Read Mongondow SAMUEL 2 2 Bible Online

SAMUEL 2 2 - Mongondow bible

SAMUEL 2 2

¹Nopaḷut mako kon tua ki Daud in noḻibó kon i TUHAN, “TUHAN degá ogoi-Mu in akuoi mayá mongawasa kon kotá tobatú in kotá kon Yohuda?” “Oo,” tubag i TUHAN. “Kotá inta táonda?” noḻibó in ki Daud. “Hebron,” tubag i TUHAN.

²Dá minayádon in Hebron in ki Daud takin ki buḷoinea doyowa: ki Ahinoam inta bobay in Yizreel, bo ki Abigail inta ki baḷú i Nabal inta bobay in Karmel.

³Ná doman tua in intaunea mita minayá doman takin motoḷuadí mita monia in dinumudui kon i Daud, bo mosia in nogutundon notantú kon Hebron bo kon diugneamai.

⁴Onda intua intau mita in Yohuda namangoi kon Hebron, bo noduí kon i Daud nobaḻí datu kon Yohuda. Naonda in ki Daud nokodongog kon intau mita in Yabesh kon Gilead noḷobongdon kon i Saul,

⁵nopotabá in sia in totabánea minayá takin koyow, “Poigumon mako ki TUHAN momarakat kon i monimu, sin moiko in noponiatadon in kotoinduduimu kon i datumu sin noḷobong kon awaknea.

⁶Tuamai, igumon mako ki TUHAN mopoontong doman in tabi bo satia-Nea kon inimu. Mopiabí doman in pogogaidku kon i monimu sin aidmu tatua.

⁷Pokoroton in ginamu bo umurandon kobaḻí intau mita inta mongobarani umpaka ki datu monimu ain minatoi, táe intau mita in Yohuda ain noduí kon inakó nobaḻí datu monia.”

⁸Itoi in tontara i Saul, inta ki Abner adí i Ner, ain noḷagui noyotakin i Isyboset ki adí i Saul, noḷagui minayá in Mahanaim kon ḷoḷan in Ongkag in Yordan.

⁹Kon tua binaḻí i Abner in ki Isyboset nobaḻí datu kon butá mita in Gilead, Asyuri,[2] Yizreel, Epraim bo Benyamin, nodapotbí in kon bayongan in Israel.

¹⁰Ki Isyboset in umur opat nopuḷú notaong kon tungkuḷ in binaḻí datu kon Israel, bo nomarenta in sia doyowa notaong in koonggotnea. Táe suku in Yohuda in umuranbí mosatia kon i Daud,

¹¹bo ki Daud in nomarenta kon Hebron inta kon bayongan in Yohuda pitu notaong bo tobotak in koonggotnea.

¹²Kon singgai tobatú minayá in ki Abner nongkon Mahanaim nopobayá in kotá in Gibeon, sinakinan in intau i Isyboset.

¹³Ki Yoab (inta ki Zeruya in tangoi i inánea) in noyotakin doman in intau i Daud nopobayá doman in kotá tatua. Doyowa nopaanan in noyodungkuḷ kon tabang Gibeon; Ki Abner bo intaunea mita in iḻimitú kon ḷoḷan magí, ki Yoab takin intaunea mita in kon ḷoḷan mako.

¹⁴Bo nogumandon in ki Abner kon i Yoab, “Igai, poyotuḷuon naton in intau naton!” “Mobaḻí,” tubag i Yoab.

¹⁵Bo namangoidon in intau mopuḷú bodoyowá nongkon suku i Benyamin inta nobaḻí toḻiu i Isyboset, bo mopuḷú doman bodoyowá in intau i Daud.

¹⁶Mosia in tumpaḷadon nogoganutan kon buok bo poḷat nositumbukan, nodapot in tumpaḷa minatoi. Tuamai in tampat kon Gibeon in sinangoi “Gobá in Kedang”.

¹⁷Nopaḷut mako kon tua nobaḻídon in parang inta motoyang totok, bo ki Abner takin tontara in Israel sinaḷow in intau mita i Daud.

¹⁸Ki Adí i Zeruya taya toḷu in kon tua doman, inta ki Yoab, ki Abisai bo ki Asael. Ki Asael naa in pororibatuknea in moḻikat naonda bo rusa,

¹⁹dá umuran dinudurannea in ki Abner.

²⁰Ki Abner nobobui ná tumi bo noḻibó, “Degá ki Asael in iko?” “Oo,” tubagnea.

²¹“Dika momatuk kon inakó!” guman i Abner, “Podomokdon kon tontara tobatú tatua bo gamádon in pakakat in parangnea!” Táe ki Asael in umuranbí mondudur kon inia.

²²Komintanpa doman in ki Abner noguman kon inia, “Dika mogaḷow kon inakó! Sinbá diá pakisakudon ḻimodon in iko. Dá, naondadon in pooindoiku kon i Yoab ki guya-guyangmu tua?”

²³Naonda in ki Asael umuran doí mogogai, pinonakuḷ i Abner ná tumi in pandongnea,[3] bo noitugatdon kon sian i Asael nodapot in noiḷambai kon ḻikudnea. Noobat in ki Asael poḷat minatoi kon tampat tatua. Bayongan in intau inta noiangoi kon tampat kinoobatannea tatua, sinumogon kon tua.

²⁴Táe ki Yoab bo ki Abisai in tantúdon nomatuk kon i Abner. Naonda in sinumoyopdon in mata in singgai, nodapotdon in mosia kon Buḷud Ama, inta kon dotá in pomukaan kon Giah, bobuion ná padang gurun Gibeon.

²⁵Kon tua in intau mita nongkon suku mita in Benyamin noyodugangdon bui i Abner, bo nonompiadon bui kon pipidan monia kon tudu in buḷud moompá tobatú.

²⁶Nongkon tua nomaḷú in ki Abner kon i Yoab, “Degá umurandon in kita moparang? Diábí kinotaauanmu degá kon parang tanaa in tongábí moponabud in pait? Kami naa in ki utatmu tongobangusa. Dapotpa in toonu in pogoḷatanmu mokipogogai in intaumu mita mogaḷow kon inami?”

²⁷Ki Yoab in notubag, “Podoyon kon tangoi i Allah inta nobiag, aka kuma bo iko in diá muna nopoyaput in tosingogon, yo notantú bidon kon intauku mita in umuranbí mogaḷow kon i monimu modapot in ikoḷom doḷo-doḷom.”

²⁸Bo nogirupdon in ki Yoab kon torompet nobaḻí tompoingat kon intaunea mita sinbá mogogaidon in mogaḷow kon intau in Israel, dá noobotdon in parang tatua.

²⁹Ki Abner takin intaunea mita tonggobii tua in nopipid nongin Ḷopá in Yordan, bo iḷumoḷan kon Ongkag in Yordan, bo naonda in minayá turus tosinggai noiduduimai kon tua, nodapotdon in mosia kon Mahanaim.

³⁰Naonda in ki Yoab nogogai nogaḷow kon i Abner, sinipunnea in bayongan intaunea. Koḻikud in ki Asael noniata magí yo mopuḷú bosiow in nongkon i monia tua in nobuḻi.

³¹Intau mita i Daud ain nokoḻimod kon 360 in tontara i Abner nongkon suku in Benyamin.

³²Nopaḷut mako kon tua ki Yoab bo intaunea mita in nobuatdon kon mayat i Asael bo iḷobong monia kon bonu in poḷoḷobongan in motoḷuadí kon Betlehem. Bo mosia in minayá in tonggobii tua bo nodapot in Hebron kon tungkuḷ in modiugdon mobayag.