Read Mongondow DATU MITA IMITÁNEA 12 Bible Online

DATU MITA IMITÁNEA 12 - Mongondow bible

DATU MITA IMITÁNEA 12

¹Ki Rehabeam minayá in Sikhem, sin bayongan rayat in Israel dotá in utuan in noyosipundon kon tua sin moduí kon inia mobaḻí datu.

²Kon dodai intua ki Yerobeam ki adí i Nebat in kon Mesirpa sin noḷagui kon i Datu Salomo. Naonda in kinodongogannea in soaḷ ki Rehabeam, nobuidon in sia minayá in Israel.

³Rayat kon dotá in utuan nogoiní kon i Yerobeam, bo noyotakin in mosia minayá kon tayowon i Rehabeam. Guman monia,

⁴“Ki amá i tuang datu in nobogoidon in oaidan inta mobogat kon inami. Tanaa aka ki Tuang moibog monggaat kon oaidan nami bo monggaat doman kon roriga nami, dá kami in mobantungbí kon i tuang datu.”

⁵Ki Rehabeam in notubag, “Raionkupa muna. Angoidon bui kon toḷu nosinggai moiduduimai.” Dá nobuidon in intau mita tatua.

⁶Bo noigum in ki Rehabeam kon tonggina in guyanga mita inta nokoimontandon nobaḻí monononggina i Salomo, ki amá i Rehabeam. “Naonda in pototubagku kon intau mita tatua?” iḻibó i Rehabeam, “Onu in tonggina monimu?”

⁷Mosia in notubag, “Aka ki Tuang totu-totuu moibog mogaid kon kopontingan in rayat, dá duduiaidon in oigum monia tua, dá mosia in moibogbí umuran mobantung kon i tuang datu.”

⁸Táe tonggina in guyanga mita tatua diábí inindongoganneamai, tongábí bo minayá in sia kon intau mita inta nongobagupa inta tongoumurnea bo inta koyogot nobantung kon inia.

⁹Sia in noḻibó kon i monia, “Onu in tonggina monimu kon inakó sin motubag kon rayat inta nopoigum sinbá inggamáankudon in oaidan monia?”

¹⁰Mosia in notubag, “Nanaa in singogon i tuang datu kon i monia, ‘Naondaka i koyangkóku, táe akuoibí in moropo-ropot in ki amáku!’[14]

¹¹Ki amáku nobogoi in oaidan inta mobogat kon inimu, táe akuoi in mobogoibí in inta moiḻiu in bogatnea kon tua. Sia in noposambok in sambok kon i monimu, táe akuoi in moposambokbí kon i monimu in sambok inta sinondugian in uatoi!”

¹²Toḷu nosinggai noiduduimai kon tua ki Yerobeam bo bayongan in intau tatua namangoi bui kon tayowon i Datu Rehabeam, ná inta ain pinarentanea.

¹³Noyoposi in tonggina in guyanga mita tatua, rayat inta namangoi kon inia tatua sinontomunea in tosingogon inta diá mopia.

¹⁴Podudui in tonggina in intau mita inta nongobagupa, sia in noguman, “Ki amáku nobogoi in oaidan inta mobogat, táe dugangankubí in kobogat in oaidan tatua. Sia in noposambok kon i monimu in sambok, táe akuoi in moposambokbí kon i monimu in sambok inta sinondugian in uatoi!”

¹⁵Onu inta pinoigum in rayat diábí inindoianneamai. Táe tua in kinoibogbí i TUHAN. Onu inta ain pinoguman i TUHAN pinongin i Nabi Ahia nongkon Silo soaḷ ki Yerobeam adí i Nebat in mustibí mobaḻí.

¹⁶Naonda inontongmai in rayat kon ki datu in doíbí mokidongog kon i monia, nomaḷú in mosia, “Dikadon mopandungmai kon i Daud bo buínea! Mosia in diábí kon dodai in onda in nogaid kon onu bo onu kon inaton. Rayat in Israel, koḻigai mobuidon in kita! Pomayádon mako in ki Rehabeam tua in moindoi kon awaknea tontaní!” Dá nobuidon in rayat in Israel,

¹⁷bo ki Rehabeam in nobaḻí datu tongá kon butá in Yohuda.

¹⁸Umpaka natua ki Datu Rehabeam in nopotabápabí doman kon i Adoniram, tongguḷu in mogogaid ata, nopoonow kon gina in rayat. Táe inandur monia in sia in batu nodapot in minatoi. Nokoontongmai kon natua ki Rehabeam iḻimikat in noponik kon keretanea, bo noḷagui minayá in Yerusalem.

¹⁹Pinangkoi kon tatua rayat kon dotá in utuan dodatuan in Israel umurandon momarontak kon datu mita inta buí i Daud.

²⁰Kon dodai in bayongan rayat nokodongog kon ki Yerobeam in nobuidon nongkon Mesir, inoiní monia in sia kon pinoyodungkuḷan tobatú bo dinuí monia in sia nobaḻí datu in Israel. Tongábí rayat in suku Yohuda in umuran nosatia kon buí i Daud.

²¹Naonda in ki Datu Rehabeam nodapotmai kon Yerusalem, nosipun in sia kon 180.000 in tontara inta mongopia nongkon suku in Yohuda bo Benyamin sin mayá momarang kon intau in Israel bo mopoguḻit in kawasa nea kon suku mita inta kon dotá in utuan in Israel.

²²Táe ki Allah in nopotabá kon i Nabi Semaya

²³nopoyaput in habar tanaa kon i Rehabeam, bo kon bayongan in suku Yohuda bo Benyamin,

²⁴“Dikabí momarang kon i utatmu mita intau in Israel. Pobuidon! Onu inta nobaḻí tua in ibog-Kubí.” Dá mosia komintan dinumuduidon kon parenta i TUHAN, bo nobuidon kon baḷoinea-baḷoinea.

²⁵Naonda in nobaḻí datu in Israel, ki Yerobeam noginropotdon kon kotá in Sikhem kon butá in buḷud in Epraim, bo nogutun kon tua notoyong. Onda intua minayá bui in sia nongkon tua bo noginropot kon kotá in Pnuel.

²⁶Sia in norai nanaa, “Aka rayat bo umuran mayá in Yerusalem sin moposumba in kuruban kon Baḷoi TUHAN ná inta inaidan monia tanaa, mosia in buibí motuḷung kon i Rehabeam, datu in Yohuda, bodongka moḻimod kon inakó.”

²⁸Naonda in noporai-raimai kon tua, nomia in sia kon patong sapi buḷawan bo noguman kon rayat, “Bangusa in Israel! Noonggotdon in moiko in minayá in Yerusalem sin moibada. Tanaa in naadon in ilahmu mita inta ain nodia kon i monimu iḻumuai nongkon Mesir!”

²⁹Bo ki Yerobeam in nopoukat in sapi buḷawan tobatú tatua kon Betel bo ibanea in kon Dan.

³⁰Dá rayat in nomia domandon kon dosa, sin mosia in minayá in Betel bo kon Dan sin moibada.

³¹Ki Yerobeam in noposindog domandon in tampat pososumbaan ibanea kon tudu mita in buḷud, bo noduí doman in sia kon imang mita nongkon sigad in motoḷuadí mita inta deeman suku in Lewi.

³²Onda intua ki Yerobeam nonampat kon imang mita tatua kon Betel sin mopobayá in oaidan monia kon tua bo sia tontaní in noposumba in kuruban kon sapi mita buḷawan inta pinomianea tatua. Bo nonantúdon in sia kon singgai impuḷú boḻima buḷan noginwaḷu nobaḻí singgai moḷoben in Israel, notongkai ná singgai moḷoben kon Yohuda. Kon singgai tatua ki Yerobeam minayá in Betel bo noposumba in kuruban sin morame kon singgai moḷoben inta ain sinantúnea tatua.