Read Mongondow SAMUEL 2 21 Bible Online

SAMUEL 2 21 - Mongondow bible

SAMUEL 2 21

¹Kon tungkuḷ in ki Daud nomarenta, nobaḻídon in malarat moḷoben inta nobaḻí kon bonu in toḷu notaong nouput. Bo nopoigum in ki Daud in topotundú kon i TUHAN soaḷ tatua, bo ki TUHAN in noguman, “Malarat tatua in popisíbí in taḷá i Saul bo motoḷuadínea, mosia in noḻimodon kon intau mita in Gibeon.”

²(Intau mita in Gibeon deemanbí intau in Israel; mosia in noituot paanan mointok in intau in Amori. Intau mita in Israel ain nongibot kon moḷukad kon i monia, táe ki Saul in noḷongasibí noyopú kon i monia sin sia in norai kon kopontingan in intau in Israel bo Yohuda.) Bo ki Daud in nogoiní kon intau mita in Gibeon tatua

³bo noḻibó kon i monia, “Onu in motaau aidanku sin kopontinganmu? Moibog in akuoi motobut kon taḷá inta ain inaidan kon inimu, sinbá moiko in momarakat kon umat i TUHAN.”

⁴Tubag monia, “Pelekara nami takin i Saul bo motoḷuadínea in diábí motaau tongá paḷuton in saḷaka andeka in buḷawan, táe kami in doíbí doman in moḻimod kon tobatúmai nongkon bangusa in Israel.” Bo noguman in ki Daud, “Aka natua, onu in koibog monimu pomiaanku?”

⁵Tubag monia, “Ki Saul datu inta piniḻí i TUHAN in moibog moyopú kon inami komintan modapot in kami in putúandon nongkon bayongan in Israel.

⁶Tuamai, ogoidon in intau pitu nongkon buínea inta ḷoḷaki, sinbá gantongon nami kon tayowon i TUHAN kon Gibea, kotá i Datu Saul tontaní.” Tubag i datu, “Mopia, ogoikubí in mosia.”

⁷Táe popisí in ki Daud bo ki Yonatan aindon nongongibotan, ki Daud in diábí nobogoi kon i Mepiboset adí i Yonatan.

⁸Inta ginamá i Daud in ki Armoni bo ki Mepiboset, inta ki adí ḷoḷaki i Saul inta pinononggadí i Rizpa adí i Aya; bo ḻima doman in ki adí ḷoḷaki i Merab adí bobay i Saul, adí mita tatua in pinononggadí kon bonu in tonibuḷoi i Merab bo i Adriel adí i Barzilai, intau in Mehola tatua.

⁹Mosia in inogoidon kon intau mita in Gibeon, bo taya pitu tatua in minatoi noyotakin binambé kon tudu in buḷud kon tayowon i TUHAN. Hukuman minatoi tatua pinomia kon imbuit in sempo in pononubú, kon wakutu in momangkoidon moratab kon makoya.

¹⁰Bo ki Rizpa buḷoi i Saul inta diá inika, nopoompat in daing sosapi kon inia kon tudu in batu tampat pinopouḻidan in mayat mita tatua. Ki Rizpa in diábí nonaḷámai kon tampat tatua pinangkoi kon pinomangkoian pinonoḻisían kon bungai in boyó nodapot in nonguyan kon sempo in kinototakan. Diábí pinomayánea mako in mayat mita tatua in sinuyayow in ḷagapan mita kon dodai in singgai andeka mahaḷuk mita mokokaan kon tapú kon dodai in doḷom.

¹¹Naonda in pinotaau kon i Daud in onu inta inaidan i Rizpa,

¹²minayá in sia nogamá kon tuḷan mita i Saul bo i Yonatan nongkon intau mita inta nogutun kon kotá in Yabesh kon Gilead. (Intau mita tatua ain nonakow kon tuḷan mita tatua nongkon tanah lapang in kotá in Bet-San, tampat in intau in Pilistin nobambé kon mayat mita tatua naonda in nonaḷow kon i Saul kon Buḷud in Gilboa.)

¹³Tuḷan mita i Saul bo i Yonatan tatua in dinia nongkon tua, bo sinipunnea doman in tuḷan mita i nayapitu inta binambé tatua.

¹⁴Onda intua tuḷan mita i Saul bo i Yonatan takin tuḷan mita i nayapitu tatua in iḷobong kon bonu in pinoḷobongan kon i Kish ki amá i Saul kon Zela kon butá in Benyamin. Naonda in bayongan tua inaidan podudui in parenta i datu, ki Allah in nokidongog bo notubagdon kon sambayang monia kon kopontingan in butá tatua.

¹⁵Bui nobaḻí in parang kon sigad in intau in Israel bo intau in Pilistin. Ki Daud bo intaunea in minayá noparang nonayow kon intau in Pilistin. Kon pinoparangan tatua ki Daud inangoian in ḷopí.

¹⁶Namangoidon in intau tuyá tobatú inta ki Yisbi-Benob in tangoinea. Pandongnea in pinomia nongkon bitú, kobogatnea in degá toḷu bo tobotak in kilo. Sia in nopogabit doman in kedang mobagu, bo noyakinbí in sia kon mokoḻimodbí kon i Daud.

¹⁷Táe ki Abisai adí i Zeruya in namangoi notuḷung kon i Daud. Sinayowannea in tuyá tatua bo iḻimodnea. Nopaḷut mako kon tua intau i Daud nopoigum sinbá ki Daud in modandidon kon diádon tumakin bui moparang. “Ki Tuang datu in nobaḻí harapan in Israel, dika modapot in kami kobuḻian i Tuang datu,” guman monia.

¹⁸Bui doman nobaḻí in parang nonayow kon intau in Pilistin kon Gob. Kon bonu in pinoparangan tatua ki Sibkhai intau in Husa in noḻimod kon intau in tuyá inta ki Sap in tangoinea.

¹⁹Kon pinoparangan ibanea takin intau in Pilistin kon Gob, ki Elhanan adí i Yair[54] nongkon Betlehem in noḻimod kon i Goliat nongkon Gat. Puḷu in pandong i Goliat tua in ná koḷoben in kayu gogaboḷan.

²⁰Nobaḻí doman in parang nonayow kon intau in Pilistin kon Gat. Kon tua oyúon in intau tuyá tobatú inta moibog totok moparang. Togogonom in gongguyamú in ḻima bo sioḷnea doyowa nosimpaḷ.

²¹Sia in noningkuḻe kon intau in Israel, bo tuamai in iḻimod in sia i Yonatan adí i Simea, ki guya-guyang i Daud.

²²Intau opat inta iḻimod i Daud bo in tontaranea, in buí in tuyá kon Gat.