Read Mongondow DATU MITA IMITÁNEA 13 Bible Online

DATU MITA IMITÁNEA 13 - Mongondow bible

DATU MITA IMITÁNEA 13

¹Kon dodai intua oyúon in nabi tobatú kon Yohuda. Sia in pinotabá i TUHAN mayá in Betel. Nabi tatua noiyaput intua kon tungkuḷ in ki Yerobeam simindog mako kon tayowon in mezbah sin moposumba in kuruban.

²Podudui in parenta i TUHAN nomaḷúdon in nabi tatua kon mezbah tatua, “Ei mezbah, ei mezbah! Nanaabí in guman i TUHAN, ‘Adí tobatú inta tangoian ki Yosia in pononggadíbí nongkon motoḷuadí i Daud. Kon tudumu naa, ei mezbah, ḻimodonnea in imang mita inta mopobayá in oaidan monia kon tampat pososumbaan kon dewa, bo inta ain doman noposumba in kuruban kon tudumu. Bo kon tudumu doman nion in potubáannea kon tuḷan mita in intau.’ ”

³Guman i nabi noiduduimai, “Mezbah tanaa in morumbunbí, bo ḷobud inta kon tudunea in moitabud. Tua in poniataan kon akuoi in pinotabábí i TUHAN.”

⁴Kon dodai in kinodongogan i Yerobeam in tosingogon mita tatua, sinundúnea in nabi tatua bo nomaḷú, “Domok in intau tatua!” Táe kokaḷ i Yerobeam daḻídon notorondó dá diádon motaaunea okúon.

⁵Mezbah tatua baḷúdon norumbun bo ḷobud kon tudunea noitabud kon butá, ná inta pinoguman in nabi tatua podudui in parenta i TUHAN.

⁶Bo ki Datu Yerobeam nogumandon kon i nabi tatua, “Tuḷungaipa kaasí sambayangai in akuoi kon i TUHAN Allahmu. Poigumaipa kon totabi-Nea sinbá undaman-Neapa in kokaḷku!” Nosambayang in nabi tatua kon i TUHAN, bo nopiadon in kokaḷ i datu.

⁷Onda intua ki datu in noguman kon i nabi tatua, “Koḻigai mongaanpa kon baḷoiku. Bain ogoianku in tombuinag in iko.”

⁸Nabi tatua in notubag, “Umpakabí ogoi i tuang datu kon inakó in tongobotak in kaoyúonan i tuang datu, yo akuoi in doíbí mayá mongaan andeka monginum moyotakin i tuang datu.

⁹Akuoi naa in nokouḻí kon parenta nongkon i TUHAN kon diábí motaau in mongaan andeka monginum, bo diábí doman mobui mongin daḷan inta binayáanku kon tungkuḷ in akuoi namangoi.”

¹⁰Bo minayádon in nabi tatua nongin daḷan ibanea.

¹¹Kon dodai intua oyúon in nabi nogoguyangdon tobatú inta nogutun kon Betel. Ki adínea mita in nopotaaudon kon inia soaḷ nabi nongkon Yohuda tatua. Inouman monia in onu inta pinomianea kon Betel kon singgai tatua, bo onu in pinogumannea kon i Datu Yerobeam.

¹²Bo noḻibódon in nabi nogoguyang tatua, “Nabi nongkon Yohuda tatua nongin onda tungkuḷ in sia nobui?” Dá sinundú monia in daḷan tatua kon inia.

¹³Bo pinotabánea in mosia nopoḷutud in ḷoḻitúan kon keledainea. Onda intua sinumakoi in sia kon keledainea bo minayá

¹⁴nomatuk kon nabi inta nongkon Yohuda tatua. Noyodungkuḷnea in nabi tatua kon tungkuḷ in nabi tatua ḻimitúpa mako kon siungon in pangkoi in kayu moḷoben. “Degá Iko nion in nabi inta nongkon Yohuda?” natua in pinoḷoḻibó in nabi nogoguyang tatua. “Totuu,” tubag in intau tatua.

¹⁵“Koḻigai bá mayápa mongaan kon baḷoi takinku,” guman in nabi nogoguyang tatua.

¹⁶Táe nabi nongkon Yohuda tatua in notubag, “Ampungdon! Diábí in akuoi motaau motarima kon tongganut i Amá bo dumudui mayá in baḷoi i Amá. Akuoi in diábí doman mongaan andeka monginum kon naa moyotakin i Amá.

¹⁷Ki TUHAN ain nomarenta kon inakó kon diá mongaan andeka monginum bo diábí doman mobui mongin daḷan inta binayáanku kon tungkuḷ in namangoi.”

¹⁸Dá nabi nogoguyang inta nongkon Betel tatua in nonguboḷ kon inia, takin noguman, “Akuoi in nabibí doman ná Iko. Podudui doman in parenta i TUHAN malaekat tobatú ain nopotabá kon inakó monontomu kon inimu poḷat mogoḷud in kaanon kon baḷoiku.”

¹⁹Dá nabi inta nongkon Yohuda tatua dinumuduidon minayá in baḷoi in nabi nogoguyang tatua bo nongaan takinnea.

²⁰Kon dodai in mosia iḻimitú nongaan, ki TUHAN nosingog pinongin nabi nogoguyang tatua,

²¹dá sia in nonoboḷow kon nabi inta nongkon Yohuda tatua, kainia, “Ki TUHAN in noguman kon Iko in diábí motoindudui kon i-Nia. Iko in diábí nogaid kon onu inta pinarenta-Nea kon inimu.

²²Iko in nobuidon bo nongaan bo nonginum, bokaka iko in diábí ogoi in momia kon tua. Tuamai in iko in ḻimodonbí, bo awakmu in diábí ḷobongon kon poḷoḷobongan in motoḷuadímu.”

²³Naonda in mosia nopaḷut nongaan, nabi mogoguyang tatua nopopaké in ḷoḻitúan kon keledai in nabi nongkon Yohuda tatua,

²⁴bo minayádon in nabi tatua. Kon yuak in daḷan sinontomu in sia in singa tobatú bo dinomok pinatoi. Awaknea in noitongkob kon daḷan, bo keledainea in sinimindog mako kon diugnea. Singa tatua in sinimindog doman mako kon tua.

²⁵Intau mita inta noitaḻib, nokoontong kon mayat bo singa tatua kon tua. Bo mosia in minayá in Betel bo nopotaau kon onu inta inontong monia.

²⁶Naonda in dinongog in nabi nogoguyang tatua intua, noguman in sia, “Notantúbí kon siadon tua in nabi inta diá motoindudui kon parenta i TUHAN! Tuamai in ki TUHAN nopoangoi in singa tatua sin modomok bo moḻimod kon inia ná inta pinoguman i TUHAN muna.”

²⁷Bo nabi nogoguyang tatua noguman kon i adínea mita, “Popopakédon in ḷoḻitúan kon keledaiku.” Naonda in sinumakoi kon keledainea, minayádon in sia.

²⁸Nouḻínea in mayat in nabi nongkon Yohuda tatua noiukatpa mako kon daḷan takin keledai bo singa in kon diugnea. Singa tatua in diábí nodomok kon keledai tatua, bo diábí doman nokaan kon mayat tatua.

²⁹Binuatnea in minatoi tatua bo pinopodatognea kon keledainea, bo dinianea nobui kon Betel sin ombaḷan bo ḷobongon.

³⁰Nabi mogoguyang tontaní tatua in noḷobong kon minatoi tatua kon poḷoḷobongan kon motoḷuadínea, bo sia takin i adínea mita nongombaḷ kon minatoi tatua. Mosia in noguman, “Kaasí in iko awú utatku, kaasí ah!”

³¹Onda intua nabi mogoguyang tatua noguman kon i adínea mita, “Aka akuoi matoi, yo ḷobongdon in akuoi kon poḷoḷobongan tanaa kon diug in nabi tatua.

³²Onu inta ain pinogumannea pinodoyon kon parenta i TUHAN kon mezbah inta kon Betel tatua bo kon bayongan tampat pooibadaan kon kotá mita in Samaria tua in notantúbí kon mobaḻí.”

³³Ki Datu Yerobeam in umuranbí doí monaḷámai kon oaidnea inta moraat. Bo noduí in sia kon imang mita nongkon motoḷuadí mita biasa sin monompia kon tampat mita pooibadaan inta ain pinosindognea. Ki inekabí in moibog, yo baḻíonneabí imang.

³⁴Oaidnea inta moraat tatua nokopopisídon kon buínea in nobodito bo noyopú komintan.