻí hakim, dá pomuḷoi in intau inta oyúon in yogenggeng andeka tuntutan yo motaaubí in mamangoi kon inakó bo moadilbí in pononantúku.”

⁵Aka oyúon in intau in dimiug kon i Absalom sin tumungkud mosumba kon inia, dá ki Absalom mopoabat in ḻimanea bo gakapannea poḷat ayokannea.

⁶Natuata in aid i Absalom kon bayongan in intau inta mamangoi mopongadu in pelekaranea kon i datu, bo aidnea tatua in mogamá kon gina in intau in Israel.

⁷Naonda in noiḻimpatdon kon opat[37] notaong, ki Absalom in noguman kon i Datu Daud, “Amá, ogoipa mayá in akuoi kon Hebron sin mogintompod kon dandiku kon i TUHAN.

⁸Sin kon dodai in akuoi nogutunpa kon Gesur butá in Siria, nodandi in akuoi kon mayá moibada kon i TUHAN kon Hebron[38] aka ogoi-Nea in akuoi mobui kon Yerusalem.”

⁹Tubag i datu, “Bayádon takin saḷamat.” Bo nobuatdon in ki Absalom minayá in Hebron.

¹⁰Táe munadon in sia nopotabá in totabá mita kon bayongan in suku Israel takin nodia kon koyow, “Aka mokodongog in moiko kon singog in torompet, yo pomaḷúdon, ‘Ki Absalom ain nobaḻí datu kon Hebron!’ ”

¹¹Nongkon Yerusalem doyowa nogatut in intau sinumakin kon i Absalom minayá in Hebron. Diábí kinotaa-taauanmai monia in komplotan tatua bo mosia komintan in sinumakin takin diábí in curiga.

¹²Bo koyogot in ki Absalom noposumba in kuruban, sia in nopotabá doman in totabá kon kotá in Gilo sin mogoiní kon i Ahitopel, inta monononggina tobatú i Datu Daud. Natuata in komplotan moḷawang kon i datu tatua kodugang-kodugangdon in koropotnea, bo kodugang-kodugang domandon in kobayong in dumodudui i Absalom.

¹³Onda intua intau tobatú namangoi nopotaau kon i Daud, kainia, “Intau mita in Israel nomihakdon kon i Absalom.”

¹⁴Bo noguman in ki Daud kon bayongan in pogawainea inta kon Yerusalem, “Koḻigai in kita mayádon nongkon naa. Tongádon naa in daya sinbá mosaḷamat in kita nongkon i Absalom. Diádon moonggot bo mamangoi in sia. Koḻikatdon, sinbá diá kobatukannea in kita bo taḷowonnea, dá bayongan in intau kon kotá in ḻimodon!”

¹⁵“Mopia, Tuang datu,” tubag monia. “Kami in mosadiabí mogaid kon onuka in koibog i Tuang Datu.”

¹⁶Bo nobuatdon in ki datu kotaki-takin in bayongan motoḷuadínea bo pogawainea, koḻikudon in mopuḷú in buḷoi inta diá inikanea inta sinaḷáannea sin moḷukad kon komaḻig.

¹⁷Kon dodai in ki datu bo bayongan in tumotakinnea minayá nonaḷámai kon kotá, mosia nogogai kon diug in baḷoi inta pangabisan totok.

¹⁸Bayongan in pogawai i datu in sinimindog[39] kon ḻimakonea kon dodai in tontara moḷoḷukad kon i datu nopipid sinumaḻib kon inia. Bo onom nogatut doman in tontara inta dinumudui kon inia nongkon Gat, nopipid kon tayowonnea.

¹⁹Nokoontongmai kon tua noguman in ki datu kon i Itai inta itoi in tontara onom nogatut tatua, “Nongonu sin iko in dinumuduibí doman kon inami? Maníka pobuidon in iko bo mogutun takin i datu inta mobagu. Iko nion in intau ango-angoi, moḷoḷagui inta noyayú nongkon butámu!

²⁰Diápabí noonggot in iko in nogutun kon naa, umpaka yo iko in potabáku doman kaasí dumudui moḷagui takinku? Akuoi tontaní in diá doman nonotaau mongo kon onda in bayáanku. Pobuidon bo diádon doman in yobayatmu mita inta tobangusamu, igumon mako ki TUHAN in motabi kon inimu bo mosatia kon inimu.”[40]

²¹Táe ki Itai in notubag, “Inta Momulia, podoyon kon i TUHAN inta nobiag bo popisí in nyawa i Tuangku, kon ondakabí in bayáan i Tuangku, yo bobantung in dumuduibí doman, umpakabí moyogintayow in popatoi.”

²²“Mopia!” tubag i Daud, “Bayádon turus!” dá minayádon in ki Itai noyotakin in bayongan in tontaranea bo motoḷuadí monia.

²³Bayongan in intau nongombaḷ totok naonda in tontara mita i Daud nonaḷámai kon kotá. Onda intua ki datu iḷumoḷan kon tapá in Ongkag in Kidron dinuduian in bayongan in tontaranea, bo minayádon in mosia nopobayá ná padang gurun.

²⁴Ki Imang Zadok bo ki Imang Abyatar in kon tua[41] takin bayongan intau in Lewi inta nodia kon Poti Dodandian i TUHAN. Poti Dodandian tatua in inukat,[42] bo diábí binuat kon dodai in bayongan in rayat diápa nodait nonaḷámai kon kotá tatua.

²⁵Bo ki datu in nogumandon kon i Zadok, “Pobuidon in Poti Dodandian tatua kon kotá. Aka ki TUHAN in moibogpa kon inakó, yo notantúbí kon ogoi-Neapabí mobui mangoi bo mokoontongpa bui kon Poti Dodandian tatua takin tampatnea.

²⁶Táe aka doídon in ki TUHAN kon inakó, dá taaudon kon i-Nia onu in popoaid-Nea kon inakó!”

²⁷Noiduduimai kon tua ki datu in noguman bui kon i Zadok, “Tongganutaidon in ki Ahimaas ki adímu bo ki Yonatan adí i Abyatar; pobuidon in moiko kon kotá takin saḷamat.[43]

²⁸Bain oḷatonku kon diug in ḷoḷoḷanan mita kon ongkag kon padang gurun modapot in mokouḻí kon habar nongkon inimu.”

²⁹Bo ki Zadok taya dua i Abyatar in nodia kon Poti Dodandian tatua nobui minayá in Yerusalem bo nogutun kon tua in mosia.

³⁰Nopaḷut mako kon tua ki Daud in noḷongkut kon sapatunea. Sia takin bayongan in dumoduduinea notakod kon Buḷud in Zaitun sindaḷan mongombaḷ poḷat nongoḷubung saḷaku tomponuot in monogumatoi.

³¹Naonda in pinotaaudon kon i Daud[44] kon ki Ahitopel in sinumakin doman kon komplotan i Absalom, nosambayangdon in ki Daud nanaa, “Oo, TUHAN, poigumon mako poyayúon-Mudon in tonggina i Ahitopel!”

³²Kon dodai in ki Daud nodapotdon kon tudu totok in buḷud kon tampat inta biasamai poibadaan kon i TUHAN, sinontomu in sia in yobayatnea inta mosatia, inta ki Husai intau in Arki. Ḷambung i Husai noberak bo nopoinggú in ḷobud.

³³Ki Daud in noguman kon inia, “Aka iko dumudui kon inakó, yo iko in mobaḻídon in dugang in raianku.

³⁴Táe iko in motaaubí motuḷung kon inakó, aka iko mobui kon kotá bo moguman kon i Absalom, kon tanaa in iko in mobantungdon kon inia takin satia, ná pinobobantungmu kon i amánea koḻipod. Takin aid natua iko in mokopoyayúdon kon bayongan in tonggina i Ahitopel.

³⁵Ki Imang Zadok bo ki Abyatar in kon tua doman. Potaaudon kon i monia in bayongan in inta dongogonmu kon komaḻig.

³⁶Ki Ahimaas adí i Zadok bo ki Yonatan adí i Abyatar in dinumudui doman kon i amá monia, dá mosia in kon tuabí doman. Adídon mita tatua in potabámu mangoi kon inakó sin mopotaau in bayongan in habar inta dinongogmu.”

³⁷Dá nobuidon in ki Husai yobayat i Daud tatua kon Yerusalem, noitombutung kon tungkuḷ in ki Absalom nodapot kon tua.