Read Mongondow DATU MITA IMITÁNEA 11 Bible Online

DATU MITA IMITÁNEA 11 - Mongondow bible

DATU MITA IMITÁNEA 11

¹Ki Datu Salomo in nongibog kon mobayong in bobay nongkon butá ibanea. Koḻikud in adí bobay i datu in Mesir, ki Salomo in notonibuḷoi doman takin bobay mita in Het, Moab, Amon, Edom bo Sidon.

²Ki TUHAN ain nomarenta kon Israel in diábí motaau motonibuḷoi takin in bangusa mita tatua, sin mosia in mokopopisídon kon intau in Israel mosumba kon ilah mita ibanea. Umpaka natua, ki Salomo in umuranbí doman notonibuḷoi in bobay mita nongkon butá ibanea.

³Pitu nogatut in adí bobay in intau moḷoben in pinobuḷoi i Salomo, bo toḷu nogatut in pahangnea. Ki buḷoinea mita tatuata inta nokopopisí kon i Salomo in nonoḻikud kon i Allah.

⁴Kon dodai in sia nogoguyangdon mosia in nokodondouḷugdon kon inia nosumba kon ilah mita ibanea. Ki Daud, ki amá i Salomo in tantúbí mosatia kon i TUHAN, Allahnea, táe ki Salomo in diá ná ki amánea.

⁵Ki Salomo in nosumba kon i Asytoret, dewi in bangusa in Sidon, bo kon i Molokh dewa inta mokorongó inta sinumba in bangusa in Amon.

⁶Natuata ki Salomo in nogaidon kon dosa kon i TUHAN. Ki Daud, ki amá i Salomo in dinumudui kon i TUHAN takin ḻimbatú in gina, táe ki Salomo in diábí ná tua.

⁷Kon tudu in buḷud kon dotá in pomukaan kon Yerusalem, noposindog in sia in tampat posumbaan kon i Kamos, dewa in intau Moab, bo kon i Molokh, dewa in intau Amon — doyowa tatua tumpaḷa dewa inta mokorongó.

⁸Ki Salomo in noposindog doman in tampat mita inta motaau potubáan i buḷoinea mita inta nongkon bangusa ibanea kon dupa, bo moposumba in kuruban kon dewa mita monia tontaní.

⁹Koduadon in ki TUHAN, Allah in Israel in nokipogontong kon i Salomo bo noponorop kon inia kon sia in diábí motaau in mosumba kon ilah mita ibanea, tongá ki Salomo in doíbí dinumudui kon i TUHAN. Noiyaputbí in nonoḻikudon in sia kon i TUHAN, dá sinumorúdon in ki TUHAN kon inia.

¹⁰

¹¹Ki TUHAN in noguman, “Popisí in kinotaauanmubí kon iko in iḻimimpatdon kon dodandianmu takin-Ku bo diá dinumudui kon parenta-Ku mita, dá Gamáan-Kudon in dodatuan tatua nongkon inimu, bo ogoi kon pogawaimu tobatú.

¹²Umpaka natua, popisí in ki amámu ki Daud, Diábí aidan-Ku intua kon dodai in iko mobiagpa. Kon tungkuḷ in ki adímu ḷoḷaki in momarenta, baintua bo aidan-Ku intua.

¹³Táe diábí modait-Ku gamáan in bayongan dodatuan tatua nongkon inia. Popisí in mogogundoi-Ku ki Daud bo Yerusalem inta ain binaḻí-Ku kotá-Ku tatua, tonggagatan-Kupabí in suku tobatú inta ogoi kon i adímu ḷoḷaki.”

¹⁴Dá binaḻídon i TUHAN in ki Hadad, intau tobatú inta buí i datu in Edom, nosaturu kon i Datu Salomo.

¹⁵Noonggotpa kon tua, naonda in ki Datu Daud nopotungkud in Edom, ki Yoab, tongguḷu totok in tontara i Datu Daud, minayá in Edom sin mayá moḷobong kon intaunea mita inta minatoi kon parang. Onom nobuḷan in koonggotnea in sia bo intaunea mita nogutun kon Edom. Bo kon bonu in wakutu tatua mosia noḻimod kon bayongan in ḷoḷaki kon tua.

¹⁶

¹⁷Táe, ki Hadad inta tungkuḷ intua noguodpa, ain noḷagui kon Mesir noyotakin in tongonumai in intau in Edom, bobantung mita i amánea.

¹⁸Mosia in nobuat nongkon Midian, bo minayá kon Paran. Kon tua tongonumai in intau ibanea dinumugang kon i monia, bo noyotakin minayá in Mesir nokipodungkuḷ kon i datu in Mesir. Ki datu tatua nobogoi kon i Hadad in baḷoi bo butá sin pogutunannea bo jaminan in kobiagan.

¹⁹Dá ki Hadad in nobaḻídon yobayat mopia i datu, nodapot in ki datu nobogoidon kon i dónea tontaní, inta ki ai-ai i buḷoinea ki Tahpenes kon i Hadad sin mobaḻí ki buḷoinea.

²⁰Onda intua ki buḷoi i Hadad tatua nopononggadí in adí ḷoḷaki tobatú inta sinangoian ki Genubat. Adí tanaa in biniag i buḷoi datu tontaní bo nogutun kon komaḻig noyotakin in adí mita ḷoḷaki i datu.

²¹Naonda in ki Hadad nokouḻí kon habar kon ki Datu Daud in minatoidon, bo ki Yoab, tongguḷu totok in tontara in parang in Israel in minatoi domandon, dá nogumandon in ki Hadad kon i datu in Mesir, “Ogoipa in akuoi mobui kon butáku.”

²²“Eta nongonu uḻe?” ki datu noḻibó. “Eta onupa degá in diá in kon inimu, moiyaput in moibogpa in iko mobui kon butámu?” “Diábí in diá in kon inakó,” tubag i Hadad, “táe pomayápa mako in akuoi mayá.” Dá nobuidon in sia kon butánea tontaní.[13]

²³Binaḻí doman i Allah in ki Rezon, adí i Elyada, nosaturu kon i Salomo. Ki Rezon in ata inta noḷagui nongkon i Tuangnea inta ki Datu Hadadezer nongkon Zoba.

²⁴Ki Datu Daud in nokoimontandon in nonaḷow kon i Hadadezer tanaa bo noḻimod kon yobayat mita i Hadadezer nongkon Siria. Kon dodai intua ki Rezon in noḷagui nongkon i Hadadezer bo nosipun kon intau mita bo nobaḻí itoi in ḷagu-ḷagui. Sia bo intaunea mita in minayá in Damsyik bo nogutun kon kotá tatua. Kon tua intaunea mita noduí kon inia nobaḻí datu in Siria.

²⁵Ná doman ki Hadad, ki Datu Rezon in nosaturu doman kon Israel kon tungkuḷ in ki Salomo nobiagpa, bo nonuyayow kon butá tatua.

²⁶Intau ibanea inta nomarontak noḷawang kon i Salomo in pogawainea tobatú inta ki Yerobeam in tangoinea. Sia in ki adí i Nebat nongkon Zereda kon Epraim. Ki inánea in dongkadon boba-bobay, ki Zerua in tangoinea.

²⁷Noiduduimai naa in ouman pinomarontakan i Yerobeam. Kon tungkuḷ in butá kon dotá in toḷatan in Baḷoi TUHAN yogot bumbunan, bo dinding in kotá yogot in tompiaan,

²⁸ki Yerobeam in nogaid doman kon tua. Naonda in inontong i Salomo kon ki Yerobeam in motoḻindat bo morajing, sia in nobogoi in oaidan kon inia moindoi kon pogaidan in ata mita kon butá in suku in Manasye bo Epraim.

²⁹Kon singgai tobatú ki Yerobeam in iḻumuai nongkon Yerusalem. Kon daḷan kon tampat popokaanan in biag, sia in inangoi i Nabi Ahia nongkon Silo inta kon dodai intua nogi jubah mobagu.

³⁰Bo noḷongkut in ki Ahia kon jubahnea, bo nomera-merak kon tua nobaḻí mopuḷú bodoyowá nopongkó.

³¹Onda intua nogumandon in sia kon i Yerobeam, “Gamádon in mopuḷú nopongkó kon inimu, sin ki TUHAN, Allah in Israel, noguman kon inimu nanaa, ‘Akuoi in mogamádon kon dodatuan tanaa nongkon i Salomo, bo mobogoi in mopuḷú nosuku kon inimu.

³²Tongo suku in umuranbí moyotakin i Salomo, sin popisí in mogogundoi-Ku ki Daud, bo Yerusalem, inta ain piniḻí-Ku nongkon bayongan in butá Israel nobaḻí kotá-Ku.

³³Aidan-Kubí intua sin ki Salomo in nonaḷámaidon kon i-Nakó bo nosumbadon kon dewa mita, inta ki Asytoret, dewi in bangusa in Sidon, Kamos, dewa in bangusa in Moab; bo Milkom, dewa in bangusa in Amon. Ki Salomo in diá dinumudui kon ibog-Ku. Diá notongkai in sia i amánea ki Daud inta motoindudui kon i-Nakó bo nogaid kon parenta-Ku mita.

³⁴Umpaka natua táe diábí daiton-Ku gamáan in bayongan dodatuan tatua nongkon inia. Sia in pomayá-Kubí mako mongawasa kon dodai in sia mobiagpa. Soaḷ tatua in pomiaan-Ku sin popisí in mogogundoi-Ku ki Daud, inta ain piniḻí-Ku bo inta dinumudui kon hukum-Ku bo parenta-Ku mita

³⁵Dodatuan tanaa in gamáan-Kubí nongkon i adí ḷoḷaki i Salomo bo mopuḷú nosuku in ogoi-Ku kon inimu.

³⁶Tongá tongosuku in pomayá-Kubí mako kon inia, sinbá umuran oyúon in intau tobatú nongkon buí in mogogundoi-Ku ki Daud inta momarenta kon tayowon-Ku kon Yerusalem, kotá inta ain piniḻí nobaḻí tampat posumbaan kon i-Nakó.

³⁷Bo iko, Yerobeam, in baḻíon-Kudon datu in Israel bo ogoi-Kudon momarenta kon bayongan in butá inta koibogmu.

³⁸Aka iko, ná mogogundoi-Ku ki Daud, motoindudui totu-totuu kon i-Nakó bo mobiag podudui in hukum-Ku mita, bo mokosanang kon gina-Ku takin mopoaid in bayongan inta pinarenta-Ku kon inimu, dá Akuoi in umuranbí moyotakinmu. Baḻíon-Kubí in iko datu kon Israel. Jaminon-Kubí kon buímu in mobaḻíbí datu in Israel momaḷui kon inimu, notongkai ná inta pinomia-Ku kon i Daud.

³⁹Popisí in ki Salomo binaradosa, dá hukumon-Ku in buí i Daud, táe diábí mononoi.’ ”

⁴⁰Naonda in habar tatua noiyaput kon i Salomo, noḷongasidon in sia moḻimod kon i Yerobeam. Táe noḷagui in ki Yerobeam minayá kon i Datu Sisak kon Mesir, bo nogutun kon tua nodapot in ki Salomo minatoi.

⁴¹Ouman ibanea soaḷ ki Salomo, bo bayongan inta ain inaidannea, bo soaḷ pongotahuannea aindon pinais kon bonu in buk Ouman Kinobiagan i Salomo.

⁴²Opat nopuḷú notaong in koonggotnea in ki Salomo nomarenta kon Yerusalem bo kon bayongan in Israel.

⁴³Onda intua minatoi in sia bo iḷobong kon kotá i Daud. Bo ki Rehabeam adínea ḷoḷaki in nobaḻí datu nonoḻiu kon inia.