Read Mongondow SAMUEL 2 6 Bible Online

SAMUEL 2 6 - Mongondow bible

SAMUEL 2 6

¹Noiduduimai kon tua buidon in ki Daud nogoiní kon tontara mita inta totok in mongopia sinbá moyosipun, kobayongnea in 30.000 in intau.

²Mosia in dinianea nopobayá ná Baale-Yohuda, [8] sin mayá intua mogamá kon Poti Dodandian inta dinonoi takin tangoi i TUHAN Inta Totok in Mokawasa inta nongawasa kon ḻimonik in kerub mita.[9]

³Poti Dodandian tatua in ginamá nongkon baḷoi i Abinadab kon tudu in buḷud bo pinopodatog kon roda inta mobagu. Bo ki Uza taya dua i Ahio, adí mita i Abinadab dinumudui kon roda tatua; ki Uza in minayá kon sínea,

⁴bo ki Ahio in minayá kon munanea.

⁵Ki Daud bo bayongan in bangusa Israel minayá kon muna in Poti tatua sindaḷan motayok inimibo-ibogbí[10] bo nodondong sin mohoromat kon i TUHAN. Nopogogitog in mosia in kecapi, gambus, rebana, kelentingan bo simbal.

⁶Naonda in mosia nodapot kon tampat poḷoḻintogan kon gandum i Nakhon, sapi mita inta nogugut kon roda tatua in noidumpak, bo ki Uza in notonggó kon ḻimanea sin potonoi kon Poti in Dodandian tatua sinbá diá moḷabú.

⁷Bo kon dodaipa doman tatua ki TUHAN sinumorú kon i Uza, sin aidnea tatua in mopoompábímai[11] kon i TUHAN. Iḻimod-Nea in ki Uza kon tampat tatua, kon diug in Poti Dodandian.

⁸Dá pinangkoi kon dodai intua tampat tatua sinangoian Peres-Uza.[12] Ki Daud sinumorú sin ki TUHAN in noḻimod kon i Uza.

⁹Táe moondok doman in ki Daud kon i TUHAN bo noguman, “Yo naonda in pododiaku kon Poti in Dodandian tatua?”

¹⁰Tuamai in doídon in sia modia kon Poti in Dodandian tatua mayá in Yerusalem, táe sinagúneadon kon baḷoi i Obed-Edom intau in Gat.

¹¹Poti Dodandian tatua in toḷu nobuḷan in kon tua, bo ki TUHAN in nomarakat kon i Obed-Edom takin motoḷuadínea.

¹²Dinongogdon i Datu Daud kon ki TUHAN in nomarakatdon kon motoḷuadí i Obed-Edom takin bayongan in kapunyaannea popisí in Poti Dodandian tatua. Dá minayádon in sia kon baḷoi i Obed-Edom, nogamá kon Poti Dodandian tatua sin pampingon kon Yerusalem takin pia in gina.

¹³Naonda in intau mita inta nobuat kon Poti Dodandian tatua aindon onom noḷangkad in binayáan, pinoki gogaianpa i Daud in mosia. Bo noposumba in sia in kuruban kon i TUHAN, sosumbanea tua in sapi koḷakian bo ki adí in sapi inta iḷongóan.

¹⁴Onda intua notayokdon totok in ki Daud takin ḷunganga in gina sin mohoromat kon i TUHAN. Kon dodai intua tongá in sia nomaké in sosapi linen inta nopoḷok inta sinogot kon ogotannea.

¹⁵Natuata in nobaḻí ki Daud bo bayongan in rayat in Israel nomamping kon Poti in Dodandian tatua kon Yerusalem, sinakinan in giow bo singog in torompet.

¹⁶Naonda in Poti tatua diniadon potuoton kon bonu in kotá, ki Mikhal adí bobay i Saul iḷumongow nongkon jandela bo inontongnea in ki Datu Daud ḷumansi-ḷansik in motayok sin mohoromat kon i TUHAN, bo nooyá in ki Mikhal in nokoontong kon i Daud.

¹⁷Poti in Dodandian tatua in inukat kon tampatnea kon bonu in ḷoḷaigan inta pinosindog i Daud sin pogukatan kon Poti tatua. Onda intua ki Daud noposumba in kuruban dodamean kon i TUHAN.

¹⁸Bo sia in nomarakat kon rayat in Israel pinodoyon kon tangoi i TUHAN Inta Totok in Mokawasa.

¹⁹Bodongka nosilai kon kaanon kon i monia komintan. Bayongan in intau inta kon tua, ḷoḷaki andeka bobay inogoiannea in ponoyá tumongo bonsig inta inangag,[13] roti bo kukis kismis. Nopaḷut mako kon tua nobuidon in mosia kon baḷoinea-baḷoinea.

²⁰Kon tungkuḷ in mobuidon in ki Daud kon komaḻig sin mopoyaput in salam kon motoḷuadínea, iḻumuai in ki Mikhal nokipodungkuḷ kon i Daud bo noguman, “Singgai in naa datu in Israel totu-totuudon nopohoromat kon awaknea tontaní! Nomilangdon in sia naonda bo intau dondunguḷ inta diádon kooyá kon tayowon in ata mita bobay buḷoi in pogawai mita in komaḻig!”

²¹Ki Daud in notubag, “Akuoi naa in notayok sin mohoromatbí kon i TUHAN, inta ain nondoí kon i amámu bo kon motoḷuadínea, bo nomiḻí kon inakó nobaḻí itoi in Israel, umat-Nea. Tuamai umuranbí in akuoi motayok sin mohoromat kon i TUHAN.

²²Nodapotbí in akuoi in motarimabí kon singkuḻe inta moiḻiu kon ná koina. Motaaubí in iko[14] in mokopoompámai kon i akuoi, táe ata mita inta sinangoimu mita koina, in mohoromatbí kon inakó!”

²³Ki Mikhal, adí bobay i Saul tatua in diábí nokouḻí kon adí kinoouputbí in kinobiagannea.