Read Mongondow SAMUEL 2 19 Bible Online

SAMUEL 2 19 - Mongondow bible

SAMUEL 2 19

¹Pinotaaudon kon i Yoab kon ki Datu Daud in nongombaḷ bo nonogumatoi kon kinopatoian i Absalom.

²Dá kinountungan singgai tatua nobaḷui nobaḻí kinokuyangan in gina in bayongan tontara i Daud popisí in dinongogdon monia kon ki datu in nongombaḷdon kon i adínea ḷoḷaki.

³Takin diá noguman mosia nobui kon kotá, naonda bo tontara inta inangoian in oyá sin noḷagui nongkon pinoparangan.

⁴Ki datu in nogoḻingoi kon pogotnea bo mogamui noropot, “O adíku! Adíku Absalom! Absalom, adíku!”

⁵Ki Yoab minayá kon tayowon i datu bo noguman, “Kon singgai in naa ki Tuang Datu in nokopooyámai kon intau i Tuang Datu, bokaka mosiadon tua in noposaḷamat kon nyawa i Tuang Datu, nyawa in adí ḷoḷaki bo bobay i Tuang Datu, i buḷoi inta sinonibuḷoi bo inta diá sinonibuḷoi i Tuang Datu.

⁶Ki Tuang Datu motabi kon intau mita inta mondoí kon i Tuang Datu, táe ki Tuang Datu in mondoí kon intau mita inta motabi kon i Tuang Datu! Nosimantagdon totok kon ki Tuang Datu in noponiata kon porwira mita bo tontara mita i Tuang Datu totokbí in diá in mangaḻenea kon i Tuang Datu. Sedang bo koontonganbí totok kon mopiabí totok in gina i Tuang Datu aka kuma bo singgai in naa ki Absalom in nobiagpa bo kami komintan in minatoi!

⁷Igumonku ki Tuang Datu in simindogdon bo mayá ḷumuai moposanang kon gina in intau mita i Tuang datu. Akuoi in mongibotbí podoyon kon tangoi i TUHAN, aka ki Tuang Datu in diá ḷumuai mokipodungkuḷ kon i monia, dá doḷom domandon tanaa diá bidon in tobatúmai in intau in moibog tumakin kon i Tuang datu. Tua in mobaḻídon bodito inta totok in moḷoben inta kobayáan i Tuang Datu kino ouput in kobiagan.”

⁸Onda intua sinimindogdon in ki datu bo iḻumuai, bo iḻimitú kon diug in ngara. Intaunea mita nokodongogdon kon sia in kon tua, bo namangoidon in mosia komintan kon tayowonnea. Bo kon dodai intua bayongan in tontara in Israel noḷaguidon mita, bo nobuidon kon baḷoinea-baḷoinea.

⁹Kon bonu in bayongan suku in Israel nomukádon in bobayowan. Guman monia, “Ki Datu Daud ain noposaḷamat kon inaton nongkon intau in Pilistin bo nopoḷuatdon kon inaton nongkon musung mita ibanea, táe tanaa in sia in noḷaguidon kon i Absalom bo nonaḷámai kon butá tanaa.

¹⁰Ki Absalom in dinuídon naton datu, táe tanaa in minatoidon in sia kon pinoparangan. Nongonu sin diábí tobatúmai in moḷongasi modia mangoi bui kon i Datu Daud?”

¹¹Tosingogon mita tatua in noyaput domandon kon i Datu Daud.[50] Tuamai in nopotabá in sia kon i Imang Zadok bo kon i Imang Abyatar bo noḻibó kon itoi mita in Yohuda nanaa, “Nongonu sin moiko in totokbí in tumi-tumimai motomu bo moyotakin i datu mobui kon komaḻignea?

¹²Bokaka moiko nion in tai utatku bo ginaḷumku? Paka dá moikobí in totok in tumi-tumimai mopoigum sinbá mobui in akuoi?”

¹³Ki Daud in nopotabá doman kon i monia moguman kon i Amasa nanaa, “Iko nion in ginaḷumkubi! Pinangkoi kon tanaa mako iko in baḻíonkudon tongguḷu totok in tontaraku momaḷui kon i Yoab. Igumon mako ki Allah in moḻimod kon inakó aka diá aidanku intua!”

¹⁴Natua in aid i Daud dá bayongan intau in Yohuda noibogdon kon inia nodapot in mosia nokidiadon in koyow kon i datu sinbá mobuidon kon komaḻig moyotakin in bayongan pogawainea.

¹⁵Bo nobuatdon in ki datu bo nodapotdon in Ongkag in Yordan, kon dodai intua intau mita in Yohuda nodapotdon in Gilgal sin monontomu kon i datu bo moḷukad kon inia ḷumoḷan kon ongkag tatua.

¹⁶Ki Simei adí i Gera, intau in Benyamin tatua in nodia kon toribu in intau nongkon suku in Benyamin bo iḻimikat namangoi noyotakin in intau mita in Yohuda tatua sin motomu kon i datu. Natua doman in ki Ziba ata in motoḷuadí i Saul, takin mopuḷú boḻima in adínea inta ḷoḷaki bo doyowa nopuḷú in atanea; mosia in iḷumoḷandon kon Ongkag in Yordan kon dodai in ki datu diápa noiangoi.

¹⁷

¹⁸Mosia in notuḷung kon motoḷuadí i datu iḷumoḷan[51] poḷat nogaid kon bayongan inta pinoki aid i datu kon i monia. Kon dodai in ki datu in ḷumoḷandon kon ongkag, ki Simei in sinumungkud kon tayowonnea bo noguman,

¹⁹“Bobantung in mopoigum, igumon mako ki Tuang datu in diádon umuran mako mopotaḷá kon inakó. Aka motaau yo ḻiongondon i Tuang datu in onu inta inaidan in bobantung naa kon singgai kon dodai in ki Tuang datu nonaḷámai kon Yerusalem.

²⁰Sin kinotaauankudon kon akuoi ain nomia kon dosa, bo manangka intua, kon sigad in bayongan suku inta nogutun kon butá inta kon dotá in utuan akuoidon naa inta muna-munamai namangoi nonontomu kon i Tuang datu kon singgai in naa.”

²¹Nokodongogmai kon tua in ki Abisai adí i Zeruya noguman, “Ki Simei in patusbí hukumon matoi sin sia ain nogodi-godimai kon i datu inta piniḻí i TUHAN.”

²²Táe ki Daud in noguman kon i Abisai bo kon i Yoab ki guya-guyangnea, “Dika kumapog. Nongonu sin moiko in moposusabímai kon inakó? Kon singgai in naa akuoi in buidon nobaḻí datu kon Israel, bo diá bidon motaau in moḻimod kon intau in Israel.”

²³Onda intua nongibotdon in ki datu kon i Simei, “Pogumanku kon iko in diábí hukumon matoi.”

²⁴Ná doman tua in ki Mepiboset ki ompu i Saul, namangoi doman sin motomu kon i datu. Sia in diá nondarit kon sioḷnea, diá doman nongarug kon kuminea, bo diá nomatá kon pakeangnea pinangkoipa ki Datu Daud nonaḷámai kon Yerusalem nodapot in sia nobui takin saḷamat.

²⁵Naonda in ki Mepiboset namangoi nongkon[52] Yerusalem sin motomu kon i datu, nogumandon in ki datu kon inia, “Mepiboset, nongonu sin iko in diábí dinumudui kon inakó tungkuḷ intua?”

²⁶Tubagnea, “Inta Momulia, Kinotaauan bidon i Tuang datu kon akuoi naa in pelong. Akuoi in nopotabádon kon bobantungku moposadia in keledai inta motaau takoianku sin dumudui kon i Tuang datu. Táe akuoi in inuboḷan in bobantung tatua.

²⁷Nodapot in pinoponapudannea akuoi in uboḷ kon i Tuang datu. Táe ki Tuang in naonda bo malaekat i Allah. Tuamai in pomiadon in onu inta mopia kon mata i Tuang datu.

²⁸Bayongan inanakan motoḷuadí i amáku in patusbí hukumon matoi i Tuang datu, táe bobantung naa in inogoidon i Tuang datu mongaan moyotakin kon komaḻig. Tanaa in diádon kobaḻí in bobantung naa moigum kon onu bo onu kon i Tuang datu.”

²⁹Ki Datu in notubag, “Diá bidon paraḷu in iko mosingog kon onu bo onu. Akuoi in nonantúdon kon mobogoi in bayongan kapunyaan i Saul kon inimu bo kon i Ziba.”

³⁰Bo ki Mepiboset in notubag, “Pomayádon mako gamáan komintan i Ziba. Nosanangdon in gina in bobantung naa sin ki Tuang datu in nobuidon takin nosaḷamat.”

³¹Ná doman tua in ki Barzilai intau in Gilead tua namangoi nongkon Rogelim sin moyotakin i datu ḷumoḷan kon Ongkag in Yordan.

³²Ki Barzilai in nogoguyangdon totok, umurnea in waḷudon nopuḷú notaong. Sia in nobiag nooyúon totok bo kon dodai in ki datu nogutun kon Mahanaim koḻipod, ki Barzilai naa inta nopooyúon in kaanon i datu.

³³Ki datu in noguman kon inia, “Takindon kon inakó mayá in Yerusalem, bain pooyúononku in bayongan inta pakéonmu kon tua.”

³⁴Táe ki Barzilai in notubag, “Diádon moonggot in kobiaganku. Dá onubí in mangaḻenea akuoi tumakin kon i Tuang datu mayá in Yerusalem?

³⁵Umurku ain waḷu nopuḷú notaong, bo diá bidon in motaau mobogoi in inta mokosanang kon inakó. Diá bidon konanamanku in onu inta kaanonku andeka inta inumonku, bo diá domandon kodongoganku in singog in intau modondong. Akuoi in tongádon mokopororigamai kon i Tuang datu.

³⁶Bobantung naa in diábí patus motarima kon tondan inta ná tatua in koḷoben. Akuoi naa in tongábí moibog moyotakin kon i Tuang datu mayá tongonumai noḷangkad nongkon ḷoḷan in Ongkag in Yordan.

³⁷Mopaḷut mako, pomayádon mako in bobantung mobui kon baḷoiku bo matoi kon diug in pinoḷobongan kon guyangaku, táe naa in ki adíku ki Kimham. Ogoidon in sia dumudui kon i Tuang datu bo popoaidon kon inia onu inta mopia kon mata i Tuang Datu.”

³⁸Ki datu in notubag, “Ki Kimham in diaanku bo tompiaanku ná inta kinoibogmu, bo bayongan inta pinoigummu intompodanku.”

³⁹Onda intua ki Daud bo bayongan in intaunea iḷumoḷandon kon Ongkag in Yordan. Bo ki Daud in nongayok kon i Barzilai bo nogumandon kon mayá, onda intua ki Barzilai in nobuidon kon baḷoinea.

⁴⁰Bayongan tontara in Yohuda bo tongobotak in tontara in Israel sinumakin kon i datu iḷumoḷan kon ongkag. Noiduduimai kon tua ki datu minayádon ná Gilgal, bo ki Kimham in dinumudui kon inia.

⁴¹Onda intua namangoidon in bayongan intau in Israel kon tayowon i datu bo noguman kon inia, “Tuang datu, nongonu sin ki utat nami intau mita in Yohuda tatua in norai kon mosiabí tua in kitogi hak motomu bo moyotakin i Tuang datu takin bayongan in motoḷuadí bo intau mita i Tuang datu ḷumoḷan kon Ongkag in Yordan?”

⁴²Bo intau in Yohuda notubag, “Notantú bidon, sin ki datu in ginaḷum nami. Nongonu sin moiko in tumorú bidon? Eta degá inta pinaké nami naa in sadiaan i datu, andeka degá inogoianneadon in tombuinag in kami?”

⁴³Intau in Israel in notubag, “Hak nami kon i datu in mopuḷú noguntuḷ in koḷobennea nongkon i monimu. Nongonu sin moiko in diábí moindoimai kon inami? Dika koḻiongan kon kamibí naa inta muna-munamai totok noguman kon modiadon bui kon i datu mobui!” Táe intau in Yohuda in motoga-togat in intau in Israel bo doí taḷowon.