Read Mongondow SAMUEL 2 5 Bible Online

SAMUEL 2 5 - Mongondow bible

SAMUEL 2 5

¹Nopaḷut mako kon tua namangoidon in bayongan itoi in suku mita in Israel kon i Daud kon Hebron bo noguman kon inia, “Kami naa in uputpabí in kompong i Tuang.

²Nongkon koḻipod, sedang bo kon tungkuḷpabí in ki Saul nomarentapa kon inami, ki Tuang doman inta nodia kon tontara in Israel pomuḷoi in mayá moparang, apa doman ki TUHAN ain nodandi kon i Tuang kon ki Tuangbí in mobaḻí itoi in umat-Nea bo mobaḻí datu monia.”

³Ki Daud in nomia kon dodandian takin itoi mita in Israel tatua kon Hebron, bo dinuí monia in sia nobaḻí datu in Israel.

⁴Ki Daud umur toḷu nopuḷú notaong kon dodai in sia nobaḻí datu, bo nomarenta in sia opat nopuḷú notaong in koonggotnea.

⁵Kon Hebron nomarenta in sia pitu notaong bo tobotak in koonggotnea, bo kon Yerusalem sia nomarenta kon bayongan in Israel bo Yohuda toḷu nopuḷú notaong in koonggotnea.

⁶Kon singgai tobatú ki Datu Daud bo intaunea mita in nobuat sin mayá monubu kon Yerusalem. Intau in Yebus inta nogutun kon kotá tatua, in norai kon ki Daud in diábí mokotaḷow kon Yerusalem. Tuamai in mosia noguman kon inia, “Iko in diábí mokotuot mangoi kon naa; tongákabí intau mita inta bilog bo intau mita inta nongosedó yo mokountunbí kon inimu.”

⁷Ki Daud in noguman kon intaunea, “Oyúon degá in kon naa in intau inta mobú kon intau in Yebus ná doman akuoi mobú kon i monia? Mobúdon totok degá in sia modapot in sia moibogdon totok moḻimod kon i monia? Aka natua, tuotdon mongin daḷan in tubig bo tubudon in intau mita inta nosedó bo nobilog inta kinobúmu tua.” (Tuamai intau nosingog, “Intau bilog bo intau nosedó diábí motaau in tumuot kon Baḷoi i TUHAN.”)[6] Ki Daud nokoḷongasi nogagow kon poḷoḷukadan in Sion bo iḻitúannea. Sinangoiannea “Kotá i Daud.” Kotá tatua pinosindognea kon ḻibu in poḷoḷukadan tatua, pinangkoi nongkon dotá in pomukaan kon buḷud inta sinuod pinomonturungan kon butá.

¹⁰Koonggot-koonggot koropot-koropotdon in ki Daud, sin ki TUHAN, Allah Inta Totok in Mokawasa notuḷung kon inia.

¹¹Ki Datu Hiram nongkon Tirus nopotabá in intaunea mita moḷoben namangoi kon i Daud, bo kayu mita ḷokuyú in Libanon bo mogogimok mita kon kayu takin intau mita inta motaau mopoyoguntuḷ mita in batu sin moposindog in komaḻig.

¹²Tuamai in ki Daud noyakindon totok kon ki TUHAN ain nopobaḻí kon inia datu in Israel, bo moginropot kon dodatuan nea sin kopontingan in umat i TUHAN.

¹³Naonda in ki Daud nomamping nongkon Hebron bo minayá in Yerusalem, buipa in sia nononibuḷoi kon tongonumai in bobay bo nogamá doman kon tongonumai in bobay sin binaḻínea buḷoi inta diá inika; dá nodugangdon in kobayong in adínea ḷoḷaki bo bobay.

¹⁴Ki adínea mita ḷoḷaki inta pinononggadí kon Yerusalem in: ki Syamua, ki Sobab, ki Natan, ki Salomo,

¹⁵ki Yibhar, ki Elisua, ki Nepeg, ki Yapia,

¹⁶ki Elisama, ki Elyada bo ki Elipelet.

¹⁷Naonda in kinodongogan in intau in Pilistin kon ki Daud ain binaḻí datu in Israel, namangoi in mosia sin modomok kon inia. Táe kinodongogan i Daud in soaḷ tatua, bo minayá in sia in poḷoḷukadan.

¹⁸Intau in Pilistin nodapot kon Ḷopá in Repaim bo iḻitúannea.

¹⁹Noḻibó in ki Daud kon i TUHAN, “Musti degá tubuonku in intau in Pilistin tatua? Degá popountung-Mu in akuoi?” “Tubudon!” tubag i TUHAN. “Popountung-Kubí in iko!”

²⁰Onda intua minayádon in ki Daud kon Baal-Perasim bo sinaḷownea kon tua in tontara mita in Pilistin. Bo noguman in sia, “Ki TUHAN ain nondumpak kon poḷoḷukadan in musungku, naonda bo ḷunud noyompat kon bayongan in yagi-yagi tongá sakidap mako natua.” Tuamai in tampat tatua sinangoian Baal-Perasim.[7]

²¹Tontara mita in Pilistin noḷagui poḷatdon diá kinodiaan monia in bayongan patong mita berhala monia. Patong mita tatua in ginamá i Daud bo in intaunea mita.

²²Diá noonggot kon tua intau mita in Pilistin bui namangoi bo iḻimitú kon Ḷopá in Repaim.

²³Komintanpa doman bui in ki Daud nopoigum in topotundú kon i TUHAN. Tubag i TUHAN, “Dika monubu kon i monia nongkon naa, táe bayádon poḻibu bo tubudon in mosia nongkon tumi, kon diug in pangkoi mita in murbei.

²⁴Aka kodongoganmudon in singog in sapatu naonda bo intau inta nopipid kon ḷuntung in pangkoi mita tatua, dá pomajudon, sin Akuoi in mayábí kon munamu sin monaḷow kon tontara in Pilistin.”

²⁵Inaidan i Daud onu in pinoki aid i TUHAN, bo kinountunanannea in intau in Pilistin nongkon Geba nodapot kon Gezer.