Read Mongondow SAMUEL 2 7 Bible Online

SAMUEL 2 7 - Mongondow bible

SAMUEL 2 7

¹Ki TUHAN in noḷukad kon i Datu Daud nongkon bayongan in tuyayow in musung, dá sia in motaaudon umuran motantú kon bonu in komaḻignea.

²Dá nogumandon in ki datu kon i Nabi Natan, “Indoiai, akuoi in nogutun kon komaḻig inta pinomia nongkon kayu ḷokuyú in Libanon, bokaka Poti in Dodandian i Allah in tongábí sinagú kon bonu in ḷoḷaigan!”

³Tubag i Natan, “Aidaidon in bayongan inta i niat i Tuang datu, sin ki TUHAN in notuḷung kon i Tuang datu.”

⁴Táe kon doḷom tua ki TUHAN in noguman kon i Natan,

⁵“Bayá bo potaau kon i Daud mogogundoi-Ku in koyow-Ku tanaa, ‘Umpaka dá ikobí in moposindog in baḷoi kon i-Nakó.

⁶Pinangkoipamai in bangusa in Israel pinoḷuat-Ku nongkon Mesir nodapot in tanaa, diápabí kon dodai in onda in Akuoi nogutun kon bonu in baḷoi tobatú, táe umuranbí modondaḷoi magí mako bo mogutun kon ḷoḷaigan tobatú.

⁷Kino oonggot in pinodondaḷoian-Ku noyotakin in bangusa in Israel, diápabí kon dodai in onda in Akuoi in noḻibó kon itoi mita[15] inta ain piniḻí-Ku, nongonu sin mosia in diábí noposindog in baḷoi nongkon kayu ḷokuyú in Libanon kon i-Nakó.’

⁸Tuamai, Natan, potaau kon mogogundoi-Ku ki Daud, kon Akuoi, ki TUHAN Inta Totok in Mokawasa, noguman kon inia, ‘Iko in biningkat-Kudon nongkon oaidanmu moḷoḷukad kon domba kon tampatnea bo dinuí-Kudon nobaḻí datu kon umat-Ku Israel.

⁹Sinakinan-Ku in iko kon ondakabí in binayáanmu, bo bayongan in musungmu aindon sinoko yompat-Ku kon dodai in iko noparang. Iko in baḻíon-Kudon ponango-nangoian ná itoi mita inta totok in moḷoben kon dunia.

¹⁰Apa doman, kon umat-Ku Israel aindon pinosadiaan-Ku kon tampat bo pinoki utunan-Kudon motantú in mosia kon tua, sinbá mosia in mokorasadon kon kobiagan inta mopia, diádon tuyayowon bui. Nongkon kinoangoian monia kon butá tanaa koḻipod, bo dinuí-Kudon in itoi mita kon i monia, mosia tantú tubuon in intau mita inta mongoromú, táe tua in diá bidon mobaḻí bui. Akuoi in modandi kon iko in moiḷuat bidon nongkon bayongan musung, bo Akuoi in mobogoidon in buí kon inimu.

¹²Kon singgai moiduduimai, aka wakutumudon matoi, bo iko in ḷobongon kon pinoḷobongan kon mogoguyangmu, ki adímu ḷoḷaki in duíon-Ku mobaḻí datu. Siadon tua in momia kon baḷoi kon i-Nakó. Dodatuan-Nea in irigonan-Ku bo kon kinoouputbí in dunia naa tobatú buínea in momarenta mobaḻí datu.

¹⁴Akuoi in mobaḻí ki Amánea, bo sia in mobaḻí ki adí-Ku ḷoḷaki. Aka mogaid in sia kon inta moitaḷá, yo hukumon-Ku in sia ná guyanga ḷoḷaki mohukum kon i adínea.

¹⁵Táe tabi-Ku kon inia in diábí moinggamá podudui in dandi-Ku. Dandi-Ku kon inia in umuran-Kubí kadaian, diábí ná inta ain pinomia-Ku kon i Saul inta ain inindoí-Ku nongkon ḷoḻitúannea sinbá iko in motaau mobaḻí datu.

¹⁶Iko in umuranbí mokouḻí kon buí, bo baḻíon-Kubí in dodatuanmu tantú moisindog mako. Kinoouputbí in dunia naa intau tobatú nongkon buímu in momarenta mobaḻí datu.’ ”

¹⁷Bo pinotaau i Natan kon i Daud in bayongan inta pinoniata i Allah kon inia.

¹⁸Bo sinumuotdon in ki Datu Daud kon bonu in ḷoḷaigan i TUHAN. Iḻimitú in sia bo nosambayang, “O TUHAN Inta Totok in Moḷantud, akuoi takin motoḷuadíku in diábí patus motarima kon kopiaan inta pinoontong-Mu kon inakó naa in kino oonggot.

¹⁹Nodapot in Iko nomia kon noiḻiubí totok nongkon tua, o TUHAN Inta Totok in Moḷantud; Iko ain nomia kon dandi kon buíku inta kobayáan kon singgai moiduduimai. Bo pinoontong-Mu intua kon inakó, umpakabí akuoi naa in tongá intau,[16] o TUHAN Inta Totok in Moḷantud!

²⁰Onupabí in motaau singogonku kon ini-Mu? Iko in nonotaau kon bayongan yagi-yagi kon mogogundoi-Mu naa.

²¹Pinodoyon kon dandi-Mu bo pinodoyon kon ibog-Mu tontaní Iko ain nomia kon oaidan mita inta moḷoben tua sin motundú kon mogogundoi-Mu naa.

²²Iko in totu-totuubí kon mokawasa, o TUHAN Allah! Tongábí Iko in Allah, diábí in notongkai-Mu. Kinotaauanbí nami intua sin ain pinotaau nongkon tungkuḷpabí intua.

²³Kon dunia naa in diábí in bangusa ná Israel. Tongábí Israel tuata in bangusa inta ain pinoḷuat-Mu nongkon pinononggataan sin mobaḻí umat-Mu tontaní. Bayongan in aid moḷoben bo inta mokoherang inta pinomia-Mu kon i monia,[17] mopobaḻí kon tangoi-Mu ponango-nangoian kon dunia. Bangusa mita ibanea takin dewa mita monia aindon inuntun-Mu[18] kon tungkuḷ in umat-Mu minayá noparang.

²⁴Bangusa in Israel aindon binaḻí-Mu umat-Mu tontaní kinoouputbí in dunia, bo Iko o TUHAN, in nobaḻí Allah monia.

²⁵Bo tanaa, o TUHAN Allah, moibog in Iko moginrigon kon dandi inta ain siningog-Mu soaḷ akuoi bo buíku kon kinoouputbí in dunia naa. Aka motaau dá aidaidon in onu inta ain pinodandi-Mu tatua.

²⁶Kon ondakabí in intau umuranbí mopoḷantud in tangoi-Mu bo moguman, ‘Ki TUHAN Inta Totok in Mokawasa in ki Allahbí in Israel.’ Dá kon kinoouputbí in dunia naa intau tobatú nongkon buíku in momarentabí mobaḻí datu kon bangusa tanaa.

²⁷TUHAN Inta Totok in Mokawasa! Nokopobaranidon in akuoi in nopoyaput in sambayangku tanaa kon ini-Mu, sin Ikodon tontaní in nopotaau kon inakó kon adí bo ompuku bo namonag in baḻíon-Mu datu kon bangusa tanaa.

²⁸O TUHAN Inta Totok in Moḷantud, Ikobí in ki Allah; bayongan in dandi-Mu totuuon-Mu, bo inta mopia tatua aindon pinodandi-Mu kon inakó.

²⁹Tuamai, poigumonku, moibogdon momarakat kon buíku sinbá kinoouputbí in dunia naa mosia in umuran mokouma kon tabi-mu. O TUHAN Inta Totok in Moḷantud, bayongan intua aindon pinodandi-Mu, dá buíku in umuranbí barakatan-Mu kino ouput in dunia naa.”