Read Mongondow SAMUEL 2 24 Bible Online

SAMUEL 2 24 - Mongondow bible

SAMUEL 2 24

¹Ki TUHAN in sinumorú bui kon Israel, bo ki Daud in dinondouḷugan-Nea sin makusud mopoangoi in roriga kon bangusa tatua. Guman i TUHAN kon inia, “Iapdon in intau kon Israel bo Yohuda.”

²Bo ki Daud in nogumandon kon i Yoab Tongguḷu totokan in tontaranea, “Bayádon takin porwiramu mita kon bayongan in suku Israel bo kon bayongan in butá sin mogiap kon intau. Moibog in akuoi monotaau kon kobayong monia.”

³Táe ki Yoab in noguman kon i datu, “Igumon mako ki TUHAN Allah i Tuang datu in mopobaḻí moantó in rayat in Israel modapot in modugang kogatut ná tanaa in kobayongnea nongkon kobayong monia tanaa mako, bo igumon mako ki Tuang datu in mobiagpa sinbá mokoontongpa kon tua. Táe onu in makusud i Tuang datu mokiiap intua?”

⁴Táe ki datu in umuranbí nomarenta nokiiap. Dá ki Yoab takin porwiranea mita in minayá sin nogiap kon bangusa in Israel.

⁵Naonda in iḷumoḷan kon Ongkag in Yordan, ki Yoab bo intaunea nononḷoḷaigan kon dotá in toḷatan kon Aroër, kotá tobatú kon yua-yuak in ḷopá kon butá in Gad.[65] Nongkon tua in mosia minayá in utuan, ná Yaezer,

⁶bo minayá doman in Gilead bo kon Kades kon butá in intau in Het.[66] Kamungkinan mosia minayá in Dan, bo nongkon Dan mosia in nomurow ná[67] dotá in toyopan, kon Sidon.

⁷Nongkon tua in mosia minayá ná toḷatan kon Tirus kotá inta oyúon in tampat poḷoḷukadan tua. Noiduduimai kon tua mosia minayá in bayongan kotá in intau in Hewi bo intau in Kanaan, bo imbuitnea in kon Bersyeba, kon dotá in toḷatan in Yohuda.

⁸Mosia in minaya-mayá mako kon bayongan in butá siow nobuḷan bo doyowa nopuḷú nosinggai. Nopaḷut mako kon tua nobuidon in mosia kon Yerusalem

⁹bo nopotaau kon i datu in kobayong in intau inta iniap tua. Kobayong in ḷoḷaki inta motaaudon mobaḻí tontara in 800.000 in intau in Israel bo 500.000 in intau kon Yohuda.

¹⁰Táe naonda in ki Daud nopaḷut nokiiap in bangusa tatua, irainea kon noitaḷádon in sia, bo sia noguman kon i TUHAN, “Oo TUHAN, binaradosadon totok in akuoi! Apungaidon in akuoi, sin aidku tatua in totokdon in nobodok.”

¹¹Ki TUHAN in noguman kon i Nabi Gad inta nobaḻí tondoḷ in singog kon sigad i Daud bo i TUHAN, “Bayádon bo pogumandon kon i Daud kon toḷu in ogoi-Ku pokipiḻí kon inia. Onukabí in piḻíonnea tua in aidan-Ku.” Nopoikoḷomai kon singgai, onda in ki Daud nobangon nongkon pinosiugan,

¹³namangoi in ki Gat kon tayowonnea bo nopotaau kon inia in parenta i TUHAN tatua, kainia, “Onda in piḻíon i Tuang datu: Butá tanaa koantugan in malarat diá in kaanon kon bonu in toḷu[68] notaong, andeka ki Tuang datu in moḷagui sin aḷo-aḷowan mako in musung kon bonu in toḷu nobuḷan, andeka butá tanaa tubuon in takit kon bonu in toḷu nosinggai? Tantúdon kon tanaa mako onu inta mustiku potaau kon i TUHAN.”

¹⁴Ki Daud in notubag, “Adodoia kaasí ah! Moboditodon in akuoi! Táe dika in akuoi hukumon in intau, dá mopia-piabí kon kita in hukumon i TUHAN, sin moḷoben in tabi-Nea.”

¹⁵Dá ki TUHAN in nopoangoidon in takit kon intau in Israel nongkon doḷo-doḷom nodapot kon wakutu inta ain sinantú-Nea. Kon bayongan in Israel in 70.000 in intau minatoi.

¹⁶Malaekat i TUHAN inta nodia kon popatoi tatua ain noiyaput in tampat poḷoḻidokan kon gandum kapunyaan i Arauna, intau in Yebus. Naonda in inontong i TUHAN kon malaekat tatua nosadiadon moyompat kon Yerusalem, ki TUHAN in nomaḷui kon kaputusan-Nea, bo nogogaidon in Sia nohukum kon bangusa tatua. Guman-Nea kon malaekat tatua, “Tugatdon! Pogogaidon!”

¹⁷Ki Daud in nokoontong kon malaekat inta koyogot moḻimod kon rayat, bo sia in noguman kon i TUHAN, “Akuoibí in binaradosa sin akuoibí in nomia kon taḷá tatua. Táe onu in taḷá in bangusa tatua? Hukumdon in akuoi bo motoḷuadíku!”

¹⁸Kon singgai doman tatua ki Gad in namangoi kon tayowon i Daud bo noguman kon inia, “Aka motaau yo poponikpa in ki Tuang kon tampat poḷoḻintogan kon gandum inta kapunyaan i Arauna, bo posindogdon i mezbah kon i TUHAN.”

¹⁹Dá nobuatdon in ki Daud ná podudui in parenta i TUHAN inta pinotaaunea pinongin i Gad.

²⁰Noikoḷatbí kon ki Arauna in iḷumongow monag, bo inontongnea in ki datu takin totakinnea namangoi kon inia. Sinumungkud in ki Arauna kon tayowon i Daud,

²¹bo noḻibó, “Onu in makusud inangoian i Tuang datu?” Tubag i Daud, “Motaḷui kon tampat poḷoḻintogan kon gandum tanaa, moibog in akuoi moposindog in mezbah kon i TUHAN kon naa, sinbá yampoi tanaa in mogogaidon.”

²²Guman i Arauna, “Gamádon Tuang datu, bo posumbadon kon i TUHAN onu inta inanggap i Tuang datu mopia. Naa in sapi mita ogoi mobaḻí kuruban payongon bo kayu pondungú motaaubí in ki Tuang datu mopondungú in puḷu mita in pajeko bo dopí mita poḷoḻintogan.”

²³Ki Arauna nobogoi in bayongan tua kon i datu,[69] poḷat noguman, “Igumon mako ki TUHAN Allah i Tuang datu in moibog motarima kon sosumba i Tuang datu.”

²⁴Táe ki datu in notubag, “Dika! Taḷuionkubí. Akuoi in doíbí moposumba kon i TUHAN Allahku in onuka inta tongá nouḻíku diá irorigaanmai.” Bo sinaḷuidon i Daud in tampat poḷoḻintogan kon gandum bo sapi mita tatua takin doit saḷaka ḻima nopuḷú.

²⁵Bo noposindogdon in ki Daud in mezbah kon tua kon i TUHAN bo noposumba in kuruban payongon takin kuruban dodamean. Ki TUHAN in nokidongogdon kon sambayang i Daud, bo nopaḷutdon in yampoi tatua kon Israel.