Read Mongondow SAMUEL 2 4 Bible Online

SAMUEL 2 4 - Mongondow bible

SAMUEL 2 4

¹Buí i Saul ibanea in ki Mepiboset, ki adí i Yonatan ḷoḷaki. Sia in nosedó in bobayánea nongkon umur bagu ḻima notaong, inta kon dodaipa in ki Saul bo ki Yonatan minatoi. Sin kon dodai in habar soaḷ kinopatoian monia namangoi nongkon kotá in Yizreel, bobay moḷoḷukad kon i Mepiboset nokoyot kon inia bo noḷagui; tongá popisí in bobay tatua dongkadon iḻimika-ḻikat totok, adí tatua in noḷabú dá nosedódon. Naonda in kinodongogan i Isyboset adí i Saul ḷoḷaki kon ki Abner in iḻimodon kon Hebron, noinggamádon in ropotnea, bo bayongan in Israel inagíandon in ondok. Ki Isyboset naa in oyúon in porwiranea doyowa inta nobaḻí tongguḷu in tontara mononubu; tobatú tangoinea in ki Baana, bo inta tobatú tangoinea in ki Rekhab. Mosia tua in ki adí i Rimon, nongkon Beerot nongkon suku in Benyamin. (Beerot noitakin kon suku Benyamin. Intau mita taakan kon tua in noḷaguidon komintan kon Gitaim bo nogutun kon tua pinangkoi kon dodai intua.)

⁵Porwira doyowa tatua, ki Rekhab bo ki Baana in nobuat minayá in baḷoi i Isyboset bo nodapot kon tua kon dodai in noutu in singgai, kon dodai intua ki Isyboset koyogot in nogogai singgai.

⁶Bobay moḷoḷukad kon baḷoi sinomposiug kon wakutu in yogot mondaritmai kon gandum, bo noḷoḷot. Tuamai in ki Rekhab bo ki Baana nokoḷongasi sinumuot.[5]

⁷Baḷú in mosia sinumuot kon gopot inta pinosiugan noḷoḷot i Isyboset, bo nonumbuk kon inia nodapot in minatoi. Pinongkó monia in uḷunea bodongka dinia monia minayá. Tonggobii nouput in mosia minayá nongin Ḷopá in Yordan.

⁸Onda intua mosia nobogoi in uḷu i Isyboset tatua kon i Daud kon Hebron poḷat noguman, “Naa in uḷu i Isyboset ki adí ḷoḷaki i Saul, musung i Tuang datu inta moḷongasi moḻimod kon i Tuang datu. Singgai in naa ki TUHAN ain notuḻí kon oaid i Saul bo buínea kon i Tuang datu.”

⁹Táe ki Daud in notubag, “Ki TUHAN inta nobiag, inta ain noposaḷamat kon inakó nongkon bayongan inta mokobodito, nonotaaubí kon onu inta singogonku naa in totuubí.

¹⁰Kon tungkuḷ in kon Ziklag oyúon in intau nopotaau kon inakó soaḷ kinopatoian i Saul, bo kainiakamai dá sia tua in nodiabí kon habar mopia. Táe sia tua in dinomokkudon bo iḻimod. Tuata in tondan inta inogoiku kon inia nobaḻí boḻi in pinodiaannea kon habar tatua.

¹¹Moiḻiubí in bogat in hukuman inta popoḷabúku kon intau moraat inta ain noḻimod kon intau inta diá kotaḷá bo inta koyogot in nosiug kon baḷoinea tontaní! Tanaa in tuntutonku in tontuḻínea kon i monimu kon pinoḻimodan tatua, bo monginggamá kon i monimu nongkon dunia naa!”

¹²Nopaḷut mako kon tua nomarentadon in ki Daud kon intaunea noḻimod kon i Rekhab bo kon i Baana. Nopaḷut mako iḻimod, ḻima bo sioḷ monia pinongkó bo binambé kon diug in tabang. Táe uḷu i Isyboset tatua in ginamá bo iḷobong kon kotá tatua doman kon bonu in pinoḷobongan kon i Abner.