Read Mongondow DATU MITA IMITÁNEA 10 Bible Online

DATU MITA IMITÁNEA 10 - Mongondow bible

DATU MITA IMITÁNEA 10

¹Datu bobay kon butá in Syeba nokodongogdon kon habar soaḷ ki Salomo. Dá namangoi in sia kon Yerusalem sin monungkuḷ kon i Salomo takin nobogoi in tangkí mita inta mongobogat raion.

²Namangoi in sia kotaki-takin in intaunea inta mobayong bo unta mita inta dinatogan in touḷut mita inta mongo bo mongobondu, batu permata, bo buḷawan inta mobarong totok. Kon dodai in noyodungkuḷ i Salomo, ki datu bobay tatua in nopoyaput in tangkí inta noyagi-yagimai onu in kotoropannea.

³Bayongan inta iḻibónea tatua kotubagan i Salomo, diábí in tobatúmai in moyoyiganea tubagan.

⁴Ki Datu bobay tatua in nokoontongdon tontaní kon nádomai tua in kobobijaksana i Salomo. Inontongneadon in komaḻig inta pinosindog i Salomo,

⁵pogogaid in pogawainea mita kon komaḻignea, bo pakeang moyotakin bo baḷoi mita monia. Inindoiannea doman in kaanon bo oinumon inta inoḷud, pononoḻisí in bobantung mita kon rame, bo kuruban mita inta pinosumba i Salomo kon Baḷoi TUHAN. Bayongan intua nokoherang nodapot in noitongau in ki datu bobay nongkon butá in Syeba tatua.

⁶Dá nogumandon in sia kon i Datu Salomo, “Bayongan inta dinongogku nongkon butáku soaḷ ki Tuang bo kabijaksanaan i Tuang, in totuubí!

⁷Koḻipod akuoi in diábí mopirisaya, táe naonda in akuoi namangoi bo nokoontong tontaní kon bayongan intua, baintua bo noyakindon in akuoi. Noniata magí yo bayongan inta ain dinongogku in diápabí noyotombotakmai nongkon onu inta ain inontongku tanaa. Noniata magí yo kabijaksanaan bo kaoyúonan i Tuang in moḷobe-ḷobenbí nongkon onu inta ain pinotaau kon inakó.

⁸Totuu mountung in ki buḷoi mita i Tuang! Bo totuu momujur in pogawai mita inta umuran mogaid kon i Tuang sin mokodongogdon kon bayongan totundú inta mobijaksana nongkon i Tuang tontaní!

⁹Dinayo-dayowdon in ki TUHAN, Allah i Tuang! Inta ain noduí kon i Tuang nobaḻí datu in Israel, pinoniata i TUHAN kon totuu mopia in gina-Nea kon i Tuang. Diá modai-dait in tabi-Nea kon bangusa in Israel; tuamai in Sia noduí kon i Tuang nobaḻí datu monia sinbá ki Tuang motaau moposindog in hukum bo koadilan.”

¹⁰Onda intua ki datu bobay nongkon butá in Syeba nobogoi kon i Salomo in tombuinag mita inta dinianea, inta noiḻiu kon 4.000 nokilo in buḷawan bo batu permata inta mobarong doman takin touḷut mita inta mongo bo mongobondu. Diá bidon kon dodai in onda in ki Salomo notarima kon touḷut mita mongo bo mongobondu inta námai tua in kobayong ná inta inogoi i datu bobay inta nongkon butá in Syeba tatua kon inia. (

¹¹Kapaḷ mita i Hiram inta nodia kon buḷawan nongkon Opir sin ogoi kon i Salomo, in nodia doman kon nobayong in batu permata bo kayu sondana.

¹²Kayu tatua in inaidan i Salomo bonoboi mita kon Baḷoi TUHAN bo kon komaḻig in datu; bo inaidan doman kecapi bo gambus kon intau mita mododondong. Kayu mita tatua in kayu mita sondana inta totok in mongopia inta nokoimontandon dinia mangoi kon Israel, diádon kon dodai in onda in intau nokoontong kon kayu ná kopia in kayu tatua.)

¹³Koḻikud in tombuinag mita inta biasamai ogoi i Salomo, sia in nobogoi doman kon i datu bobay nongkon butá in Syeba tatua in bayongan inta inigumnea. Onda intua nobuidon in ki datu bobay tatua kon butánea noyotakin in intau mita inta noyotakinnea mangoi.

¹⁴Pomuḷoi in taong ki Datu Salomo motarima kon gogió bo 23.000 nokilo in buḷawan,

¹⁵diápabí pinoyoiap in kauntungan mita nongkon podagangan bo pajak mita nongkon intau mita inta mododagang, datu mita in Arab bo gubernur mita in Israel.

¹⁶Ki Salomo in nokiaid doman in 200 in kaḻeaw moḷoben nongkon buḷawan inta sinontaḷ. Buḷawan inta pinaké kon batúan in kaḻeaw[11] tua in pitumai nokilo.

¹⁷Sia in nokiaid doman in 300 in kaḻeaw buḷawan inta ona-onag intua in koḷobennea. Buḷawan inta pinaké kon batúan in kaḻeaw mointok tatua in doyowamai nokilo, komintan buḷawan sinontaḷ. Bayongan kaḻeaw tatua inukatnea kon baḷoi inta sinangoian Baḷoi Kayuon in Libanon.[12]

¹⁸Sia in nogaid doman in kadera in dodatuan inta moḷoben inta inaipan in gading bo iḷambáan in buḷawan taakan.

¹⁹Kadera tatua oyúon in ḻimanea bo kon dotá in posiḷosi oyúon in patong in singa. Kon tumi in kadera tatua oyúon in patong uḷu in sapi. Kadera tatua in oyúon doman in tukad mointok onom.

²⁰Kon popodnea koḷoigi bo kon popodnea koḷanan kon batúan in tukad mointok tatua oyúon in patong in singa — kobayongnea komintan in mopuḷú bodoyowá. Diábí kon dodai in onda oyúon in kadera in dodatuan in ná tatua in kon dodatuan kon ondakabí.

²¹Komintan pakakat pongonginuman i Salomo in pinomia nongkon buḷawan, bo bayongan in pakakat kon Baḷoi Kayuon in Libanon in pinomiabí doman nongkon buḷawan taakan. Diábí in pinomia nongkon saḷaka, sin kon tungkuḷ i Salomo saḷaka tua in anggaponbí in intau diá in mangaḻenea.

²²Mobayong doman in kapaḷ moḷoben i Salomo inta ḷumeag moyotakin in kapaḷ mita i Datu Hiram. Toḷu notaong in komintan kapaḷ mita tatua mobui modia kon buḷawan, saḷaka, gading, boḷai bo ḷagapan merak.

²³Ki Datu Salomobí in mooyu-oyúon bo mobija-bijaksana nongkon bayongan in datu kon ondakabí kon dunia naa.

²⁴Bayongan in intau kon dunia naa in moḷongasibí mokipodungkuḷ kon i Salomo sin mokidongog kon totundú inta mobijaksana inta inogoi i Allah kon inia.

²⁵Mosia kon batúannea in mamangoi takin kodia-dia in tombuinag kon i Salomo. Mosia mobogoi in pakakat mita saḷaka, buḷawan, ḷambung, ḷoḷutam, touḷut mita mongo bo mongobondu, kabaḷo bo bagal. Natuata in nobaḻí muḷoi in taong.

²⁶Ki Salomo in nogoiní kon intau mita binaḻí tontara in parang inta ná tanaa: 1.400 in kereta in parang bo 12.000 in tontara tumotakoi kon kabaḷo. Ibanea in pinobayánea kon Yerusalem bo ibanea doman in kon bayongan in kotá ibanea.

²⁷Kon bonu in pinomarentaan i Salomo, saḷaka in nobaḻíbí pakakat inta biasamai tongádon naonda bo batu, bo kayu ḷokuyú in mobarong doman totok naonda bo kayu ara biasa.

²⁸Pinongin pongusaha mita i datu, kabaḷo pinoangoi nongkon Mesir bo Kilikia,

²⁹bo kereta mita in parang in dinia mangoi nongkon Mesir. Boḻi in kabaḷo tobatú in 150 in doit saḷaka, bo boḻi in kereta in parang tobatú in onom nogatut in doit in saḷaka. Onda intua pinongin pongusaha mita tatua doman kabaḷo mita bo kereta mita in parang tatua pinotaḷui bui kon datu mita in Het bo datu mita in Siria.