Read Mongondow SAMUEL 2 18 Bible Online

SAMUEL 2 18 - Mongondow bible

SAMUEL 2 18

¹Ki Datu Daud in nosipun kon bayongan in intaunea, bo sinilai-silainea, oyúon in tumongoribu bo oyúon in tumogogatut in intau. Onda intua dinuínea in porwira nobaḻí tongguḷu in pinonobatúan mita tatua.

²Nopaḷut mako kon tua pinotabáneadon in mosia minayá noparang kon bonu in toḷu nopaanan, paanan mita tatua in kon bonu in tongganut i Yoab, i Abisai ki ai-ai Yoab bo Itai intau i Gat. Guman i datu kon intaunea, “Akuoi in mayá doman moyotakin monimu.”

³Táe intaunea mita tatua in notubag, “Dika Tuang. Sin aka kami bo pakisadon moḷagui, andeka tongobotak kon inami in matoi, yo diápabí doman mopia in gina in musung, sin ki Tuangbí in tayakon monia. Ki Tuang in notongkaibí in boḻi in mopuḷú noribu in intau nongkon inami. Mopia-piabí in ki Tuang mokidia mangoi in totuḷung kon inami nongkon kotá.”

⁴Bo ki datu in noguman, “Mopia, taaudon kon inimu.” Onda intua sinimindog in sia kon diug in ngara in kotá, bo tontara mita in nopipid iḻumuai kon bonu in paanan-paanannea inta sinilai tumongoribu bo tumogogatut in intau.

⁵Bo nomarenta in ki datu kon i Yoab, kon i Abisai bo kon i Itai, kainia, “Dika tompaḻían monimu in ki Absalom tayowmobiag tatua sin monorop kon inakó.” Bayongan in tontara nokodongogbí kon parenta tatua.

⁶Bo nobuatdon in tontara i Daud nomarang kon tontara in Israel, bo mosia in noparang kon kayuon in Epraim.

⁷Tontara in Israel sinaḷow in intau mita i Daud; Totuu moḷoben in kinotaḷowan tatua, 20.000 in intau in minatoi singgai tua.

⁸Pinoparangan tatua noibaya-bayádon mako kon bayongan in butá tatua, bo mobayo-bayong kon minatoi in intau sin noiḷaḻe kon kayuon noiḻiu kon inta minatoi kon pinoparangan.

⁹Kon dodai in ki Absalom sinumakoi kon bagalnea, bo daḻídon in sia noyodungkuḷ in intau i Daud. Bagal tatua in sinumaḻib kon pangkoi in kayu inta moḷoben táe noompá, dá noiandupdon in uḷu i Absalom kon tanganea tobatú. Bagalnea tatua in noribatukdon turus táe ki Absalom in kinotaḷáan bo noitadangdon mako kon tua.

¹⁰Intau i Daud tobatú nokoontong kon inia bo pinotaaunea kon i Yoab, “Tuang, koina inontongku in ki Absalom noitadang mako kon tanga in kayu moḷoben!”

¹¹Ki Yoab in notubag, “Onu? Inontongmu in sia? Nongonu sin diábí ḷagi iḻimodmu? Notantú bidon kon ogoianku in doit saḷaka mopuḷú in iko bo bogot in ogotan tobatú.”

¹²Táe intau tatua in notubag, “Umpakabí ogoian in doit saḷaka toribu in akuoi, yo doíbí in akuoi mopoyoyigamai kon i adí ḷoḷaki i datu. Kami komintan in nokodongogbí kon onu in pinarenta i datu kon i Tuang bo kon i Abisai bo kon i Itai, sinbá diá monompaḻí kon tayowmobiag tatua sin monorop kon i datu.

¹³Bo aka kuma bo iḻimodku in ki Absalom in koina, yo notantúbí kon kotaauan i datu, sin notantúbí kon ki datu in mokodongogbí kon bayongan in yagi-yagi — bo ki Tuang in notantúbí kon diábí mobela kon inakó.”

¹⁴“Natuapa! Modaitdon in kasampatan tongá mobobayowan takinmu,” guman i Yoab. Bo ki Yoab nogamá kon pandong toḷu bo pinotakuḷnea kon dodob i Absalom inta nobiagpa bo noitadang mako kon tanga in kayu.

¹⁵Onda intua intau i Yoab mopuḷú noḻibut kon inia poḷat noḻimod kon inia.

¹⁶Ki Yoab nogirup kon torompet dá intaunea mita in nogogaidon in nogaḷow kon tontara in Israel.

¹⁷Onda intua mayat i Absalom binuat bo pinogonag kon bonu in parigí inta moonag kon kayuon. Parigí tatua binumbunan monia in batu nodapot in kinoḷantud. Bayongan tontara in Israel noḷagui nobui kon baḷoinea-baḷoinea.

¹⁸Kon wakutu in nobiagpa, ki Absalom noposindogdon kon inia in tobatú tugu kon Ḷopá in Datu, sin sia in diá kogadí kon ḷoḷaki inta mongingguput kon buínea. Tugu tatua sinangoiannea in tangoinea tontaní, bo nodapot in singgai naa tugu tatua umuran kinotaauan saḷaku tugu i Absalom.

¹⁹Onda intua ki Ahimaas adí i Zadok nogumandon kon i Yoab, “Ogoipa in akuoi moribatuk mayá mokipodungkuḷ kon i datu bo modia kon habar mopia kon ki TUHAN ain noposaḷamat kon i Tuang nongkon musungnea.”

²⁰“Dika,” guman i Yoab, “bain komintanmaidon. Singgai naa in diábí motaau in iko modia kon habar, sin ki adí ḷoḷaki i datu in minatoidon.”

²¹Onda intua ki Yoab noguman kon atanea intau in Sudan, “Bayádon potaau kon i datu in onu inta ain inontongmu.” Ata tatua in sinumungkud nosumba bodongka minayá noribatuk.

²²Táe ki Ahimaas in nomakisa kon i Yoab, “Onuka in mobaḻí, ogoi domandon in akuoi mopoyaput in habar.” “Nongonu sin iko in totokbí in momakisa kon mayá doman, adíku?” ki Yoab noḻibó. “Iko in diábí motarima kon tondan intua.”

²³“Diábí nongonu,” guman i Ahimaas bui, “Mayábí in akuoi.” “Aka natua, yo bayádon,” guman i Yoab. Dá noribatukdon in ki Ahimaas nongin daḷan inta tumaḻib kon Ḷopá in Yordan, bo diá noonggot kon tua kinotaḻibanneadon in ata intau in Sudan koina.

²⁴Ki Daud ḻimitú mako kon yuang kon sigad in ngara dotá in bonunea bo ngara dotá in ḷuai in kotá tatua. Moḷoḷukad noponik kon dinding bo sinimindog kon atop in ḷoḻingkop in ngara tatua. Naonda in sia nobobui magí mako, inontongnea oyúon in intau tobatú namangoi sindaḷan noribatuk.

²⁵Moḷoḷukad tatua in nomaḷú monag nopotaau intua kon i datu, bo ki datu in noguman, “Aka sia tontaní, yo notantú bidon kon habar mopia in dinianea.” Naonda in intau tatua motoyongdon moyaput,

²⁶moḷoḷukad tatua nokoontong kon oyúonpa doman in intau tobatú in namangoi sindaḷan doman moribatuk. Dá nomaḷú bui in sia, “Indoiai! Oyúonpa doman in intau ibanea inta noribatuk doman tontaní.” Ki datu in notubag, “Tantú nodiabí doman in sia kon habar inta mopia.”

²⁷Moḷoḷukad tatua in noguman, “Intau inta muna tatua in ki Ahimaas. Kinotaauanku nongkon pororibatuknea.” “Sia in intau mopia,” guman i datu, “tantú nodiabí in sia kon habar mopia.”

²⁸Takin nomaḷú in ki Ahimaas nopoyaput in salam kon i datu, bodongka sinumungkud bo noguman, “Dinayo-dayowdon in ki TUHAN Allah i Tuang, inta ain noposarakan kon i Tuang in intau mita inta nomarontak kon i Tuangku!”

²⁹Ki datu in noḻibó, “Nosaḷamat degá in ki Absalom inta nobagupa in kinobiagannea tua?” Ki Ahimaas in notubag, “Tuang datu, koina kon dodai in akuoi pinotabá i Yoab, akuoi in nokoontong kon pinoropatoian moḷoben, táe diábí kinotaauanku mongo onu in nobaḻí.”

³⁰“Sindogdon kon dotá intua,” guman i datu; dá ki Ahimaas in minayá ná sí bo sinimindog kon tua.

³¹Onda intua noiyaputdon in ata i Yoab tatua, bo noguman kon i datu, “Ata naa in nodia kon habar mopia kon i Tuang datu! Singgai in naa ki TUHAN ain nobogoi kon i Tuang in kauntungan kon bayongan in intau inta nomarontak.”

³²Ki datu noḻibó kon inia, “Nosaḷamat degá in ki Absalom inta nobagupa in kinobiagannea?” Bo ata tatua in notubag, “Igumon mako in bayongan in musung i Tuang datu, bayongan intau inta nomarontak kon i Tuang Datu in mokorasa doman kon ná inta kinorasaan in intau inta nobagupa in kinobiagan tua.”

³³Nokodongogmai kon tua noajardon totok in gina i datu, bo noponik in sia kon yuang inta kon ḻimonik in ngara moḷoben bo nongombaḷ nogamui, “O adíku! Adíku Absalom! Absalom, adíku! Mopia-piabí kon akuoi in minatoi monoḻiu kon inimu, adíku! Absalom, adíku!”